Вы тут

Карэспандэнт «Звязды» сустрэў новы год у віцебскім раддоме. У 0.01 нарадзілася дзяўчынка па прозвішчы Мароз


Дзесьці каля апоўначы дождж на вуліцы скончыўся і раптам пахаладала. А літаральна пад тэлетрансляцыю бою курантаў на свет з'явілася дзяўчынка па прозвішчы... Мароз!


У нас не горш

Спачатку трохі пра гісторыю, без якой, вядома, няма будучыні. Віцебскі абласны клінічны радзільны дом (гараджанам ён больш вядомы як раддом № 1 на праспекце Чарняхоўскага) амаль што равеснік нашай «Звязды». Газету, нагадаю, пачалі друкаваць у 1917-м. А ў Віцебску першы радзільны дом на сорак ложкаў быў арганізаваны ў 1921-м на базе павятовай бальніцы. І тут працавалі ўсяго тры ўрачы, шэсць акушэрак і чатырнаццаць сядзелак... Віцебск вызвалілі ад нямецка-фашысцкіх захопнікаў у чэрвені 1944-га, а ўжо ў верасні ў амаль што цалкам разбураным горадзе радзільны дом аднавіў работу. У яго складзе былі і жаночая кансультацыя, і стацыянар на 45 ложкаў...

Летам 2008-га пасля капітальнага рамонту радзільны дом літаральна распачаў новае жыццё. Рэканструкцыя была праведзена з камплектацыяй найноўшым высокатэхналагічным абсталяваннем і перааснашчэннем для ўкаранення сучасных метадаў аператыўнага ўмяшання і лячэння. З'явілася магчымасць якаснай лабараторнай дыягностыкі.

Каб не стамляць чытачоў тэхнічнымі нюансамі, адзначу, што нараджаюць нашы жанчыны ва ўмовах, не горшых, чым у краінах Еўропы. І штогод, дарэчы, усё больш іншаземак, ахвотных плаціць за магчымасць нарадзіць менавіта ў Віцебску.

Навагоднія казусы

Цікава, што гэты навагодні начны рэпартаж мог сарвацца. Раніцай 31-га віншаваць мам прыходзіў начальнік Галоўнага ўпраўлення па ахове здароўя Віцебскага аблвыканкама, сенатар Юрый Дзеркач, а з ім — і прадстаўнікі шэрагу СМІ. Напэўна, кіраўніцтва раддома думала, што карэспандэнт «Звязды» прыбудзе разам з усімі. Але ж у мае планы ўваходзіла знаёмства менавіта з «навагоднімі» парадзіхамі і «начнымі» немаўлятамі.

Дзякуй богу, арганізацыйнае пытанне ў адміністрацыі радзільнага дома вырашылі вельмі аператыўна. І паабяцалі, што дазволяць падзяжурыць з медыкамі ў навагоднюю ноч. Так і адбылося.

Аб адзінаццатай гадзіне ночы я ўжо чакаў на прыпынку трамвая № 1. Да дзвярэй трамвая мяне праводзіў... сімпатычны чорны кот. (Адкуль толькі ўзяўся?) Міжвольна ўспомніў булгакаўскага ката, які не толькі праехаўся ў вагоне, але і спрабаваў заплаціць кандуктару. Мой «праважаты» плаціць, зразумела, не збіраўся. Але, пагадзіцеся, сустрэць коціка напярэдадні надыходу года пацука — у гэтым ёсць нешта сімвалічнае...

Словам, настрой у мяне быў цудоўны. Натхняў і «звычайны цуд» — нараджэнне новага чалавека, а можа, і некалькіх — сведкам чаго я павінен быў стаць.

«Хутчэй, нараджае!»

А дванаццатай ночы быў каля прыёмнага пакоя.

Супрацоўніца, якая сустрэла пры ўваходзе, папрасіла хутчэй зняць куртку і нацягнуць бахілы. З непрывычкі гэта не атрымалася зрабіць адразу. Як і надзець белы халат. Тлумачылася спешка тым, што жанчыну ўжо павезлі раджаць, а я ж хацеў паспець яшчэ і здымкі зрабіць.

У ардынатарскай пазнаёміўся з маім «гідам» па ўстанове (праўда, хадзілі мы ў межах паверха ад ардынатарскай да залы, дзе нараджаюць). Ім стала прывабная акушэр-гінеколаг Ірына Жаўніцкая. Гэта яе другая навагодняя ноч, калі выпадае дзяжурыць. А вось Таццяна Вакар, маладая акушэр-гінеколаг, працуе першы год. Першы раз у навагоднюю ноч дзяжурыла і педыятр Крысціна Сцяпанава.

Ну, прывітанне!

Усяго летась у гэтай установе з'явілася на свет больш за 1600 дзяцей. 31 снежня ўжо мінулага года да гадзіны дня нарадзіліся хлопчык і дзве дзяўчынкі. А хто ж народзіцца першы ў 2020 годзе?

Пакуль весяліў у калідоры прадстаўніц медыцынскага персаналу, пачуў плясканне ў далоні. Аказваецца, калі ў немаўляці ўсё добра, на «апладысменты» яно адрэагуе плачам...

Такім чынам, першай у 2020-м у 00 гадзін 01 хвіліну нарадзілася дзяўчынка. Бацькі вырашылі даць ёй імя Мар'яна. Вага Мар'яны — 2860 грамаў, рост 49 сантыметраў. Мама — 25-гадовая жыхарка Віцебска Настасся Мароз — да выхаду ў дэкрэтны водпуск працавала ў адной з гаспадарак Лёзненскага раёна. Па спецыяльнасці яна ветэрынар. Гэта яе першыя роды, але (дай, неба!) будуць і яшчэ. Наваспечаны бацька даведаўся пра добрую навіну, патэлефанаваўшы ў прыёмны пакой.

З дазволу мамы мы зрабілі першую фотасесію новага чалавечка. Падумаў, што я ж першы мужчына, які «сустрэўся» дзяўчынцы на жыццёвым шляху. З барадой ды вясёлы, напэўна, падобны на Дзеда Мароза. Вырасце — будзе чакаць яго прыходу...

Цікава, кім яна стане, мая новая знаёмая Мар'яна? Можа, таксама журналістам? Тады, калі атрымаецца, пастараюся перадаць ёй здымкі, якія не надрукуюць у газеце. А пакуль што...

Хай расце здаровенькай на радасць бацькам і краіне.

Між іншым, кажуць «нарадзіўся пад шчаслівай зоркай»! Дзяўчынка нарадзілася побач з прадстаўніком «Звязды». Дык будзь, Мар'янка, і доўгажыхаркай, як «Звязда»!

Аляксандр ПУКШАНСКІ

Фота аўтара

Загаловак у газеце: У чаканні... першага жыцця

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.