У гэты няпросты перыяд сацыяльныя службы звяртаюць асаблівую ўвагу на людзей старэйшага ўзросту і людзей з інваліднасцю, каб мінімізаваць для іх рызыку захворвання на каранавірусную інфекцыю. Дапамога ўжо аказана больш чым 20,5 тысячы чалавек. Пра гэта паведаміў намеснік міністра працы і сацыяльнай абароны Аляксандр РУМАК.
Сацыяльная служба разам са сваімі партнёрамі выканала ўжо больш за 20,5 тысячы заявак пажылых людзей і людзей з інваліднасцю па дастаўцы на дом прадуктаў харчавання і сродкаў першай неабходнасці. У цэлым жа, як заявіў намеснік міністра, гаворка ідзе пра дапамогу вельмі вялікай колькасці людзей: у краіне налічваецца 830 тысяч пажылых і інвалідаў, якія жывуць адны, з іх у 167 тысяч наогул няма блізкіх сваякоў.
Па словах Аляксандра Румака, да 30 сакавіка адзінокія пажылыя і інваліды па ўсёй краіне былі праінфармаваныя па тэлефоне аб дапамозе, якая ім прапануецца, таксама прачытаць пра яе людзі маглі ў памятках, якія распаўсюджваліся па паштовых скрынях. Гэтым займаліся сацработнікі разам з валанцёрамі Чырвонага Крыжа і БРСМ.
«Мы прапаноўваем ім дапамогу ў забеспячэнні ўсім неабходным, для таго каб у іх не было патрэбы выходзіць са свайго дому», — заявіў намеснік міністра працы і сацабароны.
Работа сацыяльнай службы праходзіць у цесным супрацоўніцтве з Беларускім таварыствам Чырвонага Крыжа (БТЧК), маладзёжнымі арганізацыямі, перш за ўсё БРСМ, прафсаюзнымі арганізацыямі і некаторымі іншымі, якія вырашылі паўдзельнічаць у гэтым. У ролі каардынатараў выступаюць ТЦСАНы. Дапамогу па дастаўцы прадуктаў харчавання і лекаў аказваюць сацыяльныя работнікі і валанцёры, і з кожным днём яна набірае абароты.
Калі яшчэ тыдзень таму ТЦСАНы разам са сваімі партнёрамі, грамадскімі арганізацыямі аказалі дапамогу прыблізна тром тысячам чалавек, то ўжо ў мінулую пятніцу гэтую дапамогу атрымалі 9,5 тысячы тых, хто мае патрэбу. Па стане на канец дня 5 красавіка цэнтры сацабслугоўвання выканалі 4525 заявак ад пажылых грамадзян і людзей з інваліднасцю, а БТЧК, БРСМ, прафсаюзы, сельскія выканкамы і гандлёвыя ўстановы — 15 981 заяўку. Усяго ўжо 20,5 тысячы чалавек атрымалі дапамогу. Акрамя таго, 95 тысяч пажылых грамадзян атрымліваюць дома сацыяльныя паслугі. Такім чынам, рознымі відамі дапамогі ахоплена 115,5 тысячы чалавек.
У гэтыя дні часова прыпынена работа аддзяленняў дзённага знаходжання для пажылых грамадзян і маладых інвалідаў. У дамах-інтэрнатах, аддзяленнях кругласутачнага знаходжання спачатку было абмежавана наведванне, але на мінулым тыдні ўведзена поўная забарона на ўваход старонніх, а таксама адменены масавыя мерапрыемствы. Адначасова для ўсіх работнікаў інтэрнатаў устаноўлены масачны рэжым, яны абавязаны выкарыстоўваць пальчаткі пры абслугоўванні пажылых людзей. Заступаючы на змену, работнікі мераюць тэмпературу — гэтыя паказанні запісваюцца. Сацработнікі, якія аказваюць паслугі з выездам на дом, павінны весці дзённікі самакантролю.
У выпадку ўзнікнення праблемных сітуацый, а таксама з прапановамі па ўдасканаленні арганізацыі дастаўкі прадуктаў харчавання і медыкаментаў сацыяльнай службай можна тэлефанаваць у Міністэрства працы і сацыяльнай абароны на нумар (8 017) 222-49-29, а таксама ў абласныя камітэты па працы, занятасці і сацыяльнай абароне:
Званкі прымаюцца з 9.00 да 18.00 у рабочыя дні.
Калі ласка, не блытайце гэтыя тэлефоны з гарачымі лініямі, па якіх можна замовіць прадукты і лекі на дом.
Святлана БУСЬКО
Фота Яўгена ПЯСЕЦКАГА
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
