Вы тут

Уначы на Раство будзе ўпэўнены мінус, а ўдзень усё роўна плюс


Першыя дні новага года выдаліся адносна цёплыя, калі месцамі ў нас былі кароткачасовыя ападкі ў выглядзе дажджу і мокрага снегу. У найбліжэйшыя дні характар надвор'я не зменіцца, а ў ноч на 7 студзеня ўзмоцняцца маразы, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.


У нядзелю ўмовы надвор'я ў нашай краіне сапсуюцца. У гэты дзень, пад уплывам франтальных раздзелаў уначы і раніцай на большай частцы тэрыторыі Беларусі, удзень месцамі, пераважна па ўсходзе, пройдзе кароткачасовы снег, мокры снег, які будзе суправаджацца парывістым ветрам і слабай завеяй. На асобных участках дарог чакаецца галалёдзіца. Тэмпература паветра на працягу сутак складзе ад мінус 4 градусаў да 2 цяпла.

Хваля холаду прыйдзе да нас ужо ў панядзелак. Уначы ў вобласці павышанага ціску будзе ў асноўным без ападкаў, толькі па паўночным захадзе чакаецца кароткачасовы снег. Раніцай і ўдзень чарговая сістэма франтоў абумовіць на большай частцы тэрыторыі краіны кароткачасовыя ападкі ў выглядзе снегу, мокрага снегу, які будзе пераходзіць у дождж. Месцамі магчымы слабы галалёд, на дарогах галалёдзіца. Тэмпература паветра ўначы складзе ад мінус 3 градусаў да мінус 9 градусаў, пры праясненнях паветра астудзіцца да 12 марозу. Удзень будзе ад мінус 4 градусаў да 3 цяпла.

Холадна — і на Раство. У гэтыя суткі ўначы месцамі, а ўдзень пераважна па заходняй частцы краіны пройдуць кароткачасовыя ападкі ў выглядзе мокрага снегу і дажджу. У асобных раёнах чакаюцца туман, слабы галалёд, на дарогах галалёдзіца. Тэмпература паветра ўначы складзе ад нуля да мінус 6 градусаў, пры праясненнях — да 9 марозу. А вось удзень будзе ад мінус 3 градусаў да 3 цяпла.

Паводле папярэдніх прагнозаў айчынных сіноптыкаў, у сераду ўмовы надвор'я будуць вызначаць франтальныя раздзелы і паветраныя масы атлантычнага паходжання. Таму адразу стане цяплей. Уначы месцамі, а ўдзень пераважна па паўночна-заходняй частцы краіны пройдуць кароткачасовыя ападкі ў выглядзе дажджу і мокрага снегу. Чакаецца слабы туман, уначы і раніцай слабы галалёд, на асобных участках дарог — галалёдзіца. Удзень прагназуецца парывісты вецер. Тэмпература паветра ўначы складзе ад мінус 5 градусаў да плюс 1 градуса, удзень — ад нуля да 5 цяпла.

Сяргей КУРКАЧ

Загаловак у газеце: Падмарозіць, але ненадоўга

Выбар рэдакцыі

Культура

Мікалай Пінігін: Каб ведаў як, сам напісаў бы класную сучасную п'есу

Мікалай Пінігін: Каб ведаў як, сам напісаў бы класную сучасную п'есу

На рахунку рэжысёра і мастацкага кіраўніка Купалаўскага тэатра Мікалая Пінігіна больш за семдзесят спектакляў, і па некаторыя з іх хоць зараз ідзі на вуліцу Энгельса. 

Грамадства

Расказваем пра тое, як на Брэстчыне раней гатавалі варэнне і як гэта робяць цяпер

Расказваем пра тое, як на Брэстчыне раней гатавалі варэнне і як гэта робяць цяпер

Аказваецца, у нашых вёсках амаль да другой паловы ХХ стагоддзя не мелі звычкі нарыхтоўваць яго, не ведалі, як варыцца.