Вы тут

У Беларусі выяўлены 81 выпадак заражэння каранавірусам


У Беларусі ўжо зарэгістраваны 81 выпадак каранавіруса. 22 чалавекі выпісаны ці рыхтуюцца да выпіскі, маючы адмоўныя тэсты. Яшчэ 59 знаходзяцца пад медыцынскім назіраннем. Большасць хворых у Мінску – іх каля 40, два – у Гомельскай вобласці, адзін – у Гродна, астатнія – у Віцебску. З усіх выпадкаў 41 завазны. Прычым сярод інфіцыраваных з пацверджаным дыягназам толькі адзін замежны грамадзянін, усе астатнія – беларусы. Сярэдні ўзрост пацыентаў – ад 15 да 49 гадоў. Самаму старэйшаму хвораму з COVID-19 78 гадоў, самаму малодшаму – тры гады (ён кантактаваў з інфіцыраванай маці).


– Сітуацыя кантралюемая і падстаў для панікі на цяперашні момант няма, – падкрэсліла намеснік міністра аховы здароўя Алена Богдан. – Па дадзеных Сусветнай арганізацыі аховы здароўя па колькасці тэстаў, праведзеных на мільён насельніцтва, мы знаходзімся на 9-м свеце сярод усіх краін свету, дзе зарэгістраваны выпадкі каранавірусу. На 100 тысяч жыхароў у нас прыходзіцца 22 апараты штучнай вентыляцыі лёгкіх. З наркозна-дыхальнымі апаратамі – 38. Для параўнання ў ЗША гэтыя лічбы складаюць 18, у Італіі – 8,3, у Вялікабрытаніі – 12,9.

Намеснік міністра паведаміла, што ў краіне ўдалося стабілізаваць сітуацыю з узроўнем пнеўманій. На сёння ў Беларусі яна маецца ў 2 743 пацыентаў, з іх у 77 – цяжкая. Траціна пнеўманій маюць грыпозную этыялогію. У прыватнасці, 22 цяжкія выкліканы грыпам H1N1.

– Усе сярэднецяжкія і цяжкія пнеўманіі тыпіруюцца на каранавірус. Такім чынам учора быў выяўлены яшчэ адзін выпадак у Гомельскай вобласці.  Пацыентка не мае патрэбы ў дапаможнай вентыляцыі лёгкіх. Яна была дастаўлена на абласны ўзровень. У раёне (Жыткавіцкім, – “Зв”.) праводзяцца супрацьэпідэмічныя мерапрыемствы.

Спецыялісты нагадалі, што аналіз на каранавірусную інфекцыю бяруць і ў блізкіх хворага на цяжкую пнеўманію, каб не прапусціць выпадкаў каранавірусу. І да гэтага трэба аднесціся з разуменнем. Менавіта так развівалася сітуацыя і ў Віцебску, дзе ад пнеўманіі памерла жанчына. Ёй і  блізкім рабілі тэст на COVID-19, які не пацвердзіў наяўнасць вірусу.

Па інфармацыі намесніка начальніка аддзела гігіены, эпідэміялогіі і прафілактыкі Міністэрства аховы здароўя Іны Карабан, на ізаляцыі зараз знаходзіцца 1100 кантактаў першага ўзроўню, а 8800 кантактаў другога ўзроўню – пад медыцынскім назіраннем.

– Пацыенты з COVID-19 не заўсёды даюць поўную інфармацыю аб сваіх кантактах, асабліва калі яны наведвалі забаўляльныя ўстановы. У некаторых выпадках прыходзіцца прыбягаць да дапамогі органаў унутраных спраў і праглядаць запісы камер відэаназірання, – паведаміла Іна Карабан.

Пакуль у Мінску кантактныя асобы размяшчаюцца ў шпіталі ветэранаў Вялікай айчыннай вайны, комплексах “Загор’е” і “Брыганціна”, сталічным скурна-венералагічным дыспансеры. Інфіцыраваныя праходзяць лячэнне ў Мінскай інфекцыйнай бальніцы, абласным супрацьтуберкулёзным дыспансеры і 6-й гарадской бальніцы. У астатніх рэгіёнах пакуль хапае для гэтых мэт месцаў у абласных інфекцыйных бальніцах.

