Вы тут

Вясной у Мінску і абласных цэнтрах узнікне серыя арт-інсталяцый


Вясной гэтага года ў Мінску, а таксама Брэсце, Віцебску, Гродне, Гомелі і Магілёве з'явяцца незвычайныя мастацкія інсталяцыі. Гэта будуць наборы інтэрактыўных скульптур, якія разам утвараюць слова «МОВА». У Міжнародны дзень роднай мовы, 21 лютага, адзін з мабільных аператараў прадставіў новы праект у межах ініцыятывы «Веліч роднай мовы».


Фота: citydog.by

Манументальныя тэкставыя інсталяцыі стануць месцамі камфортнага адпачынку, бо фактычна ўяўляюць сабой вулічную мэблю, вырабленую з дрэва і металу. Аўтар арт-аб'ектаў — вядомы беларускі скульптар Павел Вайніцкі. Па яго задуме, «МОВА» служыць месцам камунікацыі, дзе людзі могуць сустракацца і зручна размяшчацца на скульптурных літарах.

Лакальныя асаблівасці кожнага з шасці рэгіёнаў будуць паказаныя праз колер інсталяцый — ідэя праекта базіруецца на канцэпцыі нацыянальных колеравых пераваг, распрацаванай выдатным дызайнерам, мастаком і паэтам Міхаілам Анемпадыставым у кнізе «Колер Беларусі», а таксама на даследаваннях найбуйнейшага беларускага тнографа Міхаіла Раманюка, які рэканструяваў колеры традыцыйных народных строяў озных рэгіёнаў Беларусі.

Паколькі Мінск — геаграфічны, сацыяльны і культурны цэнтр краіны, дзе перамяшаныя асаблівасці ўсіх рэгіёнаў, гэта будзе адлюстравана з дапамогай усіх асноўных колераў, якія характарызуюць нашу краіну, — сіняга, зялёнага, жоўтага, чырвонага і чорнага. Месца размяшчэння інсталяцыі ў сталіцы яшчэ ўдакладняецца.

— Чорны і чырвоны — базавыя колеры кожнага з арт-аб'ектаў, і яны будуць выкарыстаныя ва ўсіх гарадах. Астатнія адценні абсалютна розныя — яны падкрэсліваюць адметнасці кожнага рэгіёна. Усе колеры выбраны невыпадкова — пры распрацоўцы іх спалучэнняў улічвалася мноства ўнікальных мясцовых асаблівасцяў — напрыклад, прыродных: зеляніна паркаў Гомельшчыны, шэрань Палескіх балот, блакіт азёр Віцебшчыны, — патлумачыў Павел Вайніцкі.

Такім чынам, для інсталяцыі ў Брэсце выбрана спалучэнне зялёнага, розных адценняў сіняга, чырвонага і чорнага. Там яна будзе ўсталявана на перасячэнні вуліцы Савецкай і набярэжнай Францыска Скарыны. «МОВА» ў Віцебску, выкананая ў характэрных колерах творчага аб'яднання УНОВИС, з'явіцца перад мостам 1000-годдзя. Арт-аб'екты ў Гродне будуць жоўтага, розных адценняў сіняга, чырвонага і чорнага колераў — іх плануецца размясціць на Савецкай плошчы. На вуліцы Кірава ў Гомелі ўсталююць кампазіцыю з блакітнай, жоўтай, шэрай, чырвонай і чорнай літар. На Траецкай набярэжнай Магілёва — зялёнай, блакітнай, жоўтай, чырвонай і чорнай.

— Праект закліканы папулярызаваць родную мову, па-новаму раскрыць семантыку беларускага слова з дапамогай арт-аб'ектаў. Яго ўнікальнасць — у спалучэнні з утылітарнай і мастацкай функцыямі трохмерных інсталяцый. Асобна варта адзначыць вялікі турыстычны патэнцыял праекта для ўсіх гарадоў, дзе кампазіцыі будуць усталяваны, — адзначыў ініцыятар праекта «Веліч роднай мовы» Захар Дудзінскі.

Ва ўсіх гарадах арт-аб'екты з'явяцца вясной.

Алена КРАВЕЦ

Загаловак у газеце: «МОВА» беларускіх гарадоў

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».