Вы тут

У Гомельскiм раёне працягваюць сяўбу


Аграрыi паўднёвага рэгiёна Беларусi — Гомельскай вобласцi — традыцыйна задаюць тэмп сяўбы раннiх яравых збожжавых i зернебабовых культур. Засеяна больш чым 90 % адведзеных плошчаў. Пасяўны клiн у рэгiёне сёлета зойме каля 550 тысяч гектараў. Мяркуецца завяршыць яравую сяўбу да 9 мая. Мiж тым усе гаспадаркi Гомельскага раёна пасеялi раннiя яравыя — ячмень i авёс. Пры спрыяльных умовах надвор’я ў найблiжэйшыя днi можна будзе прыступiць да сяўбы пшанiцы.


Кiраўнiк аддзялення «Цярэнiчы» УСП «СлаўМол» Фёдар Прахарэнка, старшыня Цярэнiцкага сельвыканкама Алена Козырава, старшыня Гомельскага раённага Савета дэпутатаў Вiкторыя Ладуцька, вядучы аграном аддзялення «Цярэнiчы» УСП «СлаўМол» Юрый Адзiнцоў.

Разам са старшынёй Гомельскага раённага Савета дэпутатаў Вiкторыяй Ладуцька дабiраемся да пасёлка Цярэнiчы:

— Тут знаходзiцца адно з аддзяленняў сельгаспрадпрыемства «СлаўМол», — уводзiць у курс справы дэпутат. — Сяўбу ячменю завяршаюць ва ўрочышчы Лозы. Першы дзень пасля начных прымаразкаў тэхнiка можа выйсцi ў поле.

Вiкторыя Аляксандраўна замацавана за гаспадаркай. Прыязджае, каб ацанiць аб’ём работы на палях.

— Кiраўнiк аддзялення «Цярэнiчы» Фёдар Прахарэнка — дэпутат Цярэнiцкага сельскага Савета дэпутатаў, — тлумачыць кiраўнiк райсавета. — Больш за 30 гадоў ён на гэтай зямлi, людзей ведае i мясцовасць таксама. Гэта вельмi дапамагае ў рабоце.

Фёдар Прахарэнка сустракае нас разам з вядучым аграномам аддзялення — Юрыем Адзiнцовым. Едзем туды, дзе зараз працуе тэхнiка. У салоне машыны аграрыi вывяраюць справаздачы: лiчбы, планы, працэнты. Асляпляльна-зялёная варсiстая роўнядзь поля за шклом машыны адрывае ад папер.

— Гляньце, як спорна азiмыя ўзышлi, зараз пацяплее — раскусцяцца, нальюцца, — заўважае Фёдар Iосiфавiч.

— Бачыце поле, якое нядаўна засеялi? Роўненька ўсё, вока радуе, для мяне няма нiчога прыгажэйшага. Тут душу ўклалi ў кожны куток зямлi, — падтрымлiвае гаворку аграном.

Мужчыны 40 гадоў працуюць у мясцовай гаспадарцы. Наблiжаемся да ўрочышча Лозы, дзе не так даўно была паша. Потым на гэтым месцы засявалi травы для кармоў, i вось першы год тут ячмень. Зямля прайшла перадпасяўную апрацоўку. Магутны трактар пакiдае свежыя баразёнкi: так пасяўны агрэгат сашнiкамi задае будучыя рады каласкоў.

— Пры добрым надвор’i, калi можна ўсю змену адсеяць, праходжу 40 гектараў, — расказвае механiзатар аддзялення «Цярэнiчы» Андрэй Багдановiч.

Ён цяпер iмкнецца працаваць без прыпынкаў — няма часу даваць iнтэрв’ю. Але ж якраз час праверыць работу насеннеправодаў пасяўнога агрэгата.

— Пасля начных прымаразкаў у поле выходзiм пазней, калi сонца добра прагрэе зямлю. Машына ў мяне добрая, летась атрымалi, першы год яна на пасяўной.

Перапынкi ў механiзатара цяпер толькi на яду — яе прывозяць у поле. Насенне рытмiчна дастаўляюць з гаспадаркi, калi прыходзiць час. У цэлым УСП «СлаўМол» атрымала сёлета самы высокi план сярод гаспадарак Гомельскага раёна па яравой сяўбе. Веснавыя палявыя работы распачалi ў лютым: уносiлi арганiку, тэхнiка «закрывала вiльгаць» i рыхтавала глебу да сяўбы, падкормлiвалi шматгадовыя травы.

Механiзатар аддзялення «Цярэнiчы» УСП «СлаўМол» Андрэй Багдановiч.

Мiж тым начальнiк упраўлення сельскай гаспадаркi i харчавання Гомельскага райвыканкама Мiкалай Лясько адзначае: вельмi важна паспець правесцi пасяўную кампанiю, пакуль у глебе ёсць вiльгаць. Пад сяўбу асноўных збожжавых культур — ячменю i аўса, якiя менш цеплалюбныя, — на тэрыторыi раёна адведзена без малога тры тысячы гектараў.

Гаспадаркi раёна пачалi сяўбу i зернебабовых культур, пад якiя выдзелена 600 гектараў. На чарзе — пшанiца. Гэтая культура будзе пасеяна на 550 гектарах: 400 у УСП «СлаўМол» i 150 у КСУП «Урыцкае». У цэлым план па сяўбе яравых збожавых культур для Гомельскага раёна — 4715 гектараў. На шасцiстах гектарах пасеюць грэчку i проса. Традыцыйна вялiкую частку клiна зойме «царыца палёў»: пад пасеў кукурузы ў раёне адведзена 22 тысячы гектараў. Да работ з гэтай культурай гаспадаркi плануюць перайсцi ў сярэдзiне красавiка.

Наталля КАПРЫЛЕНКА

Фота аўтара

Загаловак у газеце: Вясновыя клопаты

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».