– Мы часова адклалі планавую шпіталізацыю. Пры гэтым пацыентам з інфарктамі, інсультамі, экстраннымі хірургічнымі паталогіямі дапамога аказваецца, – удакладніла Алена Богдан. – Ёсць установы, якія ні ў якім выпадку не будуць перапрафіляваны і аказваюць дапамогу пацыентам з сардэчна-сасудзістымі катастрофамі, траўмамі, лор-захворваннямі, дзіцячымі хваробамі і інш.

Іна Карабан нагадала, што ўсіх тых, хто вярнуўся ў краіну з-за мяжы Міністэрства аховы здароўя заклікае да самаізаляцыі. Гэта значыць не наведваць блізкіх, работу, абмежаваць кантакты ў сям’і і па магчымасці, перасяліцца асобна ад родных.

– Няма забароны на наведванне вуліц, паркаў. Але трэба трымаць дыстанцыю ў 1-1,5 метры ад сябе да іншых людзей, бо каранавірус перадаецца з кропелькамі сліны, слізі, якія распыляюцца на гэту адлегласць. Калі няма магчымасці застацца дома, варта насіць маску, – парэкамендавала Іна Карабан.

– Сістэма аховы здароўя накіравана на аказанне медыцынскай дапамогі, і мы не можам прымусіць тэсціравацца ўсіх, хто прыбывае ў аэрапорт, гэта дабравольнае жаданне кожнага. Па магчымасці такія людзі павінны арганізаваць самаізаляцыю на 14 дзён. А іх наймальнік павінен быць зацікаўлены, каб такі чалавек не прыйшоў на працу, – дадала Алена Богдан.

Прадстаўнікі Міністэрства аховы здароўя паведамілі, што пакуль абмежаванняў для наведвання устаноў грамадскага харчавання, цырульняў і салонаў прыгажосці, масажных кабінетаў няма, бо сітуацыя кантралюемая.

– Усім установам грамадскага харчавання былі накіраваны рэкамендацыі па змяншэнні колькасці наведвальнікаў, размяшчэнні столікаў на адлегласці не менш за метр. Падстаў рэкамендаваць іх закрыццё пакуль няма, – удакладніла Іна Карабан.

А вось парадак наведвання паліклінік змяніўся. Для хворых з павышанай тэмпературай прадугледжаны асобны ўваход, а пры яго адсутнасці – кабінет на першым паверсе, куды варта прайсці, мінуючы рэгістратуру. Як паведаміла галоўны ўрач 39-й сталічнай паліклінікі Вольга Есманчык, планавыя наведванні паліклінік зараз максімальна абмежаваны. Дыспансерызацыя і іншыя абследаванні лепш перанесці на больш позні тэрмін – май-чэрвень. Планавая стаматалагічная дапамога таксама мінімізавана. Арганізавана выпіска рэцэптаў і дастаўка іх на дом для пажылых грамадзян.

Людзям сталага ўзросту ў гэтыя дні медыкі раяць не ўдзельнічаць і не наведваць масавыя мерапрыемствы, па магчымасці не выходзіць у людныя месцы без патрэбы. А беларускія медыкі далучыліся да міжнароднай акцыі “Мы застанемся на рабоце, каб дапамагчы вам – Вы застаньцеся дома, каб дапамагчы нам!”


Пра першага пацыента з каранавірусам у Беларусі стала вядома 28 лютага. Былі вызначаны лячэбныя ўстановы, дзе будуць аказваць дапамогу пацыентам з каранавірусам і падазрэннем на яго, зменены правілы працы паліклінік. Урад выдзеліць з бюджэту дадатковыя сродкі Міністэрству аховы здароўя і бюджэтам Мінска і Віцебска. Таксама стала вядома, што ў Беларусі будуць праводзіць экспрэс-тэсты на каранавірус.

Алена КРАВЕЦ

Прэв'ю: Depositphotos.com

Выбар рэдакцыі

Грамадства

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Адным з першых у вобласцi пачалi рэстаўрыраваць велiчны палац Сапег у Ружанах.

Грамадства

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Наша краiна займае трэцяе месца ў сваiм рэгiёне па колькасцi бескантактавых транзакцый.

Грамадства

Неспадзяваныя падарожжы. Як не згубiцца ў лесе?

Неспадзяваныя падарожжы. Як не згубiцца ў лесе?

Цёплае i вiльготнае надвор'е, якое вось ужо чацвёрты тыдзень з невялiкiмi перапынкамi пануе ў Беларусi, штурхае да таго, каб пайсцi ў лес.