Вы тут

Хатняя энцыклапедыя


Незвычайныя спосабы афарбоўкі яек

З набліжэннем Вялікадня кожны задумваецца, як бы і чым пафарбаваць яйкі. Калі традыцыйныя спосабы надакучылі, трэба шукаць нешта новае.

Каб яйкі не патрэскаліся падчас варкі, іх загадзя трэба дастаць з халадзільніка, каб яны прагрэліся да пакаёвай тэмпературы. Не пашкодзіць і бабуліна парада: у ваду можна дадаць сталовую лыжку солі.

З дапамогай сурвэтак

Спатрэбіцца: яйкі, 2-5 колераў фарбы для яек ці харчовая фарба, папяровыя сурвэткі, ватовыя палачкі.

Для пачатку яйкі добра прамыць вадой з дапамогай вяхоткі. Затым пакласці іх у каструлю, заліць вадой, дадаць соль і варыць. Калі вада закіпіць, патрымаць на невялікім агні 10 хвілін, затым зліць ваду, заліць халоднай вадой і астуджаць 5-10 хвілін. Пасля дастаць яйкі з вады і сушыць. Цяпер яны гатовыя для афарбоўкі. Фарбу развесці вадой і ў кожную ёмістасць пакласці ватовую палачку. Яйкі загарнуць у сурвэтку, прамачыць сурвэтку фарбай (з дапамогай палачкі). Важна, каб уся сурвэтка прамокла і прыліпла да яйка, пакідаючы на шкарлупіне плямы. Пакласці яйкі на талерку і пакінуць на 20—30 хвілін. Затым зняць паперу, яйкі прамыць, прасушыць і змазаць алеем. Яйкі атрымліваюцца далікатных вясновых колераў. Гэты метад падыходзіць тым, хто любіць займацца творчасцю і маляваць.

...пены для галення

Спатрэбіцца: яйкі, 2-5 колераў фарбы для яек ці харчовая фарба, пена для галення, папяровыя ручнікі.

Яйкі адварыць і падрыхтаваць, як і ў папярэднім рэцэпце. На талерку выціснуць пену для галення з разлікам, каб пена пакрыла яйкі з усіх бакоў. Час для творчасці! На пену па жаданні і гусце накапаць фарбу. Драўлянай палачкай фарбу змяшаць, робячы ўзор. Затым акуратна апусціць яйкі ў пену і лыжкай або сіліконавай лапаткай размазаць пену па яйках, каб яны былі цалкам пакрытыя ёй. Праз 20 хвілін дастаць яйкі з пены з дапамогай лыжкі і перакласці на талерку, пакрытую папяровым ручніком. Пачакаць яшчэ 10 хвілін, затым прамыць яйкі пад струменем вады, прасушыць і змазаць алеем. Гэты спосаб афарбоўкі спадабаецца дзецям, бо працэс маляўнічы і займальны.

...зялёнкі і цыбульнай шалупіны

Раствор зялёнкі — гэта арганічная фарба.

Спатрэбіцца: яйкі, 1 ст. л. зялёнкі, 1 ст. л. солі, жменя цыбульнай шалупіны, марля, нітка, лісточкі, кветкі або іншыя прыродныя матэрыялы.

Для пачатку яйкі добра прамыць вадой з вяхоткай. Цыбульную шалупіну нарэзаць на дробныя кавалачкі і падрыхтаваць марлю, нарэзаўшы яе на квадраты патрэбнага памеру. Яйкі змачыць вадой, абваляць у шалупіне цыбулі ці прыляпіць лісточкі або кветачкі. Кожнае яйка моцна завязаць у марлю, замацоўваючы яе ніткай. Яйкі пакласці у каструлю, заліць вадой. У ваду дадаць соль, зялёнку і варыць. Калі вада закіпіць, яйкі варыць на невялікім агні яшчэ 10 хвілін, пасля ваду зліць, заліць халоднай вадой і астуджаць 5-10 хвілін. Затым дастаць з вады, разрэзаць марлю, прамыць пад струменем вады і змазаць алеем.

Такім жа спосабам можна пафарбаваць яйкі, замяніўшы зялёнку сінькай. Яйкі атрымліваюцца насычанага колеру, з прыгожым узорам.

Маскі сваімі рукамі

Што рабіць, калі спатрэбілася выйсці ў люднае месца, маскі пад рукой няма, а шукаць яе ў аптэках не атрымліваецца? Можна зрабіць яе сваімі рукамі. Для некаторых з іх не патрэбныя ні швейная машынка, ні клей — такія маскі робяцца менш чым за хвіліну. Асноўным матэрыялам становяцца папяровыя ручнікі і туалетная папера, а таксама марля, антыбактэрыяльныя сурвэткі.

