Вы тут

Таленты растуць у дабрыні


Сотні дзяцей з усёй Беларусі, якія займаюцца класічнай музыкай і вакалам, паўдзельнічалі ў другім Усебеларускім конкурсе “Музыка дзіцячай душы” для дзяцей-сірот, дзяцей з інваліднасцю. А ў Мінск, на гала-канцэрт, прыехалі яго пераможцы.


Юлія Лебядзенка і Мар’яна Бабіч. Фота з архіва Беларускага дзіцячага фонду

Зала, сцэна Мінскай духоўнай акадэміі прымалі 13 таленавітых выканаўцаў 23 снежня. Імпрэзу перад Калядамі зладзіў Беларускі дзіцячы фонд, ініцыятыву дапамогі адораным дзецям падтрымліваюць кампанія Mastercard і ААТ “БПС-Сбербанк”. А каб не так хваляваліся госці, на адной сцэне з імі выступалі й старэйшыя музыканты, выканаўцы: выпускніца Венскай кансерваторыі, лаўрэатка міжнародных конкурсаў, скрыпачка й спявачка Юлія Лебядзенка, выкладчыца Акадэміі музыкі, канцэртмайстар, лаўрэат беларускіх і міжнароднага конкурсаў Святлана Стэфаненка, кіраўнік духоўнага фестывалю “Добровест”, кампазітар, паэт і выканаўца Вячаслаў Бабкоў, вакалістка, старшая выкладчыца Мінскага духоўнага вучылішча Вольга Канашэнка. Вяла ж канцэрт артыстка Марына Грыцук.

Таленавітым дзецям выступіць у Мінску — яшчэ адзін стымул для творчага росту. Як вядома, сэрцы ў іх чуллівыя, а жыццёвыя абставіны гэтых юных артыстаў вымагаюць ад іх яшчэ і ўмення пераадольваць немалыя цяжкасці. Ды, як кажуць мудрыя, няхай дабраслаўлёныя будуць усе тыя цяжкасці: бо дзякуючы ім, у пераадоленні саміх сябе ў тым ліку, і развіваемся мы ў гэтым свеце. Асвойваем інструмент цела — каб пры ягонай дапамозе падрастала, большала душа. Падтрымка ж, падказка дасведчаных майстроў на гэтым шляху вельмі патрэбная. “Скажам, Юлія Лебядзенка нават звазіла юную мінчанку Мар’яну Бабіч у Вену на музычны форум, і напярэдадні гала-канцэрта з ёй папрацавала, — удакладніла Юлія Капцэвіч, каардынатар праектаў БДФ. — Яны дуэтам спявалі “Авэ Марыя” Дж. Качыні, канцэртмайстрам была Святлана Стэфаненка. Выступаць з прафесіяналамі — важны крок на шляху ў творчасць для Мар’яны”. І навагоднія падарункі для ўсіх удзельнікаў гала-канцэрта яго арганізатары падрыхтавалі. Ад іх жа ўладальнікі Гран-пры й першых месцаў конкурсу атрымалі яшчэ імянныя стыпендыі. Сюрпрызы-падарункі для юных артыстак падрыхтавала кампанія Cosmіco. А прадоўжылася перадкаляднае свята экскурсіяй у Музей займальных навук “Экспириментус”.

Конкурс “Музыка дзіцячай душы” — толькі частка дабрачыннай праграмы “Юныя таленты”. Беларускі дзіцячы фонд вялікую ўвагу надае таленавітым дзецям з ліку сірот, дзяцей, якія засталіся без апекі бацькоў, дзяцей з інваліднасцю. Дапамагае ім, даючы адукацыйную падтрымку, ладзячы канцэрты, выставы, конкурсы. Набываюцца музінструменты, абсталяванне, прылады, канцэртныя касцюмы, праводзяцца творчыя семінары, уручаюцца стыпендыі. У атмасферы такой дабрыні таленты, заўважана, лепш растуць і развіваюцца. Сумеснымі намаганнямі БДФ, прадстаўніцтва Mastercard у Беларусі ды ААТ “БПС-Сбербанк” летась праведзены Усебеларускі мастацкі конкурс “Свет маімі вачыма” й выстава ў Нацыянальным гістарычным музеі, фотавыстава “Пачатак дзвюх дарог” ды конкурс і канцэрт “Музыка дзіцячай душы”. “Сярод дзяцей-сірот, дзяцей з інваліднасцю ёсць надзвычай таленавітыя хлопчыкі й дзяўчынкі, — адзначае Юлія Капцэвіч. — Бывае ў свеце, што для кагосьці сцэна — гэта проста багатая забаўка. Для іх жа творчасць прыадкрывае дарогу ў вялікі свет, дапамагае адладжваць зносіны з аднагодкамі, аднадумцамі. Прыродныя здольнасці, плюс характар, працавітасць, вера ў свае сілы — усё гэта разам, бывае, творыць цуды. Дзеці “прарываюцца” ў новую жыццёвую рэальнасць, жывуць поўным, насычаным яркімі падзеямі жыццём”.

Іван Іванаў

Нумар у фармаце PDF

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.