Вы тут

«Разумнае» асвятленне для Навагрудка


Навагрудак — адзін з самых старажытных беларускіх гарадоў. Былая сталіца Вялікага княства Літоўскага. Тут, у прыватнасці, правёў дзяцінства Адам Міцкевіч. Цяпер у Навагрудку ёсць выдатны дом-музей, прысвечаны знакамітаму паэту. Зрэшты, у горадзе шмат і іншых славутасцяў, якія распавядаюць пра багатую гістарычную і культурную спадчыну тамтэйшых мясцін. Нездарма яны прыцягваюць да сябе ўвагу шматлікіх турыстаў. Але сёння Навагрудак актыўна жыве і сваім сучасным жыццём. Важна заўважыць, што горад, яго адміністрацыя аператыўна рэагуюць на найноўшыя прапановы ў галіне горадабудаўніцтва. Такія новаўвядзенні лёгка знаходзяць сабе месца ў гарадской інфраструктуры. Як і ў цэлым — у гарадскім жыцці.


Фота belayarus.by

Летам мінулага года, у межах правядзення Рэспубліканскага экалагічнага форуму, у Навагрудку адбылося ўрачыстае адкрыццё гарадскіх вуліц, аснашчаных сістэмай «разумнага» святладыёднага асвятлення. Мадэрнізацыя гарадскога асвятлення была праведзена паводле праекта «Падтрымка зялёнага горадабудаўніцтва ў малых і сярэдніх гарадах Беларусі» («Зялёныя гарады»), які фінансуецца глабальным экалагічным фондам і рэалізуецца Праграмай развіцця ААН у партнёрстве з Міністэрствам прыродных рэсурсаў і аховы навакольнага асяроддзя Рэспублікі Беларусь. Паспрабуем высветліць, наколькі сябе апраўдала гэтае тэхнічнае рашэнне.

На думку Андрэя Леановіча, прадстаўніка кампаніі-падрадчыка, ужо са жніўня 2019-га пазітыўны вынік працы сістэмы «разумнага» асвятлення стаў відавочны. Штомесяц кампанія збірала паказанні з прыбораў уліку па ўсіх свяцільніках і шафах кіравання, фіксавала іх у адпаведнай праграме. Галоўны вынік на сённяшні момант — усе ўсталяваныя свяцільнікі, а таксама іншае абсталяванне працуюць у штатным рэжыме, усё асвятленне цалкам адпавядае патрабаванням санітарна-гігіенічных нормаў.

«Тая сістэма, якая была ў горадзе раней, шматлікім патрабаванням не адпавядала, — гаворыць Андрэй Леановіч. — Сёння ж, пры тым, што мы значна павялічылі асвятленне па ўсім горадзе, асабліва на самых загружаных участках, мы бачым эканомію электраэнергіі. У параўнанні са старымі энергазатратнымі лямпамі гэтая эканомія як мінімум 30%. Абсталяванне працуе па зададзеным графіку — ён мяняецца ў залежнасці ад часу сутак. У зімовую пару, вядома ж, назіраем павышэнне спажывання, што натуральна, бо ў сутках у гэты перыяд больш цёмных гадзін».

Акрамя значнай эканоміі электраэнергіі падрадчык адзначае і шэраг іншых пераваг у працы новай сістэмы асвятлення. Па-першае, гэта бяспека і камфорт.

«Калі вы паглядзіце на гарадскія вуліцы, якія пакуль засталіся са старымі свяцільнікамі, то адзначыце ашаламляльную розніцу ў якасці асвятлення. Па-другое, відавочна яго раўнамернасць. Мы шчыльна папрацавалі з прадстаўнікамі Дзяржаўтаінспекцыі, вывучылі статыстыку. І найбольш аварыйна небяспечныя дарожныя ўчасткі альбо падсвятлілі дадаткова, альбо пакідаем на ноч працаваць асвятленне ў штатным рэжыме. Пры тым, што на іншых участках яно прыглушаецца. Такім чынам, і эканомім, і забяспечваем бяспеку», — адзначае Андрэй Леановіч.

