Вы тут

Прэзідэнт: Самая страшная эпідэмія ў свеце — гэта паніка


Прэзідэнт Беларусі Аляксандр Лукашэнка сабраў нараду, каб абмеркаваць эпідэміялагічную сітуацыю ў краіне.


Сёння на нарадзе ў Прэзідэнта прысутнічалі кіраўнік Адміністрацыі Прэзідэнта Ігар Сергеенка, Дзяржаўны сакратар Савета Бяспекі Беларусі Андрэй Раўкоў, міністр аховы здароўя Уладзімір Каранік, намеснік галоўнага ўрача Рэспубліканскага цэнтра гігіены, эпідэміялогіі і грамадскага здароўя Ірына Глінская, спецыялісты Мінскага навукова-практычнага цэнтра хірургіі, транспланталогіі і гематалогіі і РНПЦ эпідэміялогіі і мікрабіялогіі.

Асаблівы акцэнт кіраўнік дзяржавы зрабіў на сістэмных мерах па барацьбе з каранавіруснай інфекцыяй COVID-19.

«Мы можам пацярпець больш ад панікі, чым ад самога віруса»

«Абмеркаваць эпідэміялагічную абстаноўку асабліва важна ва ўмовах каранавіруснага псіхозу», — падкрэсліў Аляксандр Лукашэнка. 

«Я цалкам упэўнены, што мы можам пацярпець больш ад панікі, чым ад самога віруса, — патлумачыў сваю пазіцыю ў гэтай сітуацыі беларускі лідар. — Гэта мяне больш за ўсё хвалюе. Вядома, назіраючы за тым, што адбываецца, а цывілізаваны свет ўвогуле нібы звар’яцеў... Ужо і палітыкі пачнаюць парады даваць. Выкарыстоўваюць у сваіх інтарэсах гэтыя працэсы. У залежнасці ад таго, што ў якой канкрэтнай краіне адбываецца». 

Пры гэтым ёсць ў гэтай сітуацыі і несуменная карысць, лічыць Аляксандр Лукашэнка. Яна ў тым, што мабілізавалася ўся сістэма аховы здароўя, асабліва эпідэміёлагі і вірусолагі, пра якіх да гэтага рэдка згадвалі.

«Добра, што мы захавалі гэту сістэму з савецкіх часоў і не страцілі вас, — звярнуўся да прысутных спецыялістаў Прэзідэнт. — Гэты псіхоз прымусіў нас страпянуцца і ў гэтым кірунку папрацаваць». 

«Першым з гэтым вірусам сутыкнуўся Кітай. А потым і ўвесь азіяцкі рэгіён. Пры гэтым кітайцам удалося справіцца з гэтай навалай. І яны ўжо дзеляцца сваім паспяховым вопытам з іншымі, — сказаў Аляксандр Лукашэнка. — Цяпер Сусветная арганізацыя аховы здароўя аб’явіла пандэмію. На карце не засталося практычна ніводнай краіны, у якой не было б заражаных». 

Пры гэтым беларускі лідар заўважыў, што гэта не мае вялікага значэння для нашай краіны, якая як працавала, так і працуе, павялічваючы намаганні па барацьбе з вірусам увогуле, не толькі з COVID-19. 

«Зараз у свеце штучна створаная сітуацыя, калі чалавек не можа патрапіць дадому»

На карце не засталося практычна ніводнай краіны, у якой не было б інфікаваных. Прэзідэнт са шкадаваннем адзначыў, што ў некаторых дзяржавах сотні людзей гінуць цягам сутак, у асноўным гэта старыя і людзі з цяжкімі хранічнымі хваробамі. Многія краіны закрылі сваю тэрыторыю для замежнікаў.

