Вы тут

Традыцыі, закладзеныя паміж Беларуссю і Узбекістанам, працягнуць развівацца


У Савеце Рэспублікі прайшла сустрэча спікера верхняй палаты парламента Наталлі Качанавай з Надзвычайным і Паўнамоцным Паслом Узбекістана ў Рэспубліцы Беларусь Насірджанам Юсупавым.


Фота Белта.

Вітаючы госця, старшыня Савета Рэспублікі адзначыла, што ва ўзаемаадносінах паміж нашымі краінамі склаліся даўнія і добрыя сувязі. «Беларусь заўсёды разглядала Узбекістан як ключавога, стратэгічнага партнёра ў Цэнтральнай Азіі. Нашы міжпарламенцкія і міжурадавыя адносіны выйшлі абсалютна на новы ўзровень пасля візітаў кіраўнікоў нашых дзяржаў у 2018 годзе і ў 2019 годзе. За гэтыя два гады зроблена шмат — больш, чым за папярэдняе дзесяцігоддзе», — адзначыла Наталля Качанава.

Пасля леташняга візіту Прэзідэнта Узбекістана Шаўката Мірзіёева ў Беларусь план мерапрыемстваў, зацверджаны прэм'ер-міністрамі дзвюх краін, актуалізаваны, і сёння 30 % запланаваных мерапрыемстваў супрацоўніцтва выкананы, канстатавала спікер верхняй палаты парламента. Аснову партнёрства складаюць гандлёва-эканамічныя адносіны, якія дэманструюць станоўчую дынаміку.

Так, паводле звестак за студзень—лістапад 2019-га, аб'ём тавараабароту паміж нашымі краінамі склаў больш за 213 мільёнаў долараў і павялічыўся амаль на 50 % да ўзроўню адпаведнага перыяду 2018-га (рост паказалі як імпарт, так і экспарт, да таго ж сальда знешняга гандлю склалася са знакам плюс у памеры 124 мільёны долараў).

— Мы бачым, як павялічыліся лічбы нашых гандлёвых адносін, — звярнула ўвагу спікер верхняй палаты парламента і выказала ўпэўненасць у тым, што ўзаемавыгадныя адносіны будуць працягнуты і надалей.

Дарэчы, ва Узбекістане зарэгістравана 50 арганізацый, заснавальнікамі якіх з'яўляюцца юрыдычныя і фізічныя асобы Рэспублікі Беларусь. У сваю чаргу, у нашай краіне створана 61 арганізацыя, заснавальнікамі якіх выступаюць узбекскія юрыдычныя і фізічныя асобы.

Развіццю двухбаковых адносін спрыяюць і міжпарламенцкія стасункі. Так, летась на першым Форуме рэгіёнаў Беларусі і Узбекістана з ініцыятывы тагачасных кіраўнікоў верхніх палат парламентаў абедзвюх краін быў падпісаны адпаведны мемарандум. Практыка паказала, што такая форма супрацоўніцтва выклікае ўзаемную цікавасць, асабліва гэта датычыцца прамысловай кааперацыі.

— Для нас вельмі важныя перспектывы па стварэнні сумесных вытворчасцяў і прадпрыемстваў, — адзначыла Наталля Качанава.

Трэба сказаць, што ў 2017-м на тэрыторыі Узбекістана з'явіліся дзве зборачныя вытворчасці беларускай тэхнікі з удзелам беларускага капіталу (у ліку сузаснавальнікаў — акцыянерныя таварыствы «Амкадор» і «Бабруйскаграмаш»). Цяпер вядзецца работа над стварэннем зборачнай вытворчасці спецтэхнікі ААТ «МАЗ». Што датычыцца сумесных праектаў, то ажыццяўляецца кааперацыйнае супрацоўніцтва МАЗа з Ташкенцкім заводам сельскагаспадарчай тэхнікі ў кірунку вытворчасці трактароў. А акцыянернае таварыства «Здравушка-мілк» летась стварыла сумеснае прадпрыемства, у межах якога плануецца пабудаваць завод па перапрацоўцы малака і малочнатаварны комплекс.

І гэта першыя крокі. Узбекскі бок зацікаўлены ў тым, каб на яго харчовым рынку з'яўлялася больш прадпрыемстваў з Беларусі. Аб гэтым у размове з журналістамі паведаміў пасол Узбекістана ў нашай краіне Насірджан Юсупаў.

Дыпламат праінфармаваў, што ў Ташкенце запланавана правядзенне вялікага аграрнага форуму, на які арганізатары запрасілі шэраг беларускіх прадпрыемстваў з прадукцыяй і прапановамі па асваенні ўзбекскага рынка.

Наталля Качанава выказала ўпэўненасць, што са зменамі, якія адбыліся, будуць працягнуты  славутыя і добрыя традыцыі, закладзеныя папярэднікамі — кіраўнікамі палат мінулага склікання.

Нагадаем, што ў снежні 2019-га ва Узбекістане адбыліся выбары ў ніжнюю палату парламента, напярэдадні было абрана кіраўніцтва і створаны камітэты верхняй палаты. Урад згодна з Канстытуцыяй краіны падаў у адстаўку. Парламенцкія выбары летась прайшлі і ў Беларусі.

— Канешне, будзем працаваць над тым, каб гэтыя адносіны ўмацоўваліся і знаходзілі свой працяг літаральна па ўсіх кірунках, — адзначыла спікер верхняй палаты беларускага парламента, акцэнтаваўшы напрыканцы сустрэчы ўвагу на тым, што сяброўскія адносіны паміж народамі, парламентарыямі, урадамі нашых краін будуць выбудоўвацца надалей і знаходзіць усё больш пунктаў судакранання, якія дазволяць паспяхова развівацца і Узбекістану, і Беларусі.

Вольга АНУФРЫЕВА

Загаловак у газеце: Пункты судакранання

Выбар рэдакцыі

Культура

Дзяніс Раманюк: Я раблю этнаграфію «дваццаць пятым» кадрам

Дзяніс Раманюк: Я раблю этнаграфію «дваццаць пятым» кадрам

Пышныя альбомы, выдадзеныя Дзянісам Раманюком, з задавальненнем трымаюць у хатніх бібліятэках як беларусы, бо адчуваюць гонар за краіну, так і замежнікі, бо невядомую культуру даследуюць праз высакакласны кніжны твор.

Грамадства

Санны рэйд. Як партызаны здзейснілі пераможную аперацыю на Палессі ў 1942-м

Санны рэйд. Як партызаны здзейснілі пераможную аперацыю на Палессі ў 1942-м

Сёлетняя зіма на снег, скажам прама, зусім небагатая. Але ў лютым і сакавіку 1942 года, калі пра глабальнае пацяпленне ніхто і не чуў, снегу было вельмі шмат.

Спорт

Барэц Максім Нягода: Пасля кожнага медаля трэба пачынаць з нуля

Барэц Максім Нягода: Пасля кожнага медаля трэба пачынаць з нуля

Барысаўчанін са шматдзетнай сям'і стаў чэмпіёнам кантынента.

Культура

Хто спявае па-беларуску?

Хто спявае па-беларуску?

Адмысловы плэйліст “Звязды” да Дня роднай мовы.