Вы тут

Адказныя за Перамогу


Святкаванне 75-годдзя Перамогі — добрая нагода для таго, каб яшчэ раз звярнуцца да праблемы захавання гістарычнай памяці ў сённяшнім дынамічным грамадстве і паразважаць пра ролю ў гэтым успамінаў удзельнікаў ваенных падзей, а таксама ўзнаўлення аповедаў, якія захоўваюцца ў сем’ях і перадаюцца з пакалення ў пакаленне.

Для таго, каб памяць заставалася жывой і эмацыянальна насычанай, мала афіцыйнай хронікі і фактаў, замацаваных у падручніках па гісторыі. Тым больш што ведаем мы далёка не ўсё, што адбывалася, — застаецца безліч безыменных магіл, нявысветленых лёсаў і неадназначных абставін.

Нагадаем: нават пра подзвіг абаронцаў Брэсцкай крэпасці шырокая грамадскасць даведалася далёка не адразу. Велізарную ролю ў гэтым адыграў пісьменнік і журналіст, былы франтавік Сяргей Смірноў, які сабраў і выклаў гісторыі многіх герояў-пагранічнікаў у кнізе «Брэсцкая крэпасць», што выйшла ў 1954 годзе.

Дарэчы, Сяргей Смірноў шмат супрацоўнічаў з Міністэрствам абароны СССР. Дзякуючы яго нястомнай дзейнасці 68 удзельнікаў абароны Брэста былі ўзнагароджаны ордэнамі і медалямі. Але галоўнае — подзвіг пагранічнікаў стаў вядомы кожнаму жыхару СССР і ініцыіраваў шэраг навуковых прац, шмат мастацкіх і публіцыстычных твораў адпаведнай тэматыкі.

І ў наш час гераізм абаронцаў Брэсцкай крэпасці працягвае натхняць навукоўцаў, мастакоў, празаікаў, паэтаў і музыкантаў. А для кожнага з нас ён і сёння служыць прыкладам неверагоднай сілы духу і здольнасці праяўляць найлепшыя чалавечыя якасці, нягледзячы на абставіны.

Гісторыя адкрыцця для шырокай грамадскасці подзвігу пагранічнікаў Брэста яшчэ раз падкрэслівае вырашальную ролю мастацкай творчасці ў гераізацыі мінулага краіны, у далучэнні будучых пакаленняў да вопыту папярэднікаў, у перадачы высокіх маральных каштоўнасцей ад продкаў нашчадкам.

Асаблівае значэнне гэта набывае цяпер, калі, дзякуючы развіццю тэхналогій, кожны з нас можа быць не толькі спажыўцом, карыстальнікам, але і стваральнікам інфармацыйнага кантэнту. У свеце набывае папулярнасць новы міждысцыплінарны напрамак даследаванняў — «memory studies», прадметам якога з’яўляецца сацыяльная памяць, а каштоўнай крыніцай інфармацыі — кожны чалавек.

Адпаведна, у інфармацыйнай прасторы, у сеціве, пастаянна ўзнікаюць новыя пляцоўкі для абмену гісторыямі, звязанымі з падзеямі Вялікай Айчыннай, і шырэй — Другой сусветнай вайны. Аповеды прадстаўнікоў старэйшых пакаленняў, якія да таго былі духоўным скарбам асобных сем’яў, цяпер робяцца агульнай каштоўнасцю, вопытам, дакрануцца да якога можа кожны з нас.

Стваральнікамі адной з такіх пляцовак сталі беларускія пагранічнікі. Гэта невыпадкова. Сённяшнія абаронцы граніц бачаць сваім абавязкам уганараванне подзвігу славутых папярэднікаў — у першую чаргу гераічных абаронцаў Брэсцкай крэпасці. Для таго каб актуалізаваць памяць пра падзеі Вялікай Айчыннай, зрабіць іх больш блізкімі і зразумелымі для сённяшняй моладзі, існуе маштабны праект «Мужнасцю сваёй у бяссмерце крочыўшым», прысвечаны памяці герояў-пагранічнікаў, абаронцаў Брэста.

Сёлета ў межах гэтага праекта на базе Інстытута пагранічнай службы Рэспублікі Беларусь праводзіцца конкурс эсэ для падлеткаў і моладзі (ад 13 да 17 гадоў) «Мы адказныя за Перамогу». Арганізатары творчага спаборніцтва спадзяюцца, што яно стане яшчэ адной магчымасцю для адораных хлопцаў і дзяўчат праявіць сябе. А таксама нагадае нам усім, што летапіс Вялікай Айчыннай яшчэ не завершаны.

Народная памяць пра вайну — не толькі апісанні буйных вайсковых аперацый, але ў першую чаргу — памяць пра людзей. Пра тых, хто загінуў на фронце і ў тыле, пра тых, хто жыў, гадаваў дзяцей, працаваў на акупаваных тэрыторыях, і пра тых, хто вярнуўся з перамогай у разбураныя гарады і вёскі і пачаў аднаўляць пасляваенную Беларусь.

Ёсць яшчэ вельмі многа гісторый, якія павінны быць пачутымі. І шмат людзей, якім кожны з нас павінен сказаць «дзякуй».

Марыя ШАМЯКІНА

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.