«Я яшчэ раз хачу паўтарыць, і гэта ўжо пацвярджаецца: глупства абсалютнае і несусветнае, — пракаментаваў сітуацыю кіраўінк дзяржавы. — Гэта ніяк не абараняе Расію, тым больш у сітуацыі, калі межы закрываюць выбарачна. Недзе закрылі, недзе адкрылі. Памятаеце, як з мяжой з Кітаем на Далёкім Усходзе было? Закрылі, праз трое сутак пачаўся дэфіцыт прадуктаў з Кітая. У выніку прыадкрылі. Вакханалія цэлая! Але гэта іх справа. Людзі ацэняць усё, што адбываецца ў нас з закрыццём межаў». 

«Так зрабілі і пяць дзяржаў — нашых суседзяў. І зараз у свеце штучна створаная сітуацыя, калі чалавек не можа патрапіць дадому. Вазьміце расіян, якія сёння ў Польшчы. Яны не могуць выехаць у Расію, — дадаў беларускі лідар. — Нам трэба прадпрыняць усе намаганні, каб нашы грамадзяне змаглі вярнуцца ў самы бліжэйшы час. Яны павінны быць дома. У бяспецы». 

Прэзідэнт даў персанальнае даручэнне кіраўніку сваёй Адміністрацыі дапамагчы расіянам, якія не могуць выехаць з Польшчы, дабрацца дадому.

Ён таксама папрасіў даць вычарпальную інфармацыю на наступных пытаннях.

  • Якая абстаноўка і якія прагнозы па каранавірусе ў бліжэйшыя дні і тыдні?
  • Якія меры прымаюцца для папярэджвання новых выпадкаў завозу ў Беларусь і распаўсюджвання ў нас гэтай інфекцыі? Наколькі яны эфектыўныя? Якія заходы трэба яшчэ зрабіць? І як растлумачваюцца насельніцтву правілы паводзін у гэты перыяд?
  • Ці ахоплены замежныя грамадзяне, якія знаходзяцца на тэрыторыі Беларусі, паўнавартасным медыцынскім назіраннем і лячэннем, як гэта было са студэнтам з Ірана, які ўжо выпісаўся?
  • Ці хапае месцаў у клініках і медыцынскіх кадраў? Ці забяспечаны персанал усім неабходным? Ці ёсць магчымасць матэрыяльнага заахвочвання за нялёгкую, у тым ліку, няўрочную працу?

«Каранцін не дае плёну»

Прэзідэнт упэўнены, і, па яго словах, гэта пацвярджаюць кітайскія спецыялісты: каранцін не дае плёну. Больш карысці прыносіць маніторынг атачэння хворага чалавека.

«Пры гэтым я хачу сказаць, па-мойму, такога пытання ў краіне няма і не будзе. Што ў Італіі ды і ва ўсёй Еўропе? Чалавек захварэў — наяўныя сімптомы ёсць, а людзі ж несвоечасова звяртаюцца, ходзяць па вуліцах. У выпадках сярэднецяжкай формы хваробы іх бяруць лячыць. Там смяротнасць сярод людзей, якія старэйшыя за 80 гадоў. У Італіі паміраюць у асноўым старыя, якім своечасова не аказалі дапамогу, — звярнуў увагу Прэзідэнт. — У нас зусім не так. Усе, хто быў за мяжой — на медыцынскім кантролі. Пры самым малым падазрэнні тэсціруем, калі лабараторна пацверджавана, адразу ўсе кантакты знаходзім і ізалюем».

«Цяпер трэба тактыку мяняць, сыходзячы з вопыту тых краін, якія больш працуюць з каранавірусам», — заявіў Аляксандр Лукашэнка.

Пятае пытанне, якое Прэзідэнт паставіў перад удзельнікамі нарады, датычылася статыстыкі, звязанай з захворваннем на пнеўманію.

«У канцы зімы — пачатку вясны ў Беларусі, як і ва ўсім свеце, ідзе пад’ём сезонных інфекцый, — канстатаваў Аляксандр Лукашэнка. — Размова ў дадзеным выпадку не пра каранавірус, а пра прывычныя для нас вострыя рэспіраторныя інфекцыі, уключаючы грып. Самае небяспечнае, што можа адбыцца, — пнеўманія. У мяне на стале параўнальная леташняя і сёлетняя статыстыка па колькасці смяротных выпадкаў ад пнеўманіі. Факт: за 2019 год у студзені-лютым было 196 смерцяў ад пнеўманіі, за студзень-люты гэтага года, пры такім псіхозе і іншых хвробах, у нас загінулі 138. Пры гэтым, асабліва падкрэсліваю, ніводнай смерці пры пацверджанай каранавіруснай інфекцыі на тэрыторыі нашай краіны сёння няма».

