Вы тут

Грамадскі дзеяч Сяргей Макоўскi: Глядзiце ў адным кiрунку, а не адно на аднаго


Сёння ў рубрыцы «Мужчыны пра жанчын» — Сяргей Макоўскi, стваральнiк i кiраўнiк грамадскага аб'яднання «Анкалогiя i Здароўе». Сёлета аб'яднанню споўнiлася 17 гадоў. Таксама Сяргей прадстаўляе Расiйска-Чэшскую гандлёвую палату ў Беларусi, а ў якасцi другога хобi называе венчурную сферу. Цяпер ён рыхтуе маштабны мiжнародны праект, у рамках якога будзе зняты мастацкi фiльм на тэму барацьбы з ракам. Пакуль у стварэннi кiнафiльма плануецца ўдзел трох краiн: Беларусi, Расii i Кiтая, але, магчыма, да iх далучацца Францыя i ЗША. Фiнансаваць фiльм будуць iнвестары з розных краiн. Сяргей спадзяецца, што яго праект дапаможа нашаму грамадству стаць больш спагадлiвым i добрым.


— Самае чароўнае ў жанчынах — гэта...

— Iх непасрэднасць i жаноцкасць. Гэтыя якасцi заўсёды вельмi прывабныя. Асаблiва жаноцкасць, бо сёння яе чамусьцi ўсё менш. У некаторых жанчын яна, магчыма, ўтоена, а некаторыя не разумеюць, што гэта.

— Што для вас жаноцкасць?

— Гэта чароўная аўра, якая лунае вакол жанчын i дае нам магчымасць адчуць сябе мужчынамi. Гэта манера сябе падаць, спакой i лаканiчнасць у зносiнах, ураўнаважанасць у голасе. Жаноцкасць складаецца з многiх элементаў, зразумець якiя здольна, напэўна, толькi сама жанчына. Яна можа стаць для мужчыны музай, выклiкаць жаданне тварыць i праяўляць знакi ўвагi. Думаю, гэта «зашыта» ў самой прыродзе. Хацелася б, каб такiх дзяўчат было больш, тады свет стане прыгажэйшы.

— Што больш захапляе: далiкатнасць жанчыны цi яе ўнутраная сiла?

— Далiкатнасць i вытанчанасць — яе сiла. Яна можа вельмi па-майстэрску, па-жаночаму «скарыстацца» ёй. I, думаю, гэта адбываецца часам неўсвядомлена. Такая класiка ўзаемаадносiн памiж мужчынамi i жанчынамi была ўслаўлена яшчэ ў сярэднiя вякi. Сучасны свет крыху страцiў гэтыя пазiцыi, жанчыны часцей хочуць праяўляць сiлу. Я не маю нiчога супраць фемiнiстычных настрояў, i выдатна, што жанчыны змагаюцца за свае правы, калi iх ушчамляюць. Але часам у iх дзеяннях бываюць некаторыя перакосы, усё гэта набывае карыкатурныя формы. Лiчу, што жанчыны могуць вельмi i вельмi многае, у iх бывае больш патэнцыялу, чым у мужчын. Мне падабаецца, як многiя жанчыны рэалiзуюць яго ў бiзнесе. Пры гэтым застаюцца жаноцкiмi i досыць паспяховымi.

— Чым жанчыны ў бiзнесе адрознiваюцца ад мужчын?

— Прыходзячы на перагаворы з мужчынамi, некаторыя бiзнес-лэдзi выкарыстоўваюць «жаночыя» хiтрыкi. Напрыклад, вялiкае дэкальтэ i флiрт. На мой погляд, гэта маветон. Лепш, калi жанчына паводзiць сябе па-дзелавому i адзяваецца на сустрэчу адпаведна. (Хоць мужчыны бываюць розныя, некаторыя нават скрозь закрыты дзелавы касцюм могуць убачыць жанчыну, а не партнёра па бiзнесе.) Выкарыстоўваючы «жаночыя» хiтрыкi, дамы дамагаюцца на перамовах патрэбнага вынiку. Я ведаю мужчын, якiя глядзяць на гэта без адабрэння. Яны адразу заўважаюць падобныя прыёмы, i стаўленне да будучага партнёра можа змянiцца ў горшы бок. Лепш усё ж дазволiць у дрэс-кодзе крыху больш пасля афiцыйнай сустрэчы. Напрыклад, калi гэта фуршэт у рэстаране цi вечарына.

