Вы тут

Барсук дапаможа рэалізаваць праекты на 60 мільёнаў долараў


На Гродзеншчыне і Магілёўшчыне распачнецца цеплавая мадэрнізацыя дамоў. Кожнай з абласцей у межах рэалізацыі праекту аб пашырэнні ўстойлівага энергакарыстання Сусветны банк разам з Еўрапейскім інвестыцыйным банкам выдзяляе на гэтыя мэты па 30 мільёнаў долараў. Праект распачнецца сёлета 27 сакавіка і працягнецца да 30 красавіка 2025 года.


Па чарзе і жаданні

Удзельнічаць у праграме могуць дамы, што знаходзяцца ў чарзе на капрамонт на гэты год і наступныя. Аднак калі жылля няма ў чарзе, а жыхары на сходзе вырашаюць, што хочуць паўдзельнічаць, то гэтая просьба можа быць разгледжана мясцовым выканкамам. Тое ж датычыцца і дамоў таварыстваў уласнікаў.

— Першапачаткова законам прадугледжана, што ініцыятарамі рэалізацыі энергаэфектыўных мерапрыемстваў могуць быць як мясцовыя органы ўлады, так і сумесныя домаўладанні незалежна ад формы кіравання. Аднак у першую чаргу мы пакуль гаворым пра ініцыятыву ўлад. Яны павінны прагледзець спісы дамоў на капрамонт, — тлумачыць Андрэй РАМАШКА, начальнік упраўлення жыллёвай гаспадаркі Міністэрства ЖКГ. — Уласнікі таксама могуць прыйсці як ініцыятары і выказаць уладам жаданне далучыцца да праекта энергамадэрнізацыі, пацвердзіўшы яго згодай большай часткі жыхароў.

Пілотнай і выпрабавальнай пляцоўкай стаў Слонім. Тут мадэрнізуюць старую газавую кацельную, перакладуць цеплатрасу, усталююць індывідуальныя цеплапункты ва ўсіх дамах.

— Мы хочам распрацаваць камунікацыйную праграму ўзаемадзеяння з уласнікамі, пратэсціраваць яе, навучыць усіх удзельнікаў праекта: жыхароў, праекціроўшчыкаў, камунальнікаў. У канцы вясны, думаю, зробім спецыяльныя дапаможнікі, каб кожны ўдзельнік праекта меў поўную інфармацыю, сабраную ў адным месцы. Пасля яе можна будзе адаптавана выкарыстоўваць па ўсёй краіне. Мяркуем стварыць і невялікія брашуры, каб людзі ўжо пачыналі абдумваць і ўспрымаць інфармацыю. Будзем таксама праводзіць семінары, — абяцае Ірына ВАЙЦЯХОВІЧ, спецыяліст па энергетыцы (Група Сусветнага банку). — Разлічваем на комплексную мадэрнізацыю па праекце Б, якая эканоміла б да 40 % энергіі. Калі ўласнікам гэта будзе дорага, то возьмем варыянт А, дзе эканомія да 15 %.

Дамаўленне і шчырасць

Дэвіз энергаэфектыўнага праекта — «Цяпло ў хату за меншую плату». Беларусы, дарэчы, самі выбралі яго эмблему — барсука, які, па словах спецыяліста, сімвалізуе тыповага беларуса. Ён не вельмі даверлівы, любіць быць у доме, перадае яго нашчадкам.

— Механізм рэалізацыі нашага праекта новы, ён шырока нідзе не практыкаваўся, таму домаўладанням неабходны навыкі супрацоўніцтва і калектыўнага абмеркавання, — лічыць Ірына Вайцяховіч. — Вельмі важна знаёміць грамадзян з тым, што наш праект добраахвотны. Неабходна на сходах раздаваць людзям памяткі з самымі актуальнымі пытаннямі жыхароў і максімальна поўнымі, дакладнымі адказамі на іх. У тое, што праект атрымаецца, павінны перш за ўсё паверыць заказчыкі — ЖКГ. У Слоніме камунальнікі вераць, што ўсё атрымаецца. Тут правялі ўжо сем сходаў. Папярэдне ўсе жыхары пагадзіліся на мадэрнізацыю.

Ірына Сідарок

Фота Таццяны Ткачовай

Загаловак у газеце: «Цяпло ў хату за меншую плату»

Выбар рэдакцыі

Грамадства

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Адным з першых у вобласцi пачалi рэстаўрыраваць велiчны палац Сапег у Ружанах.

Грамадства

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Наша краiна займае трэцяе месца ў сваiм рэгiёне па колькасцi бескантактавых транзакцый.

Грамадства

Неспадзяваныя падарожжы. Як не згубiцца ў лесе?

Неспадзяваныя падарожжы. Як не згубiцца ў лесе?

Цёплае i вiльготнае надвор'е, якое вось ужо чацвёрты тыдзень з невялiкiмi перапынкамi пануе ў Беларусi, штурхае да таго, каб пайсцi ў лес.