Зіму ў Рыме не спалілі...

У сталіцы Італіі ўпершыню сёлета ў Культурна-­адукацыйным цэнтры “Францыск Скарына” святкавалі Масленіцу

Пра падзею ў рэдакцыю напісала 2 сакавіка Ніна Пашчанка, кіраўніца цэнтра. Зусім коратка: у суботу ў цэнтры прайшло свята “Масленіца”: “Весяліліся дарослыя і дзеці. А італьянскія таты, госці ўпершыню пакаштавалі бліны з рознымі начынкамі, вывучылі слова “оладушки”. Пудзіла Зімы так і не спалілі: бо нашы першаклашкі яе пашкадавалі”.

Потым спадарыня Ніна згадала, як весела адзначалі Масленіцу ў яе родным горадзе Оршы: “На плошчы каля Ільнокамбіната стаялі палаткі з блінамі ды шашлыкамі. Быў і велізарны слуп, на які трэба было залезці, каб зняць пеўня ці боты. Некалькі чалавек узбіраліся на плечы адно аднаму, выбудоўваючы лесвічку, а вышэй залазіў самы спрытны. Шмат было няўдач, але заўсёды знаходзіўся той, хто прымудраўся забраць падарунак. Выступалі самадзейныя гурты ў народных строях. А потым спальвалася велізарнае пудзіла. Мая мама і яе аршанскія сябры па гэты час адзначаюць Масленіцу”.

Вось і варта падумаць, калі паступаюць трывожныя весткі з Італіі ў сувязі з вялікімі ахвярамі ад каранавірусу: спальваць трэба было Зіму, якая ўвасабляе ўсё ліхое, ці пашкадаваць?..

Рыгор Гарэшка