Аляксандр Грыц, намеснік старшыні Навагрудскага выканкама, лічыць, што чаканні ад уводу ў дзеянне сістэмы вулічнага асвятлення апраўдаліся. Па яго словах, асветленасць вуліц адназначна змянілася ў лепшы бок. Раней часцяком былі нараканні па асветленасці асобных участкаў у горадзе, у прыватнасці, скрыжаванняў. Цяпер гэтыя праблемы там, дзе працуе «разумнае» асвятленне, вырашаны. Усё дыстанцыйна кіруецца, лёгка рэгулюецца, сістэма працы вельмі зручная.

«Калі раней усё вырашалася рубільнікам — і горад на ноч апускаўся ў цемру, то цяпер мы ў любы час можам аптымальна рэгуляваць асвятленне. Для нас найлепшы паказчык эфектыўнасці працы — гэта адсутнасць скаргаў з боку насельніцтва. І калі раней на гэты конт былі такія нараканні, то цяпер іх няма, — падкрэслівае Аляксандр Грыц. — Пра эканамічны складнік пакуль казаць не буду, не хачу забягаць наперад. Здзейснім маніторынг на працягу года і потым ужо прывядзем канкрэтныя лічбы».

Пакуль «разумным» асвятленнем ахоплены цэнтральныя гарадскія вуліцы і ўязныя шляхі ў Навагрудак. Але выканкам мае намер працягваць працу па пошуку сродкаў, каб забяспечыць такім жа сучасным асвятленнем увесь горад.

Віктар Таліш, галоўны энергетык Навагрудскай жыллёва-камунальнай гаспадаркі, адзначае камфорт пры абслугоўванні новага асвятлення:

«Сістэма ў працы вельмі зручная. Не трэба цяпер па званку на нешта рэагаваць, ездзіць ноччу па горадзе і глядзець, якія ліхтары не гараць. Мы адразу ўсё бачым у ІТ-дадатку і можам аператыўна дыстанцыйна рэагаваць».

Алена Сялевіч, першы намеснік старшыні Навагрудскага выканкама, адзначае важнасць інфармацыйнай працы пры ўкараненні інавацый. Па яе словах, «разумным» святлом ужо цікавяцца не толькі ў Наваградку, але і ў іншых рэгіёнах. І ў выканкаме гатовыя дзяліцца досведам.

Схема «разумнага» асвятлення вуліц Навагрудка

«Мы гатовыя да таго, каб да нас прыязджалі і цікавіліся тымі інавацыямі, якія ўжо ўкаранёныя ў горадзе. Нядаўна правялі на гэтую тэму семінар на базе нашага каледжа, і рыхтуемся да такога ж семінара ў горадзе Лідзе — кажа Алена Сялевіч. — Мы нацэленыя на тое, каб жыхары разумелі, што, як і навошта з’яўляецца ў горадзе. Так, яны бачылі маляўнічае адкрыццё вуліц з «разумным» святлом. Так, яны бачаць, што стала святлей і больш бяспечна. Але хацелася б, каб гараджане яшчэ і эканамічную выгаду разумелі. Так што працу ў гэтым кірунку будзем працягваць».

Па словах Аляксандра Грыца, праца ў сферы энергаэфектыўнасці сумесна з праектам «Зялёныя гарады», сапраўды, будзе працягнутая. Цяпер, напрыклад, ідзе падрыхтоўка да ўстаноўкі «разумных» лічыльнікаў уліку рэсурсаў у двух жылых шматкватэрных дамах.

Акрамя гэтага, у выканкаме высока ацанілі распрацаваную спецыялістамі праекта канцэпцыю трансфармацыі цэнтральнай часткі Навагрудка. Канцэпцыя, мяркуецца, дапаможа зрабіць цэнтр горада больш прывабным як для мясцовых жыхароў, так і для турыстаў.

«Таксама для нас бачыцца важным развіццё веларуху ў горадзе і адпаведнай для яго інфраструктуры. Будзем працаваць у гэтых напрамках, адшукваць сродкі на рэалізацыю новых праектаў», — заключае намеснік старшыні Навагрудскага выканкама Аляксандр Грыц.

