Вы тут

Развiццё падзей праз COVID-19 ужо паказана ў кiно


Апошнiм часам адным з самых папулярных у анлайн-гледачоў запытам, якiмi звычайна становяцца, скажам, кiнанавiнкi альбо папулярныя серыялы ад HBO цi Netflix, была фантастычная карцiна 2011 года Стывена Содэрберга. Чаму раптам праз амаль дзесяць гадоў? І таму што ў фiльме тыя ж невядомы вiрус, маскi, пустыя палiцы ў крамах, пазбяганне кантактаў, закрытыя гранiцы, распрацоўка вакцыны, іншымі словамі, усё тое, што адбываецца цяпер у рэальнасцi, толькi па-мастацку гiпербалiзаванае.


I нават Кiтай як крынiца распаўсюджвання, i нават, уявiце, кажан — аўтары карцiны «Заражэнне» ў пэўным сэнсе прадказалi наш 2020-ы. Сачыць за гэтай фантазiяй, якая сёння спраўджваецца лiтаральна на вачах, надзвычай займальна, i рабiць гэта можна на стрымiнгавых платформах альбо проста ў сецiве.

Сцiвен Содэрберг, мiж iншым, — уладальнiк «Оскара» як найлепшы рэжысёр за фiльм «Трафiк» i аўтар досыць вядомых карцiн «Секс, хлусня i вiдэа», «Эрын Брокавiч», трылераў «Адзiнаццаць...», «Дванаццаць...» i «Трынаццаць сяброў Оўшэна», карацей, рэжысёр папулярны. I акцёраў ён выбiрае таксама вядомых — у адным толькi «Заражэннi» задзейнiчаны Гвiнэт Пэлтроу, Мэт Дэйман, Марыён Кацiяр, Джуд Лоу, Кейт Уiнслет, Лорэнс Фiшбёрн ды iншыя.

Рэжысёр паказвае адну працяглую здагадку, што адбывалася б у свеце, калi б у iм раптам стаў iмклiва распаўсюджвацца смяротны, дагэтуль невядомы вiрус. Праўда, асноўным месцам дзеяння з'яўляюцца, вядома ж, ЗША, вакцыну самаахвярна ствараюць таксама ў ЗША, а пагроза прыходзiць з Кiтая, што можа быць паказальным, бо ў масавым галiвудскiм кiно крынiца небяспекi часта адлюстроўвае актуальны парадак дня. Меркаванне пацвярджаецца тым, што ўрэшце кiтайцы бяруць у палон прадстаўнiцу Сусветнай арганiзацыi аховы здароўя, каб iм хутчэй даслалi вакцыну, якая б выратавала жыхароў iх роднай вёскi, — Кiтай такiм чынам выглядае скрозь драбнавата-адмоўным. А тут бач як атрымалася: ужо рэальны каранавiрус сапраўды пайшоў з гэтага рэгiёна.

Згодна з сюжэтам усё пачынаецца з некалькiх хворых у розных гарадах, якiя мусяць быць нейкiм чынам звязаныя, — адна з гераiнь прылятае з Ганконга дадому ў ЗША i хутка памiрае. Невядомая хвароба пачынае распаўсюджвацца, спецыялiсты збiраюць нарады, прадстаўнiк СААЗ адпраўляецца ў Кiтай, блогер хайпуе i зарабляе на рэкламе лекаў, бiёлагi мiж тым шукаюць сапраўдную вакцыну.

Гэты натуральны ланцужок падзей дапаўняе рэакцыя звычайных людзей, што праз блiзкую пагрозу разышлiся ўшчэнт, — крамы абрабавалi, у закрытыя ўжо кавярнi забралiся, за паёк пабiлiся. Вулiцы запоўнiлiся смеццем, прадукты сталi недаступныя, жыхары гарадоў «страцiлi» вясну, лета, а часам i сумленне i так далей. Распаўсюджанне хваробы стала нагодай на цалкам рэалiстычнай аснове стварыць напалову апакалiптычны свет, i ён выглядае праўдзiвым.

Так, вiрус у «Заражэннi» — на патрэбу вiдовiшчнасцi i драматычнасцi даволi крыважэрная i бескантрольная з'ява, пра COVID-19 нечага настолькi ж кардынальнага зняць было б нельга, i дзякуй богу. Але, тым не менш, нават калi сённяшняя сiтуацыя па насычанасцi не дацягвае да сiтуацыi ў карцiне Содэрберга, памiж iмi шмат агульнага. Аб гэтае агульнае — акцэнты на дотыках, «шпiталi» ў спартыўных залах, абмеркаванне закрыцця школ i хто будзе сядзець з дзецьмi — ты ўвесь час спатыкаешся.

«Заражэнне», як i сённяшняя рэальнасць, паказвае тонкую мяжу памiж цывiлiзаванасцю i нецывiлiзаванасцю, а ў адлюстраванае вар'яцтва ўкрапляе адэкватных, высакародных i нават самаахвярных людзей. Некалькi раўнапраўных герояў — на iх рэжысёр зрабiў акцэнт i запрасiў на ролi ў тым лiку згаданых ужо вядомых акцёраў — паказваюць, наколькi адрозныя тыпы паводзiн праяўляюць сябе ў крытычнай сiтуацыi. Мы нешта падобнае, толькi ўвасобленае ўжо ў тысячах галасоў, бачым i сёння — вось таксама прычына, чаму «Заражэнне» выглядае прадбачаннем, няхай i нескладаным.

У Содэрберга па законах папулярнага кiно ўсё канчаецца адносна добра — хэпi-энд увасабляецца ў надзеi, якую дае старт продажу вакцыны. Гэта таксама пераклiкаецца з рэальнасцю — цяпер трэба знайсцi прадказальна-фантастычны фiльм аб тым, што адбываецца ў свеце ўжо пасля пандэмii.

Iрэна КАЦЯЛОВIЧ

Загаловак у газеце: Заразiцца i забыцца

Выбар рэдакцыі

Грамадства

Андрэй Худык: Неабходная мабілізацыя ўсіх узроўняў улады, грамадства і бізнесу для сумесных дзеянняў па ахове прыроды

Андрэй Худык: Неабходная мабілізацыя ўсіх узроўняў улады, грамадства і бізнесу для сумесных дзеянняў па ахове прыроды

Ад таго, наколькі беражліва людзі ставяцца да прыроды, залежыць якасць іх жыцця, здароўе і нават дабрабыт. 

Грамадства

У зоне павышанай небяспекі. Як працуе выбуховатэхнічны цэнтр унутраных войскаў МУС

У зоне павышанай небяспекі. Як працуе выбуховатэхнічны цэнтр унутраных войскаў МУС

Пра асаблівасці работы мы пагутарылі з намеснікам начальніка ўстановы Максімам Кулем.

Грамадства

Стаўленне «выкарыстаў — выкiнуў» трэба мяняць на «адсарцiраваў — перапрацаваў»

Стаўленне «выкарыстаў — выкiнуў» трэба мяняць на «адсарцiраваў — перапрацаваў»

Пахаванне адходаў — самы просты i танны спосаб пазбавiцца ад iх, аднак ён шкодзiць наваколлю i здароўю чалавека.

Грамадства

Новы кантэнт для лета. Чым заняць дзяцей на 92 днi

Новы кантэнт для лета. Чым заняць дзяцей на 92 днi

У перыяд летніх канікулаў для школьнiкаў i студэнтаў падрыхтаваны розныя цiкавыя мерапрыемствы, у тым лiку шмат з iх — анлайн.