— Пра што маўчаць мужчыны?

— Пра свае шкiлеты ў шафе (усмiхаецца). Нi адзiн мужчына не захоча гаварыць пра сябе непрыемныя рэчы перад жанчынай, якая яму падабаецца. Зрэшты, наўрад цi i жанчына пажадае гэта чуць.

— Цi ёсць штосьцi, што мужчына нiколi не скажа жанчыне?

— Калi ён выхаваны, то не скажа антыкамплiмент або колкае слова. Ён будзе паважаць сваю сяброўку, спадарожнiцу, калегу цi партнёра. Гэта тое, што трэба шырэй прывiваць у нашым грамадстве. Не скажу, што яно сапсаванае, — наша грамадства разнастайнае. Але лепш, каб вакол было больш добрых прыкладаў.

— Цi змаглi б вы мець на ўтрыманнi сваю другую палову? Як да гэтага ставiцеся?

— Так, я б змог, заробкi цалкам дазваляюць. Калi яна не хоча працаваць, але пры гэтым захапляецца якiм-небудзь хобi, буду толькi рады. Але калi жанчына не хоча нi працаваць, нi займацца чымсьцi, то гэта сумная гiсторыя. Раней, у ХIХ стагоддзi, мадэль адносiн была такая: муж-мецэнат i жонка-палюбоўнiца (утрыманка), i гэта лiчылася нормай. Сучаснае грамадства па-iншаму глядзiць на такое ўзаемадзеянне. Кожнаму сваё: жанчыне вырашаць, займацца чым-небудзь цi не, а мужчыну — цi будзе яму прыемна з такой жанчынай. Калi гэта задавальняе абодвух — чаму не? Я за тую формулу, дзе абодва развiваюцца адначасова i раўнамерна, дапамагаюць адно аднаму не адставаць. У гэтым залог працяглых адносiн.

— А што, калi жанчына зарабляе нашмат больш?

— На нейкiм этапе гэта дапускаецца, але пры гэтым мужчына павiнен старацца дагнаць жанчыну ў заробку. Гэта наша прырода: мужчына — заваёўнiк i здабытчык, а жанчына — аб'ект заваёвы i захавальнiца хатняга ачага. Калi яна зарабляе больш, у пары адбываецца замена роляў, i мужчына можа адчуваць сябе некамфортна. Нямала выпадкаў, калi на гэтай глебе адбываецца разрыў у адносiнах, прычым у большасцi выпадкаў з iнiцыятывы жанчыны, што цалкам натуральна. Iдэальна, калi жанчына, зарабляючы больш, захапляе партнёра заняцца чымсьцi дадаткова, дапамагае знайсцi шляхi дасягнення большага. Гэта толькi ўмацуе iх адносiны.

— У якую жанчыну можна закахацца з першага погляду?

— У тую, якая любiць сябе, якая развiваецца i займаецца тым, што ёй па душы. Асабiста мне iмпануюць жанчыны адукаваныя, са стрыжнем маральнасцi. Добра, калi яна будзе яшчэ i музай для свайго мужчыны. Яна таксама не дапускае ў сваiм сэрцы злосць, паводзiць сябе стала i самадастаткова.

— Людзi часта кажуць словазлучэнне «сапраўдны мужчына», i адразу за гэтым «павiнен». Што i каму ён павiнен? I як наконт «сапраўдных жанчын»?

— Мужчына сапраўды павiнен. Перш за ўсё сабе. Павiнен станавiцца лепшым у адносiнах да сябе ўчарашняга. Павiнен забяспечыць родных, аказваць увагу жонцы i дзецям, старацца ўсiх развiваць, захапляць чымсьцi i ўзбагачаць духоўна. Жанчына таксама павiнна расцi над сабой i самаўдасканальвацца. Але ёсць жартаўлiвы выраз пра тое, што жанчына нiкому нiчога не павiнна.

— Галоўнае ў адносiнах — гэта...

— Шчырасць, узаемапавага, жаданне дапамагаць у любой сiтуацыi. Падтрымлiваць словам i справай.

— Быць у шлюбе — гэта...

— ...глядзець у адным кiрунку. Глядзець адно на аднаго заўсёды паспееце.

Вiталiна Бандаровiч

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.