Вы тут

Што адбылося за тыдзень у Савеце Рэспублікі


Памяць аб мінулым гарантуе будучыню

Віцэ-спікер Савета Рэспублікі Анатоль Ісачанка ўзяў удзел у памятных мерапрыемствах, прымеркаваных да 75-годдзя вызвалення лагера смерці «Аўшвіц—Біркенау» ў Асвенцыме, а таксама абмеркаваў з польскімі калегамі пашырэнне міжпарламенцкага ўзаемадзеяння, паведамляе прэс-служба верхняй палаты парламента.


Анатоль Ісачанка ўзначаліў беларускую дэлегацыю, у склад якой увайшлі таксама Надзвычайны і Паўнамоцны Пасол Беларусі ў Рэспубліцы Польшча Уладзімір Чушаў, настаяцель храма-помніка Усіх Святых протаіерэй Фёдар Поўны.

Каля манумента вязням лагера смерці ў Асвенцыме адбылася цырымонія запальвання свечак. Анатоль Ісачанка размясціў памятную лампаду каля пліты абеліска «Беларуская».

На мерапрыемствах прысутнічалі дэлегацыі з 60 краін і міжнародных арганізацый. У якасці ганаровых гасцей сюды прыехалі каля 200 былых вязняў «Аўшвіц—Біркенау» з усяго свету, у тым ліку 13 з Беларусі. З імі пагутарыла беларуская дэлегацыя.

Таксама адбыліся сустрэчы з кіраўнікамі дэлегацый Расіі, Казахстана, Арменіі, Грузіі.

У гэты ж дзень Анатоль Ісачанка ўзяў удзел ва ўрачыстай перадачы капсулы з зямлёй Асвенцыма кіраўніком горада Янушам Хверутам настаяцелю храма-помніка Усіх Святых протаіерэю Фёдару Поўнаму. Гэтая капсула будзе размешчана ў крыпце храма ў рамках міжнароднай акцыі памяці «У гонар агульнай Перамогі!»

Акрамя таго, у межах візіту прайшлі перагаворы беларускай дэлегацыі з адміністрацыяй Дзяржаўнага музея «Аўшвіц—Біркенау» наконт супрацоўніцтва з мемарыяльным комплексам «Трасцянец» і іншымі музейнымі ўстановамі Беларусі.

Як адзначыў Анатоль Ісачанка ў інтэрв'ю журналістам, Асвенцым — гэта знакавае месца для ўсіх людзей. «Канцлагер «Аўшвіц—Біркенау» — напамін усім жывым пра тое, што мы павінны зрабіць усё магчымае, каб тыя бяда і гора, якія тут адбыліся, ніколі больш не здараліся», — падкрэсліў ён.

* * *

Віцэ-спікер Савета Рэспублікі правёў серыю сустрэч у парламенце Польшчы

Анатоль Ісачанка абмеркаваў перспектывы пашырэння беларуска-польскага міжпарламенцкага ўзаемадзеяння з віцэ-маршалам Сената Польшчы Габрыэлай Мараўска-Станецкай.

У гэты ж дзень адбылася сустрэча намесніка старшыні Савета Рэспублікі з віцэ-маршалам Сейма Польшчы Рышардам Цярлецкім, на якой разглядаліся магчымасці актывізацыі дыялогу дзвюх краін у розных сферах. Асаблівая ўвага была звернута на дзейнасць беларуска-польскай міжпарламенцкай групы.

* * *

... і наведаў Падляскае і Сілезскае ваяводствы

Падчас сустрэчы з падляскім ваяводам Багданам Пашкоўскім і маршалам Падляскага ваяводства Артурам Касіцкім Анатоль Ісачанка абмеркаваў пытанні ўзаемадзеяння на рэгіянальным узроўні. Размова пайшла пра развіццё трансгранічнага супрацоўніцтва дзвюх краін. З улікам таго, што Падляскае ваяводства з'яўляецца месцам кампактнага пражывання беларускай нацыянальнай меншасці (каля 38 тысяч чалавек), былі разгледжаны магчымасці падтрымкі беларускай культуры і мовы ў гэтым рэгіёне.

У рамках праграмы візіту намеснік старшыні Савета Рэспублікі наведаў вёску Заляшаны Падляскага ваяводства, дзе ўсклаў вянок да помніка беларусам, забітым атрадам Райса («Бурага») у 1946 годзе. У горадзе Гайнаўка Падляскага ваяводства Анатоль Ісачанка ўсклаў кветкі да помніка-абеліска савецкім салдатам, наведаў Музей і Цэнтр беларускай культуры. Акрамя таго, віцэ-спікер узяў удзел у цырымоніі збору зямлі для яе далейшага размяшчэння ў крыпце храма-помніка Усіх Святых у рамках Міжнароднай акцыі памяці «У гонар агульнай Перамогі!».

У Сілезскім ваяводстве Анатоль Ісачанка абмеркаваў з Ганаровым консулам Рэспублікі Беларусь у Катавіцэ Марэкам Расіньскім і прадстаўнікамі мясцовых бізнес-колаў шляхі нарошчвання міжрэгіянальнага супрацоўніцтва дзвюх краін у гандлёва-эканамічнай сферы.

Прэв'ю: sovrep.gov.by

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.