Насуперак доўгім зімовым вечарам

Вольга Багдановіч з тых, хто з лёгкасцю можа змяніць прафесію. Кухар са сталічнага рэгіёна, прыехаўшы за мужам у самы паўночна-заходні раён Гродзеншчыны, яна перайшла працаваць у бібліятэку. У аграгарадку Міхалішкі Астравецкага раёна, дзе жыве з сям’ёй, артыстычная, рухавая, з вострым розумам маладая жанчына вось ужо 4 гады выдатна спраўляецца з абавязкамі сельскага бібліятэкара.

Вызначыўшы для сябе асноўныя напрамкі работы, Вольга Багдановіч пачала сваю дзейнасць з таго, што выбрала партнёраў — супрацоўнікаў сельскага Савета і адміністрацыі сельскагаспадарчага прадпрыемства, мясцовага Дома культуры, школы, лясніцтва і бальніцы. Зыходзячы з гэтага і ладзяцца масавыя мерапрыемствы, кніжныя выстаўкі і агляды творчасці...

За кароткі тэрмін Вольга Аляксандраўна арганізавала сярод пастаянных карыстальнікаў групу прыхільнікаў літаратуры. У зоне яе абслугоўвання  — 9 населеных пунктаў, у якіх пражывае каля 1000 чалавек. Крыху менш за палову з іх з’яўляюцца чытачамі бібліятэкі. Для кожнага ў гэтым кніжным аазісе знаходзіцца зацішнае месца. 14-тысячны фонд разнастайнай літаратуры маляўніча размясціўся ў абноўленым памяшканні. Тут знаходзяць адказы на шматлікія пытанні маленькія дзеткі, тут падбяруць патрэбную літаратуру або інфармацыю з інтэрнэту дапытлівыя старшакласнікі і маладыя мамы, няспешна перабіраюць часопісы па інтарэсах мужчыны, а жанчыны заўсёды знойдуць суцяшэнне ў сваіх любімых жаночых раманах. Новыя стэлажы, якія набыты год таму, і новы інтер’ер спрыяюць супакаенню і разняволенню. Вольга падыходзіць да чытача толькі тады, калі гэта сапраўды неабходна. Яна дае магчымасць наведвальнікам самім падбіраць літаратуру, тым больш што многія з іх частыя госці: штогод бібліятэку наведваюць каля 4000 раз, гэта ў сярэднім амаль па 9 разоў на кожнага чытача.

Бібліятэкар стараецца ісці ў нагу з часам. Сучасныя тэхналогіі ў бібліятэчнай справе даюць прастору для творчасці. Выкарыстоўваюцца буктрэйлеры кніг як вядомых аўтараў, так і мясцовых, ствараюцца ўласныя электронныя рэсурсы на базе краязнаўчых матэрыялаў, электронныя кніжныя выстаўкі, відэапрэзентацыі...

— Дзеці — мае самыя актыўныя чытачы. Але яны вельмі не любяць слухаць бібліятэкара на мерапрыемствах, — дзеліцца назіраннямі Вольга. — Імкнуся мяняць стыль зносін, непрыкметна ўцягваю іх у размову, абмеркаванне, дыскусію. Яны хочуць, каб іх чулі, і я даю ім такую магчымасць. Часта ладзім фізкультхвілінкі, каб не сумавалі.

Добрая практыка працы ў Вольгі і ў мясцовай бальніцы, дзе знаходзяцца ў асноўным пажылыя людзі на кругласутачным сястрынскім доглядзе. Штомесяц, а то і часцей бібліятэкар наведвае іх з кнігамі і часопісамі.

— Хворым, адзінокім людзям вельмі не хапае цяпла, чалавечых зносін, і тыя, хто па стане здароўя могуць сабе дазволіць чытанне, вельмі чакаюць майго прыходу, — распавядае Вольга. — Лёсы кніжных герояў прымушаюць іх на час адысці ад рэальнасці, дапамагаюць перажыць доўгія дэпрэсіўныя зімовыя вечары. Заўсёды імкнуся падабраць адпаведную літаратуру, пагутарыць, і яны з удзячнасцю і надзеяй чакаюць мяне зноў і зноў.

У Вольгі Аляксандраўны шмат працы. Акрамя масавых мерапрыемстваў і падрыхтоўкі да іх, трэба пісьменна і своечасова весці дзелавую дакументацыю, абслужыць кожнага наведвальніка, прыняць і апрацаваць перыядычныя выданні, уліць і выдаліць бібліяграфічныя карткі ў папяровыя каталогі і картатэкі, сачыць за станам друкаваных выданняў, рамантаваць іх ці замяніць новымі. Сёння для бібліятэкара і чытача ёсць пэўная палёгка — шмат даступнай і цікавай інфармацыі ў інтэрнэце. Спрашчае працу спецыяліста і электронны каталог, з дапамогай якога можна аператыўна знайсці патрэбную кнігу ці артыкул і хутчэй абслужыць чытача. У Міхалішкаўскай сельскай бібліятэцы вось ужо шмат гадоў працуе Публічны цэнтр прававой інфармацыі, з дапамогай якога можна хутка і эфектыўна знайсці патрэбны заканадаўчы дакумент.

— Работы шмат, але тым яна і цікавейшая, — дзеліцца Вольга. — Іду на працу і лаўлю сябе на думцы, што там мая аддушына ад бытавых будняў, там маё жыццё і, мабыць, лёс.

Галіна ФРАНЦКЕВІЧ, метадыст аддзела бібліятэчнага маркетынгу Астравецкай раённай бібліятэкі