Кіраўнік дзяржавы папрасіў далажыць яму дакладна і па сутнасці, як будзе працаваць сістэма аховы здароўя, каб захварэлых было як мага менш і ўсе яны выздаравелі.

«Ад любой інфекцыі, ад любой, не толькі — каранавіруснай!» — акцэнтаваў увагу Прэзідэнт.

«Я не за тое, каб спрашчаць», — удакладніў Аляксандр Лукашэнка.

Кіраўнік дзяржавы вярнуўся да выпадку з увядзененм каранціна ў БНТУ і выказаўся супраць такіх метадаў. 

«Я катэгарычна забараніў без майго ведама нешта закрываць, нешта адмяняць, — паведаміў кіраўнік дзяржавы. — Вы павінны лячыць людзей. Таму ніякіх пераносаў, напрыклад, канікул у школе. Баяцца бацькі — няхай не пускаюць. Але, на шчасце, сярод дзяцей няма хворых».

Прэзідэнт заўважыў, што дзеці, якія могуць пераносіць вірус, у выпадку датэрміновых канікул вымушана паедуць да сваіх бабуль і дзядуль, чым падвергнуць іх рызыцы інфікавання. Што для старых вельмі небяспечна.

Не трэба рабіць залішніх дзеянняў — галоўны пасыл кіраўніка дзяржавы. Гэта тычыцца і закрыцця межаў.

«Але кантроль на мяжы мы паслабляць не павінны, —заўважыў Прэзідэнт. — Мне дзяржсакратар штораніцы дакладвае аб абстаноўцы на мяжы. Вялізная колькасць расіян перасоўваюцца праз нашу заходнюю мяжу ў Расію. Ні ў якім выпадку не кранайце! Яны вязуць грузы для Расіі, няхай вязуць. Мы забяспечваем тры калідоры — Украіна, Польша, Прыбалтыка — па якіх фуры перасякаюць нашу краіну. Трэба ім заправіцца — мы вызначаем пункты, дзе яны будуць запраўляцца, адпачываць і харчавацца».

«Рэспіратары нам спатрэбяцца заўсёды, не толькі з каранавірусам». 

Прэзідэнт ухваліў ініцыятыву Міністэрства аховы здароўя па размежаванні патокаў рабочых і студэнтаў у грамадскім транспарце. Падтрымаў ён і настрой у грамадстве на самаізаляцыю пры любых прыкметах рэспіраторных інфекцый. 

«Людям з прыкметамі інфекцыі трэба раіць заставацца дома, і асабліва — старым. Трэба так мабілізаваць нашы сацыяльныя службы, каб дапамагалі тым, каму дзеці дапамагчы не могуць. А такіх хапае, — сказаў Прэзідэнт. — Таму трэба старымі зараз апекавацца. Вось гэта для нас вельмі, вельмі важна — каб яны не пацярпелі».

Аляксандр Лукашэнка папрасіў экспертаў паведаміць яму, што яшчэ трэба зрабіць, каб актывізаваць медыцынскую сістэму ў супрацьстаянні з інфекцыямі, у тым ліку з новай. 

Па словах Прэзідэнта, цяпер у краіне залішак медыцынскіх масак, дастаткова ахоўных медыцынскіх касцюмаў. Але рэспіратараў можа не хапіць. І гэта абурыла кіраўніка дзяржавы. Ён даручыў за тыдзень наладзіць у Беларусі вытворчасць рэспіратараў.

