Вы тут

Уладзімір Каранік: Прашу аднесціся спакойна


У Беларусі медыкі праводзяць трэніроўкі і іншыя мерапрыемствы, каб прадухіліць пранікненне і распаўсюджванне каранавіруса.

Каранавіруса ў Беларусі пакуль няма, і робіцца ўсё магчымае, каб не дапусціць яго пранікнення і распаўсюджвання. Пяць беларусаў, якія разам з грамадзянамі Казахстана былі ў нядзелю эвакуіраваны з кітайскай правінцыі Ухань, размешчаны ў шпіталі ў Нур-Султане і будуць знаходзіцца там на працягу ўсяго каранціннага перыяду. Пра гэта расказаў падчас адкрыцця мікрабіялагічнай лабараторыі пры раённым цэнтры гігіены і эпідэміялогіі ў Шклове міністр аховы здароўя Беларусі Уладзімір КАРАНІК.


— Мы працуем на прадухіленне і прафілактыку. Першае — гэта прафілактыка завозаў каранавіруса ў краіну. Другое — прафілактыка яго шырокага распаўсюджвання. Ва ўмовах сённяшняй глабалізацыі мы не можам гарантаваць, што вірус не пранікне на нашу тэрыторыю. Наша задача — лакалізаваць і не дапусціць яго распаўсюджвання ў краіне. Вірусам заразіцца не так проста, і, мяркую, тыя мерапрыемствы, якія цяпер праводзяцца, дазволяць пазбегнуць яго пашырэння, — адзначыў Уладзімір Каранік.

Міністр нагадаў, што кантроль наладжаны ў аэрапорце і на аўтамабільным транспарце. Пільна правяраюцца пасажыры, якія прыбываюць прамымі авіяцыйнымі рэйсамі з Кітая. Нават людзей без прыкмет рэспіраторнай інфекцыі абследуюць у лабараторных умовах — у іх бяруць мазкі са слізістай. Тых, хто прыязджае аўтамабільным транспартам, абследуюць з дапамогай цеплавізараў. Апроч гэтага, цяпер медыцынскія работнікі адпрацоўваюць розныя сітуацыі, якія могуць узнікнуць пры завозе віруса.

— Праводзяцца трэніроўкі медперсаналу з адпрацоўкай дзеянняў у выпадку выяўлення пацыентаў з падазрэннем на каранавірус. Калі чалавек, які быў у КНР, звяртаецца ў прыёмны пакой ці выклікае «хуткую», павінен быць праведзены ўвесь комплекс мерапрыемстваў па дастаўцы ў спецыялізаваную медустанову, ізаляцыі, заборы біяматэрыялу, наступнай санапрацоўцы транспарту і месцаў, куды ён звяртаўся, а таксама спецадзення медперсаналу. Прашу аднесціся спакойна да такіх трэніровак: гэта планавая работа, — падкрэсліў Уладзімір Каранік.

На момант успышкі каранавіруса ў кітайскай правінцыі Ухань знаходзілася 12 беларускіх грамадзян. З васьмю з іх удалося ўстанавіць кантакт, пяцёра выказалі намер эвакуіравацца на радзіму.

— Мы звязаліся з адпаведнымі службамі Расіі і Казахстана. Абодва бакі пацвердзілі гатоўнасць забяспечыць падчас эвакуацыі сваіх грамадзян месцы на самалёце і для беларусаў. Першым прыляцеў борт Казахстана. На ім прыбылі і пяцёра нашых грамадзян. Усе яны былі змешчаны на каранцін у шпіталі Нур-Султана. На сёння ніхто з іх не мае прыкмет хваробы, іх стан не выклікае асцярог, праводзіцца лабараторны кантроль і ўсе неабходныя абследаванні. Па завяршэнні каранціну будзе прынята рашэнне аб адпраўцы іх у Беларусь. Расія плануе эвакуіраваць сваіх грамадзян у найбліжэйшыя дні. Калі беларусы, якія плануюць пакінуць Ухань ці іншыя рэгіёны, дзе праводзіцца эвакуацыя, пажадаюць выехаць, ім будзе дадзена месца на расійскім борце, — заявіў міністр.

Па звестках, на раніцу 2 лютага, 361 чалавек загінуў з-за выкліканай каранавірусам пнеўманіі ў Кітаі, 475 пацыентаў удалося вылечыць і выпісаць з бальніцы. Колькасць тых, хто захварэў, перавышае 17 тысяч. На выхадных стала вядома пра першую ахвяру віруса за межамі Кітая — на Філіпінах памёр 44-гадовы пацыент.

Алена КРАВЕЦ

Выбар рэдакцыі

Грамадства

У Беларусі дыягнаставаны 861 выпадак каранавіруса

У Беларусі дыягнаставаны 861 выпадак каранавіруса

31 знаходзіцца на штучнай вентыляцыі лёгкіх.

Грамадства

Прыехаць за 30 хвiлiн. Як у аварыйных выпадках павiнны рэагаваць камунальнiкi

Прыехаць за 30 хвiлiн. Як у аварыйных выпадках павiнны рэагаваць камунальнiкi

У Беларусi дзейнiчае такi дакумент, як «Тэхнiчная эксплуатацыя жыллёвых i грамадскiх будынкаў i збудаванняў. Парадак правядзення».

Грамадства

Як у магiлёўскiх хлопчыкаў i дзяўчынак фармiруюць асновы крэатыўнага мыслення

Як у магiлёўскiх хлопчыкаў i дзяўчынак фармiруюць асновы крэатыўнага мыслення

Школа «Альфа+» iснуе ў Магiлёве ўсяго год, але ў яе ўжо ёсць пастаянныя наведвальнiкi.

Палітыка

«Рэальнае жыццё нi ў якi нават самы дасканалы закон не ўмесцiш». Як дзейнічае Вярхоўны суд?

«Рэальнае жыццё нi ў якi нават самы дасканалы закон не ўмесцiш». Як дзейнічае Вярхоўны суд?

Пра першы год жыцця Вярхоўнага суда ў новым будынку — Валерый Калiнковiч.