Вы тут

«Міліцыянер — гэта юрыст са знакам якасці»


Вядучая навучальная ўстанова ў Беларусі, дзе рыхтуюць будучых міліцыянераў, — гэта Акадэмія МУС. Да старту чарговай уступнай кампаніі засталося не так і шмат. А пытанняў у будучых абітурыентаў і іх бацькоў, як заўжды, хапае. Таму на адмысловай прэс-канферэнцыі ў Доме прэсы прадстаўнікі Акадэміі крыху прыадкрылі завесу таямніцы над навучальным працэсам.


— Калі параўноўваць курсантаў Акадэміі з іншымі кандыдатамі, якія прыходзяць на службу ў органы ўнутраных спраў з грамадзянскіх ВНУ, то нашы курсанты на галаву вышэйшыя ў практычных ведах, — зазначыў начальнік Цэнтральнага РУУС Мінска палкоўнік міліцыі Артур Шахлай, які 21 год таму сам скончыў гэтую навучальную ўстанову. — З цягам часу, вядома, і выпускнікі грамадзянскіх вузаў падцягваюцца і набіраюць досвед, але ў іх ужо няма такой форы па часе. Справа ў тым, што выпускнік Акадэміі МУС — гэта ўжо гатовы супрацоўнік органаў унутраных спраў, які ведае, што такое нарматыўна-прававы акт, які рэгламентуе праваахоўную дзейнасць, ведае, які кодэкс трэба разгарнуць у той ці іншай сітуацыі. Перавага выпускнікоў Акадэміі з улікам дысцыплін, практыкі, стажыроўкі, якую тыя праходзяць, у тым, што яны падрыхтаваны да стасункаў са злачынцамі, з асобамі, якія стаяць на ўліку. Таму ў нашым РУУС большасць асабістага саставу або ўжо мае дыплом Акадэміі, або цяпер вучыцца ў ёй завочна.

У сваю чаргу, першы намеснік начальніка Акадэміі МУС палкоўнік міліцыі Аляксей Башан абазначыў, што дзве галоўныя апоры падрыхтоўкі, — гэта самі веды і адукацыя. Ён праінфармаваў, што цяпер у навучальнай установы шэсць заказчыкаў. Юрыдычныя кадры рыхтуюцца не толькі непасрэдна для Міністэрства ўнутраных спраў, але і Следчага камітэта, Дзяржаўнага камітэта судовых экспертыз, Дэпартамента фінансавых расследаванняў Камітэта дзяржаўнага кантролю, Дзяржаўнага пагранічнага камітэта і Міністэрства абароны.

— Усе нашы навучальныя праграмы ўзгадняюцца з ведамствамі, у інтарэсах якога навучаецца курсант. Справа ў тым, што ў нас выбіраюць не проста адукацыю, а будучую прафесію. Яшчэ на этапе падачы заявы мы цікавімся, кім будзе працаваць абітурыент — участковым, у крымінальным вышуку, наркакантролі, аддзеле па барацьбе з эканамічнымі злачынствамі, супрацоўнікам ДАІ, у Дэпартаменце выканання пакаранняў... Завядзёнкі, што спачатку выпускнікі атрымліваюць дыплом, а пасля думаюць, куды з ім працаўладкавацца, у нас няма. Мы даем класічную адукацыю і інструмент, як яе выкарыстоўваць. Часам кажуць, што ў нас рыхтуюць спецыялістаў па вузкім профілі, а не юрыстаў. Але, як па мне, міліцыянер — гэта юрыст са знакам якасці. Вось уявіце сабе сітуацыю. Хтосьці звярнуўся па юрыдычную дапамогу да юрыста. Ён кажа — так, заканадаўства парушана і трэба звяртацца ў праваахоўныя органы. І ў справу ўступае хто? Міліцыянер. Таму і патрабаванні да ведаў і ўменняў у нашых выпускнікоў вельмі высокія.

З мінулага года ў Акадэміі МУС пачалі рыхтаваць спецыялістаў, якім трэба будзе раскрываць злачынствы ў кіберпрасторы. Пра тое, як гэта адбываецца, распавёў начальнік кафедры аператыўна-вышуковай дзейнасці факультэта міліцыі Акадэміі МУС палкоўнік міліцыі Аляксей Тукала.

— Мы сочым за тэндэнцыямі, якія адбываюцца ў крымінальным асяроддзі. Напрыклад, той жа збыт наркатычных сродкаў цяпер амаль цалкам сышоў у інтэрнэт. На нашы заняткі запрашаліся прадстаўнікі Парка высокіх тэхналогій і Нацыянальнага банка. Яны комплексна распавядалі пра тое, як у інтэрнэце ідуць грашовыя патокі. Курсанты, якія атрымлівалі веды па супрацьдзеянні злачынствам у віртуальным асяродку, цяпер знаходзяцца на пераддыпломнай практыцы.

Добра наладжана ў Акадэміі МУС і зваротная сувязь. Працуе гэта наступным чынам. Пасля пераддыпломнай практыкі куратар аддае ў навучальную ўстанову падрабязную справаздачу пра поспехі курсанта і яго правераныя веды. Пры неабходнасці навучальны працэс можа быць падкарэктаваны. Фідбэк ажыццяўляецца і пасля заканчэння Акадэміі. Пра гэта распавёў начальнік следча-экспертнага факультэта палкоўнік міліцыі Алег Ражко.

— З першага курса нашы навучэнцы пагружаюцца ў практычную дзейнасць. Выбудавана сістэма практык, дзякуючы якой курсанты маюць магчымасць стажыравацца ў складзе следча-аператыўных груп, выязджаць на канкрэтныя месцы здарэнняў, на свае вочы бачыць узаемадзеянне паміж следчым, аператыўнікамі і іншымі службамі. Дзякуючы гэтаму з першых дзён пасля выпуску ён ведае, што яму трэба рабіць па канкрэтнай крымінальнай справе. У асабістую справу кожнага выпускніка кладзецца спецыяльная анкета. Праз год пасля выпуску яе запаўняе начальнік, дзе і ацэньвае прафесійныя якасці маладога афіцэра. І ўжо пасля гэтага мы глядзім, як трэба дапрацоўваць навучальны працэс.

Валяр'ян ШКЛЕННІК

Прэв'ю: dompressy.by

Выбар рэдакцыі

Грамадства

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Адным з першых у вобласцi пачалi рэстаўрыраваць велiчны палац Сапег у Ружанах.

Грамадства

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Наша краiна займае трэцяе месца ў сваiм рэгiёне па колькасцi бескантактавых транзакцый.

Грамадства

Неспадзяваныя падарожжы. Як не згубiцца ў лесе?

Неспадзяваныя падарожжы. Як не згубiцца ў лесе?

Цёплае i вiльготнае надвор'е, якое вось ужо чацвёрты тыдзень з невялiкiмi перапынкамi пануе ў Беларусi, штурхае да таго, каб пайсцi ў лес.