Кампанія А1 сёлета працягне шэраг сацыяльных праектаў. Яны па-ранейшаму будуць дапамагаць дзецям і падтрымліваць нацыянальную ідэнтычнасць. Акрамя гэтага, з'явіцца новы кірунак — экалагічны. Традыцыйна больш за палову свайго прыбытку кампанія рэінвестуе ў нацыянальную эканоміку, у тым ліку на сацыяльныя праграмы, а гэта каля мільярда долараў. Дзякуючы такім праектам, у прыватнасці, мы адчулі, што такое «Венскі баль», атрымалі асалоду ад «Класікі ля Ратушы» і сотага юбілейнага сезона ў Купалаўскім тэатры. Сёлета з падтрымкай і заахвочваннем А1 беларусы далучацца да авангарднага мастацтва УНОВІС, працягнуць бегаць, чытаць па-беларуску і павысяць сваю экалагічную адукаванасць, паабяцаў генеральны дырэктар кампаніі А1 Гельмут Дуз.
— Некалькі гадоў таму наша кампанія стала першай, хто звярнуўся да сваіх кліентаў па-беларуску. Гэта для нас прынцыпова важна і цяпер. На падтрымцы роднай мовы грунтаваліся нашы сацыяльныя праекты ў сферы адукацыі і культуры. Найперш гэта ранейшы праект «Чытаем па-беларуску з Vеlсоm». Развіваючы забаўляльны кантэнт, мы пачалі перакладаць замежныя фільмы на родную мову (праект «Беларускія ўік-энды»), і на такія сеансы найхутчэй прадаваліся білеты, — адзначыў Гельмут Дуз.
Падтрымцы беларускай мовы былі прысвечаны адукацыйны праект для старшакласнікаў «Першыя» і ініцыятыва па папулярызацыі сучаснай беларускай літаратуры MОVАBОХ. Кампанія А1 і далей мае намер размаўляць з беларусамі на іх роднай мове. У найбліжэйшы час з'явіцца праект «Мова» (яго падрабязнасці пакуль не афішуюць) і іншыя.
Сёлета кампанія мае намер усур'ёз падтрымаць экалагічныя ініцыятывы. Для гэтага будзе праведзена маштабная навуковая канферэнцыя з удзелам экспертаў. Заслухаўшы іх прапановы, А1 вылучыць канкрэтныя ідэі ды ініцыятывы, якія і падтрымае. Галоўнае, да чаго мабільны аператар хоча прыцягнуць увагу, — павышэнне экалагічнай адукаванасці беларусаў.
— У Аўстрыі (мабільны аператар А1 з'яўляецца часткай міжнароднай групы А1 Tеlеkоm Аustrіа Grоuр. — «Зв.») нельга нават уявіць, што ты выкінеш батарэйку проста ў смецце, там усе сартуюць адходы. Але ў многіх краінах свету існуе такая праблема: людзі не задумваюцца, што іх дзеянні могуць нешта змяніць у экалогіі, — адзначыў Гельмут Дуз.
«Беларуская культура — важная старонка ў культуры еўрапейскай», — лічаць у кампаніі і таму далучацца да арганізацыі святкавання 100-гадовага юбілею сусветна вядомага мастацкага аб'яднання УНОВІС, заснаванага Казімірам Малевічам у Віцебску. У межах праекта #UNОVІS100 адбудзецца шэраг мерапрыемстваў у Віцебскім цэнтры сучаснага мастацтва, а ў Мінску будзе арганізавана выстаўка, прысвечаная дзейнасці аб'яднання.
А вось папулярны праект «Бяжым у дапамогу дзецям» (або Vеlсоmbеgоm) завяршыў сваё існаванне разам з рэбрэндынгам кампаніі, які прайшоў летась. Але бегаць разам беларусам прапануюць ізноў.
— Vеlсоmbеgоm — знакавы для нас праект, мы прыцягнулі вялікую колькасць не толькі тых, хто ахвяраваў сродкі, але і тых, хто актыўна бегаў. Нават беларусы, якія знаходзіліся не дома, а дзесьці ў Кітаі і на Кубе, бегалі і дасылалі нам вынікі. Разам мы пераадолелі 100 тысяч кіламетраў, гэта выдатныя прыклады. Аўстрыйцы былі б занадта лянівыя для такога праекта. А ў Беларусі ён стаў магчымы, і нешта падобнае мы абавязкова прапануем у будучыні, — паабяцаў генеральны дырэктар.
Праект «Я бачу», у рамках якога 50 тысяч школьнікаў з аддаленых вёсак прайшлі дыягностыку зроку, таксама завершаны. Гельмут Дуз высока ацаніў кваліфікацыю нашых урачоў:
— Я нядаўна вярнуўся з Аўстрыі са зламанай нагой. Але дзякуючы беларускім медыкам зноў стаў дастаткова мабільны. Я часам звяртаюся па медыцынскую дапамогу і маю ўяўленне пра высокую кваліфікацыю беларускіх урачоў. Але ёсць рэчы, якія аб'ектыўна маюць патрэбу ў грашах. Таму мы падтрымалі праект «Я бачу». Ёсць ініцыятывы, вынік якіх адчувальны адразу, ёсць тыя, якія патрабуюць часу на распрацоўку, а гэта мільёны долараў. Больш за 50 % нашага прыбытку мы рэінвестуем у нацыянальную эканоміку Беларусі, — сказаў генеральны дырэктар, адказваючы на пытанне пра кошт сацыяльных праектаў кампаніі.
Алена КРАВЕЦ
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