Абарона за хвіліну

Нам спатрэбяцца аднаразовыя кухонныя ручнікі і папярэдне нарэзаныя вяроўкі даўжынёй каля паўметра. Адрываем тры лісты і складваем так, каб атрымаўся трохслаёвы квадрат. Згінаем яго напалавіну і трохі адгінаем сярэдзінку, робячы зморшчыну, каб маска добра сядзела на носе. Бяром скотч і на палову яго шырыні праклейваем яе па краях з абодвух бакоў. Пераварочваем і кладзём на астатнюю частку скотча вяроўку так, каб па баках засталіся аднолькавыя завязкі. Пасля гэтага загінаем скотч паабапал вяровак. Такая аднаразовая маска прызначана для нядоўгага выкарыстання, скажам, адной паездкі ў грамадскім транспарце, пасля чаго яе трэба ўтылізаваць.

З туалетнай паперы

У многіх краінах падчас успышкі каранавіруса з крам у першую чаргу знікла туалетная папера. Пайшлі чуткі, што туалетная папера, сурвэткі і папяровыя ручнікі робяцца з той жа сыравіны, што і медыцынскія маскі. Зрабіць маску з туалетнай паперы можна гэтаксама, як і з папяровых ручнікоў, толькі згортваць яе давядзецца не ў тры слаі, а ў шэсць. Скотчам прымацоўваем вяровачкі і выкарыстоўваем у грамадскім транспарце.

Ватна-марлевая павязка

Маска, знаёмая з дзяцінства, калі ў шырокім продажы яшчэ не было аднаразовых медыцынскіх масак. Нам спатрэбяцца кавалкі марлі памерам 90*60 см і ваты памерам 15*15, таўшчынёй 1 см. Вату размяшчаем пасярэдзіне адрэзка марлі, падхінаем краі марлі так, каб атрымаліся тры пласты. Гатовую маску сшываем і прымацоўваем да яе вуглоў дзве пары завязак. Таксама марлю можна замяніць бінтам, складзеным у некалькі слаёў. Такую маску можна выкарыстоўваць шмат разоў, дастаткова пасля кожнага прымянення памыць яе і папрасаваць з двух бакоў.

Павязка з марлі

Дыхаецца ў ёй крыху лягчэй. Але марлю трэба скласці не ў тры слаі, а ў шэсць. Памер марлевай маскі ў гатовым выглядзе не больш за 15*20 см, інакш можна закрыць вочы. Прышываем завязкі або гумкі — марлевая маска гатовая. Яе таксама можна мыць і прасаваць.

Шматразовая з фільтрам

Для такой маскі спатрэбіцца квадратны адрэз шчыльнай бавоўны або лёну 45*45 см, дзве гумкі даўжынёй прыкладна па 18-20 см.

Тканіну складаем удвая, пасярэдзіне кладзём фільтр — нятканы матэрыял, напрыклад, высушаную вільготную сурвэтку, туалетную паперу або аднаразовы ручнік. Складваем тканіну ўдвая і збіраем гармонікам, зрабіўшы зморшчыны, як у аптэчных масках. Краі згінаем і прашываем уручную або на швейнай машынцы так, каб зверху засталася кішэнька для фільтра. Прасоўваем гумкі і завязваем іх вузельчыкам. Перавага такіх масак — у магчымасці самому выбраць дызайн, колер або нават упрыгожыць сродак абароны аплікацыяй.

Важна памятаць, што самаробныя маскі, як і аднаразовыя медыцынскія, трэба насіць так, каб яны шчыльна прылягалі да твару, цалкам закрывалі рот і нос. Маску можна выкарыстоўваць не больш за дзве-тры гадзіны, у адваротным выпадку яна можа спрыяць распаўсюджванню вірусаў, якія на ёй збіраюцца. Пасля некалькіх гадзін нашэння аднаразовыя маскі ўтылізуюць, а шматразовыя мыюць з антыбактэрыяльным мылам і прасуюць з двух бакоў. Знятую маску надзяваць паўторна не варта. Таксама не рэкамендуецца дакранацца нямытымі рукамі да надзетай маскі. І памятайце: вочы ў такой масцы ўсё роўна застаюцца неабароненыя, таму нават калі вашы рот і нос закрытыя, не дакранайцеся рукамі да вачэй.

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.

Калейдаскоп

Вясёлыя гісторыі чытачоў

Вясёлыя гісторыі чытачоў

Класiкаў трэба ведаць…, Быў бы араты, будзе й прыганяты, Па малiну…