У цэнтры Гомеля адну з галоўных вуліц пешаходы цяпер змогуць перасякаць нязвыклым спосабам. У абласным цэнтры з'явіўся дыяганальны пешаходны пераход. Гэта першы падобны вопыт у рэгіёне.
Ініцыявала новаўвядзенне ўпраўленне ДАІ Гомельскага аблвыканкама. Яго супрацоўнікі загадзя апавясцілі гамяльчан пра абмежаванне руху на гэтым участку, а дарожныя службы нанеслі адпаведную разметку напрамкаў для пешаходаў.
Дзве «зебры» па дыяганалі звязалі скрыжаванне вуліц Савецкай, Камунараў і Ланге. Цяпер перайсці праезную частку з аднаго боку на другі стане нязвыкла, але значна хутчэй. Тут дадаткова ўсталявалі чатыры святлафоры для пешаходаў. Для бяспекі ўдзельнікаў дарожнага руху яны будуць працаваць 24/7.
Асноўны плюс новаўвядзення — падобная арганізацыя патоку транспарту і грамадзян, што перасякаюць ажыўленае скрыжаванне, знізіць колькасць ДТЗ з удзелам пешаходаў, адзначылі ў ДАІ Гомельскай вобласці.
Падобныя эксперыментальныя пешаходныя пераходы могуць хутка з'явіцца і на іншых вуліцах з інтэнсіўнымі транспартнымі патокамі. Прычым дыяганальныя «зебры» актуальныя не толькі для Гомеля, але і для райцэнтраў рэгіёна.
Што датычыцца самай доўгай вуліцы Гомеля — Савецкай, то многія гараджане чакалі змен у арганізацыі руху на гэтым маршруце яшчэ пасля рэзананснай трагедыі, якая здарылася летась у кастрычніку. Нагадаем, тады 21-гадовы кіроўца BMW 740 на велізарнай хуткасці выехаў на тратуар, урэзаўся ў слуп і здзейсніў наезд на трох жанчын-пешаходаў. Адна з іх загінула, другая атрымала цяжкія цялесныя ашкоджанні, трэцяя перажыла моцны шок. Цяпер па Савецкай можна рухацца з хуткасцю да 50 кіламетраў ў гадзіну.
Наталля НЕВЯРОЎСКАЯ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