«Хвалімся ўсюды, што мы — ІТ-краіна, а няшчасныя гэтыя «наморднікі» не можам вырабіць! Каб за тыдзень урад прыняў адпаведнае рашэнне! Калі няма станка — не праблема яго набыць. Дрэнна, што ў Беларусі іх няма. Яны нам спатрэбяцца заўсёды, не толькі з каранавірусам». 

Аляксандр Лукашэнка адмыслова спытаў вірусолагаў і эпідэміёлагаў, якой яны бачаць існуючую праблему з COVID-19. Першапачаткова ён нават не хацеў запрашаць да размовы міністра аховы здароўя, бо зараз кіраўніка дзяржавы цікавіць не столькі праца міністэрства, колькі меркаванне экспертаў. 

«Вы павінны мець свой пункт погляду», — абазначыў ён фармат гутаркі. І заклікаў спецыялістаў адказваць на ўсе пытанні журналістаў шчыра і падрабязна.


Па інфармацыі Міністэрства аховы здароўя Беларусі, з улікам вастрыні развіцця эпідэміялагічнай сітуацыі па каранавіруснай інфекцыі, якая захоўваецца ў свеце, у нашай краіне прымаюцца сістэмныя меры, накіраваныя на папярэджанне і распаўсюд дадзенай інфекцыі.

На 17 сакавіка 2020 года ўсяго зарэгістраваны 51 выпадак лабараторнага пацвярджэння COVID-19 у Беларусі. Большая частка пацыентаў знаходзяцца без прыкмет захворвання, шэсць пацыентаў выпісаныя.

З 51 выпадку 17 з’яўляюцца завазнымі, астатнія 34 выпадкі былі вызначаныя ў выніку абследавання і медыцынскага назірання кантактных асоб. Своечасовая іх ізаляцыя дазволіла папярэдзіць распаўсюд інфекцыі.

За ўвесь перыяд правядзення эпідэміялагічных расследаванняў былі вызначаны і шпіталізаваны 962 пацыенты — гэты ўсе інфікаваныя і тыя, хто меў цесны кантакт з імі.

У рамках санітарнага кантролю на межах Беларусі на 17 сакавіка былі вызначаныя 242 чалавекі з сімптомамі вострай рэспіраторнай віруснай інфекцыі, якія знаходзіліся раней у краінах з высокім узроўнем захворвальнасці COVID-19: у КНР — 97 чалавек, у Італіі, Паўднёвай Карэі, Іране — 145 чалавек. Дадзеныя асобы шпіталізаваныя ў інфекцыйныя стацыянары, ім аказаная неабходная медыцынская дапамога, праведзены лабараторныя даследаванні. Наяўнасць каранавіруса не пацвердзілася.

Міністэрства аховы здароўя інфармуе, што пад актыўнае медыцынскае назіранне трапляюць усе грамадзяне, якія прыбылі з краін, дзе нябяспечная сітуацыя з COVID-19. На 17 сакавіка працягваецца медыцынскае назіранне за 1960 грамадзянамі. За 2693 асобамі двухтыднёвае медыцынскае назіранне завершана, яны здаровыя.

Пры гэтым медыкі бесперапынна назіраюць за ўсімі студэнтамі, якія вяртаюцца з КНР, Італіі, Ірана, Паўднёвай Карэі. Таксама арганізавана назіранне за рабочымі, якія прыбываюць з КНР.

На 17 сакавіка працягваецца медыцынскае назіранне за амаль трыма сотнямі работнікамі Беларускай Нацыянальнай біятэхналагічнай карпарацыі і Адміністрацыі Кітайска-Беларускага індустрыяльнага парка «Вялікі камень». Назіранне за яшчэ амаль чатырма сотнямі работнікамі гэтых арганізацый завершана, яны здаровыя.

Міністэрства аховы здароўя пашырыла пералік краін з дрэннай эпідэміялагічнай сітуацыяй, уключыла ў яго таксама Францыю, Германію, Іспанію, Польшчу і Чэхію.

