Вы тут

Заўтра зборная Беларусі па тэнісе ўступае ў барацьбу Кубка Федэрацыі


Нашы дзяўчаты ўжо адправіліся ў Гаагу, дзе 7 і 8 лютага выйдуць на крыты грунтавы корт «Sроrtсаmрus Zuіdеrраrk». У барацьбе за пуцёўку ў фінальны раўнд найбуйнейшага каманднага турніру ў жаночым тэнісе беларускі сустрэнуцца са зборнай Нідэрландаў. Той, хто прайграе, будзе змагацца за права застацца ў элітнай групе Кубка Федэрацыі.


За беларускую каманду ў Нідэрландах выступяць Арына Сабаленка, Аляксандра Сасновіч, Вольга Гаварцова і Лідзія Сямёнава. Капітан беларускай зборнай Таццяна Пучак перад вылетам у Гаагу запэўніла, што яе каманда гатовая да гульні, усе здаровыя і знаходзяцца ў добрай форме. У матчы не зможа прыняць удзел Вікторыя Азаранка, хоць першапачаткова яна і дала згоду на сваю прысутнасць у складзе, але з-за сямейнай сітуацыі спартсменка пакуль не можа пакідаць межы ЗША.

Зборная Нідэрландаў прымае ўдзел у Кубку Федэрацыі з самага першага розыгрышу турніру ў 1963 годзе. На яе рахунку 108 перамог пры 74 паражэннях, 36 сезонаў у Сусветнай групе і два фіналы ў 1968 і 1997 гадах. У пачатку нулявых у камандзе адбылася змена пакаленняў, у выніку чаго зборнай прыйшлося пайсці на паніжэнне і доўгі час выступаць у І групе Еўра-Афрыканскай зоны. Вяртанне ў эліту пачалося з прыходам цяперашняга капітана Пола Хархайса, які ў дадзены момант узначальвае яшчэ і мужчынскую зборную ў Кубку Дэвіса.

У складзе зборнай Нідэрландаў значыцца Кікі Бертэнс, Аранча Рус, Леслі Керхоў, Індзі дэ Фрооме і Дэмі Схюрс.

«Фаварыткамі гэтай сустрэчы я лічу галандак. Яны гуляюць дома і на грунце, хоць я і не назвала б пакрыццё вырашальным фактарам. З іншага боку, у нас ужо ёсць вопыт гульні супраць гэтай каманды, мы іх перамагалі, так што ў выніку шанцы можна дзяліць папалам», — адзначыла Таццяна Пучак.

Зборная Беларусі прымае ўдзел у розыгрышы турніру з 1994 года. За гэты час нашы тэнісісткі правялі 102 міжнародныя паядынкі, атрымаўшы 71 перамогу пры 31 паражэнні. Іх найлепшым вынікам з'яўляецца выхад у фінал у сезоне 2017 года. Матч са зборнай Нідэрландаў адкрые для нас чацвёрты сезон запар у эліце сусветнага тэніса.

Нагадаем, што сёлета падапечныя Таццяны Пучак сталі паўфіналісткамі Кубка Федэрацыі, абыграўшы на выездзе зборную Германіі (4:0), а затым ва ўпартай барацьбе зноў у гасцях саступіўшы саперніцам з Аўстраліі (2:3). На дадзены момант беларуская зборная займае 5-е месца сярод 105 удзельніц Кубка Федэрацыі.

Гісторыя асабістых сустрэч зборных Нідэрландаў і Беларусі налічвае чатыры паядынкі, у якіх тры перамогі дасталіся падданым Каралеўства, а адна, самая апошняя на дадзены момант, засталася за беларускамі. Нагадаем, што ў 2017 годзе менавіта дамашнім матчам з Нідэрландамі мы адкрылі для сябе Сусветную групу.

Фінальная частка спаборніцтваў Кубка Федэрацыі сёлета пройдзе 9—14 красавіка ў Будапешце.

Дар'я ЛАБАЖЭВІЧ

Выбар рэдакцыі

Культура

Мікалай Пінігін: Каб ведаў як, сам напісаў бы класную сучасную п'есу

Мікалай Пінігін: Каб ведаў як, сам напісаў бы класную сучасную п'есу

На рахунку рэжысёра і мастацкага кіраўніка Купалаўскага тэатра Мікалая Пінігіна больш за семдзесят спектакляў, і па некаторыя з іх хоць зараз ідзі на вуліцу Энгельса. 

Грамадства

Расказваем пра тое, як на Брэстчыне раней гатавалі варэнне і як гэта робяць цяпер

Расказваем пра тое, як на Брэстчыне раней гатавалі варэнне і як гэта робяць цяпер

Аказваецца, у нашых вёсках амаль да другой паловы ХХ стагоддзя не мелі звычкі нарыхтоўваць яго, не ведалі, як варыцца.

Спорт

Як у Бабруйску рыхтуюць будучых чэмпіёнаў

Як у Бабруйску рыхтуюць будучых чэмпіёнаў

Менавіта з Бабруйска выйшлі прызёры самых прэстыжных сусветных турніраў па веславанні, барацьбе, боксе, шахматах, лёгкай і цяжкай атлетыцы.