Ад частаты і характару паліву пакаёвых кветак шмат у чым залежыць тое, як хутка яны будуць расці, наколькі пышна цвісці, а таксама ступень іх схільнасці да некаторых захворванняў.
Галоўная прыкмета таго, што вашым раслінам не хапае паліву, — сухі грунт. Калі драўляная палачка з лёгкасцю прайшла на некалькі сантыметраў углыб і пры гэтым засталася сухой, расліну смела можна паліваць. Але рабіць такую праверку трэба вельмі асцярожна, каб не пашкодзіць карані расліны.
Вядома ж паліў хатніх раслін у цёплую пару года карэнным чынам адрозніваецца ад паліву зімой. Паспрабуем разабрацца, як менавіта паліваць хатнія расліны.
Некаторыя кветкаводы сцвярджаюць, што ўзімку расліны можна амаль не паліваць і не падкормліваць. Гэта ў корані няправільна, бо нават у халодную пару года кветкі могуць захварэць, падвергнуцца нападу шкоднікаў або і зусім загінуць ад недахопу вільгаці. Ёсць тыя, якія цвітуць зімой, а значыць, перыяд актыўнай вегетацыі выпадае менавіта на гэты час альбо наогул не спыняецца. З гэтай прычыны догляд такой расліны павінен адпавядаць выключна перыяду яе росту або адпачынку. Усе астатнія варта паліваць неактыўна, па меры высыхання грунту. Не рэкамендуецца выкарыстоўваць сістэмы самапаліву, а таксама ўвільгатняць расліны праз паддоны, як у цёплы час года: узімку гэта можа спрыяць з'яўленню цвілі на грунце і ўзнікненню ў расліны захворванняў. Падкормку раслін, як і іх апрацоўку супраць шкоднікаў праводзяць не часцей чым адзін раз у месяц-паўтара.
Гэта час, які традыцыйна лічыцца зручным для перасадкі хатніх раслін. Аптымальная перыядычнасць паліву вагаецца ў межах 3—7 дзён у залежнасці ад тэмпературы паветра за акном і ў памяшканні, наяўнасці ацяплення, ступені вільготнасці паветра і яго цыркуляцыі.
Адзін-два разы ў месяц паліў расліны сумяшчаюць з каранёвымі падкормкамі. Пры гэтым падкормка павінна чаргавацца з апрацоўкай ад хвароб і шкоднікаў, якую таксама праводзяць раз у два тыдні, і яна можа быць як каранёвай, так і пазакаранёвай. Для лепшага росту вясной усім раслінам, у тым ліку хатнім, патрабуецца падкормка азотнымі ўгнаеннямі, а з народных сродкаў — густыя настоі яечнай шкарлупіны альбо цыбульнай шалупіны.
Апырскванні — гэта таксама свайго роду паліў, праўда, некаторыя кветкі (асабліва ў перыяд цвіцення) пакутуюць ад пападання вадкасці на лісце, а асабліва ад застойвання вады ў пазухах. У гэтым выпадку трэба апырскваць не самі расліны, а паветра ў радыусе некалькіх метраў ад іх.
Як толькі сярэднясутачная тэмпература паветра за акном падымецца да 10—15 °С, некаторыя кветкі можна смела вынесці на балкон (пры ўмове, што ён зашклёны).
Расліны, якія баяцца халоднага паветра і скразнякоў, нават у летні час лепш пакінуць у пакоі, але пры гэтым іх давядзецца дадаткова апырскваць. Часовых балконных гадаванцаў да таго, як сонца пачне ярка свяціць, досыць паліваць і апырскваць раз на тыдзень.
У гэтым выпадку таксама важна, дзе менавіта знаходзяцца вашы расліны. Калі гэта любое акно ў кватэры, акрамя паўднёвага, то інтэрвал у тыдзень паміж палівамі захоўваецца, а вось апырскваць кветкі можна і часцей. Расліны на балконе і на падаконніку паўднёвага акна, па-першае, трэба абараніць ад прамых прамянёў сонца, зацяняючы высокімі раслінамі, якія любяць сонца, а па-другое — перыядычна правяраць вільготнасць грунту і ў адпаведнасці з гэтым паліваць (прыкладна 2—3 разы на тыдзень). А вось апырскваць кветкі на балконе ў гарачае надвор'е можна хоць кожны дзень, але рабіць гэта выключна раніцай ці ў вячэрні час. Памятайце, што расліны падчас іх цвіцення апырскваць па лісці не варта: ёсць рызыка, што бутоны ападуць.
Дарэчы, аматары пакаёвых кветак сцвярджаюць, што расліны, якія любяць сонца, у асноўным маюць шчыльнае тоўстае лісце.
Для таго каб не памыліцца з палівам, лепш высадзіць расліны ў гаршкі з дрэнажнымі адтулінамі і паддонамі, куды і наліваць ваду. У гэтым выпадку кветка вып'е столькі вады, колькі ёй трэба, а ўся лішняя застанецца ў паддоне.
У гэтую пару паліў і апырскванне раслін паступова скарачаюць, арыентуючыся на тэмпературу і вільготнасць паветра, а таксама на стан грунту.
Пакаёвым кветкам, якія змяшчаюцца ў керамічным посудзе, патрабуецца значна больш вільгаці, чым усім астатнім.
У другой палове лета і ў пачатку восені раслінам для ўмацавання каранёвай сістэмы, устойлівасці да тэмпературных змен і розных захворванняў патрэбныя фосфарна-калійныя ўгнаенні. Таму сумяшчайце паліў з падкормкай, арыентуючыся на інструкцыю да таго ці іншага ўгнаення.
Ірына ТАМКОВІЧ
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