Загадам Міністэрства аховы здароўя перапрафіляваны ложкавы фонд арганізацый аховы здароўя ва ўсіх рэгіёнах краіны з улікам эпідэміялагічнай сітуацыі, якая складваецца. Распрацаваны план далейшага яго перапрафілявання ў залежнасці ад колькасці хворых. Праведзена рэвізія медыцынскага абсталявання аддзяленняў анестезіялогіі і рэанімацыі, створаны неабходны запас лекавых сродкаў і медыцынскіх вырабаў. Засцерагальных касцюмаў і сродкаў індывідуальнай абароны дастаткова, запэўнівае ведамства.

Маюцца праблемы з папаўненнем запасаў некаторых сродкаў абароны медперсанала (рэспіратары, ахоўныя акуляры) у сувязі з уведзеным шэрагам краін абмежавання экспарту, паведамляе міністэрства. Прапрацоўваюцца альтэрнатыўныя варыянты паставак.

Зменена арганізацыя работы амбулаторна-паліклінічных устаноў аховы здароўя і дзяцей. Прыняты меры па максімальным аказанні медыцынскай дапамогі пацыентам дома.

Міністэрства аховы здароўя запэўнівае, што для абследавання ўсіх належных асоб на інфекцыю COVID-19 на сённяшні дзень маецца дастатковая колькасць айчынных тэст-сітэм. Дадаткова плануецца атрыманне больш за тысячу набораў тэст-сітэм для экспрэс-дыягностыкі ў якасці гуманітарнай дапамогі ад Кітайскай Народнай Рэспублікі.

У інтэрнеце размешчана інфармацыя Міністэрства аховы здароўя па прафілактыцы каранавіруснай інфекцыі і рэкамендацыі для насельніцтва ў выпадку добраахвотнай ізаляцыі.

Міністэрства рэкамендавала абмежаванне правядзення масавых мерапрыемстваў і выяздаў за мяжу.

Вызначаныя кантынгенты медыцынскіх работнікаў і памеры надбавак пры аказанні медыцынскай дапамогі пацыентам з інфекцыяй COVID-19 і пры правядзенні супрацьэпідэміялагічных мерапрыемстваў сярод кантактных асоб.

Забяспечана штодзённае інфармаванне насельніцтва праз усе магчымыя каналы сродкаў масавай інфармацыі аб сітуацыі ў краіне, запэўнівае міністэрства.

Для ўдасканалення супрацьэпідэміялагічных мерапрыемстваў Міністэрства аховы здароўя прапануе шэраг мер.

  • Арганізаваць транзітныя калідоры для вялікагрузнага транспарту і расійскіх грамадзян, якія следуюць транзітам праз нашу краіну, з дакладным вызначэннем месцаў, дзе тыя могуць спыняцца для запраўкі, адпачынку і харчавання, з арганізацыяй у дадзеных месцах санітарна-кантрольных пунктаў для назірання і наступнай дэзінфекцыі.
  • Скараціць інтэрвалы руху грамадскага транспарту ў гадзіны пік.
  • Змясціць час пачатку заняткаў у ВНУ на больш позні час для раздзялення патокаў пасажыраў, якія едуць на работу і вучобу.
  • Актывізаваць работу сацыяльных службаў, накіраваную на задавальненне патрэб пажылых людзей і інвалідаў без выхаду з дому.

Вольга МЯДЗВЕДЗЕВА

Фота БЕЛТА

Выбар рэдакцыі

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

...Гэты вясковец быў вельмі шчыры працаўнік, да таго ж ніколі не квапіўся на чужое, нават на калгаснае

Грамадства

Чаму 14 лістапада варта лічыць днём яднання?

Чаму 14 лістапада варта лічыць днём яднання?

З прапанаваных для абмеркавання дат, адна з якіх можа стаць Днём народнага адзінства — 14 лістапада.

Грамадства

Анёл па імені Алена. Як прадпрымальніца стала сацработнікам

Анёл па імені Алена. Як прадпрымальніца стала сацработнікам

Сацыяльны работнік тэрытарыяльнага цэнтра сацыяльнай абароны насельніцтва Маскоўскага раёна Мінска Алена Сцепаненка працуе на сваім месцы каля двух гадоў.