Водгукі па сутнасці

Віктар Гаўрош, кіроўца:

— Пра маючую адбыцца замену свяцільнікаў мы ведалі (чыталі ў мясцовай газеце), і адразу заўважылі змены пасля іх мантажу. Жывем мы ў раёне «Паўднёвы Захад», а праца — на іншым канцы горада. Паколькі ўсе навучальныя ўстановы і прадпрыемствы пачынаюць працу ў 8.00, плынь людзей і машын па раніцах велізарная. Яшчэ год таму падчас ранішніх лютаўскіх туманаў разгледзець пешаходаў, якія ідуць на працу або на вучобу ў школу, было вельмі цяжка. Цяпер сітуацыя змянілася, новае асвятленне для нашага горада вельмі актуальнае. Ужо не баішся адправіць дачку ў школу самастойна, бо ўпэўнены, што яна ідзе па асветленай вуліцы.

Андрэй Хмель, намеснік Міністра прыродных рэсурсаў і аховы навакольнага асяроддзя Рэспублікі Беларусь. Аляксандра Салаўёва, Пастаянны прадстаўнік Праграмы развіцця ААН у Беларусі, і Сяргей Федчанка, старшыня Навагрудскага раённага выканаўчага камітэта, на цырымоніі адкрыцця гарадскіх вуліц, аснашчаных сістэмай «разумнага» светадыёднага асвятлення

Вольга Савасцюк, пешаход:

— Жыву ў прыватным сектары горада. Вельмі радуюць зменам, якія адбываюцца. Вядома ж, адразу заўважыла на цэнтральных вуліцах горада новыя свяцільнікі. Але яшчэ радуе, што і наш прыватны сектар, які на ўскраіне горада, таксама стаў святлей. Ужо зручна і позна вечарам прайсціся пешшу. Спадзяемся, з часам усе невялікія вуліцы таксама лепш будуць асвятлены.

Каментар Івана Філюціча, эксперта па энергаэфектыўнасці праекта «Зялёныя гарады»:

— Мы лічым, што досвед, атрыманы Навагрудкам пры мадэрнізацыі вулічнага асвятлення, будзе карысны і іншым беларускім гарадам. Усяго ў Беларусі эксплуатуецца не менш за 500 тысяч свяцільнікаў вулічнага асвятлення, і сумарнае спажыванне імі электраэнергіі складае адчувальную велічыню — дзясяткі мільёнаў кілават-гадзін у год. Значная частка названага абсталявання мае патрэбу ў мадэрнізацыі. А паслядоўнае павышэнне энергаэфектыўнасці вулічнага асвятлення з укараненнем сучасных святлодыёдных свяцільнікаў і сістэм аўтаматычнага кіравання дазволіць як знізіць спажыванне электраэнергіі і, такім чынам, выдаткі мясцовых бюджэтаў, так і павысіць узровень бяспекі і камфорту на вуліцах нашых гарадоў.

Уладзімір Міхайлаў

Выбар рэдакцыі

Грамадства

Што мяняецца з 1 снежня

Што мяняецца з 1 снежня

Вырасце памер пенсiй: па ўзросце, за выслугу гадоў, па iнвалiднасцi, з прычыны страты кармiцеля. 

Грамадства

​Што павiнны зрабiць на прадпрыемствах, каб папярэдзiць распаўсюджванне COVID-19

​Што павiнны зрабiць на прадпрыемствах, каб папярэдзiць распаўсюджванне COVID-19

Мiнiстэрства аховы здароўя распрацавала рэкамендацыi па прафiлактыцы каранавiруснай iнфекцыi ў арганiзацыях.

Грамадства

Бонусы для альтруiстаў могуць быць прадугледжаны законам аб валанцёрскай дзейнасцi

Бонусы для альтруiстаў могуць быць прадугледжаны законам аб валанцёрскай дзейнасцi

Пра гэтыя i iншыя прапановы ў законапраект аб валанцёрскай дзейнасцi разважалi эксперты падчас круглага стала.

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава.