Вы тут

У маі менш рэгіструюць шлюбы, але не з-за каранавіруса


У канцы лютага ў Беларусі быў зарэгістраваны першы выпадак каранавіруснай інфекцыі. Яе знайшлі ў іранскага студэнта БНТУ па імені Парса. Два тыдні ў бальніцы — і нечаканая папулярнасць: прамыя эфіры ў Іnstagram глядзеў нават медперсанал бальніцы. Яны ведалі, што хлопец і там расказвае людзям, як абараніць сябе ад каранавіруса.


7 сакавіка першыя аналізы студэнта на COVІD-19 сталі паказваць адмоўны вынік, а 12 сакавіка маладога чалавека адпусцілі дадому. Як гаворыцца, «да вяселля зажыло». І сапраўды, аказалася, што за дзень да таго, як у Парса выявілі вірус, малады чалавек са сваёй дзяўчынай падалі заяву ў загс, каб у маі зарэгістраваць шлюб. Карэспандэнт «СГ» даведалася, якія меры прымаюць работнікі загса для таго, каб прадухіліць распаўсюджванне віруса пасля таго, як Сусветная арганізацыя аховы здароўя абвясціла пандэмію.

Адной з прыкмет таго, што ў краіне — эпідэмія віруса з'яўляецца ўстаноўка ў грамадскіх месцах дазатараў з дэзынфіцыруючымі сродкамі. Пры ўваходзе ў загс Маскоўскага раёна Мінска таксама ўстаноўлены дазатар, таму я ўжо «на аўтамаце» апрацавала рукі. Пасля абеду ва ўсім будынку стаіць ледзь прыкметны «водар» гэтых сродкаў.

— Сёння павялічылася нагрузка на тэхнічак, якім прыходзіцца прыбіраць часцей, чым раней, — расказвае начальнік аддзела загса Наталля ФІЛІМОНАВА. — У будынку прыбіраем тры разы на дзень, апрацоўваем нават ручкі дзвярэй спецыяльнымі сродкамі. Супрацоўнікі ўстановы вядуць прыём у масках і пальчатках, каб абараніць не толькі сябе, але і наведвальнікаў.

Загс працуе ў звычайным рэжыме: з аўторка да суботы. У гэтыя дні можна падаць заяву на рэгістрацыю шлюбаў, зарэгістраваць дзіця і развесціся. Цырымонію шлюбу можна правесці ў любы дзень, але ўрачыстую — толькі ў пятніцу і суботу. Маладыя людзі, якія запланавалі ўрачыстасць загадзя і не рашаюцца адмяніць, прыслухоўваюцца да рэкамендацый супрацоўнікаў загса:

— Традыцыйныя вяселлі, з вялікай колькасцю гасцей, мы прапануем перанесці на час, калі скончыцца пандэмія, — расказвае Наталля Філімонава. — Звычайна на такія вяселлі прыходзіць каля 70 чалавек, там шмат дзяцей і пажылых людзей. Маладыя з разуменнем ставяцца да рэкамендацый і некаторыя пераносяць заключэнне шлюбу на верасень. Іншыя проста скарачаюць колькасць гасцей. У выніку прыходзіць не больш за трыццаць чалавек.

У параўнанні з мінулым годам колькасць шлюбаў у гэтым месяцы трошкі паменшылася, але супрацоўнікі загса гэта звязваюць, хутчэй, з народнай прыкметай: маўляў, ажэнішся ў маі — будзеш «маяцца» ўсе жыццё. А гэты май яшчэ і ў высакосным годзе — такая акалічнасць не надае ўпэўненасці маладым, якія вераць у прыкметы.

Сёння хлопцы і дзяўчаты прыходзяць пісаць заявы на заключэнне шлюбу на канец ліпеня і жнівень.

— У нашым загсе можна запісацца на ўрачыстую рэгістрацыю шлюбу загадзя, — расказвае начальнік загса. — Пары, якія запісваліся яшчэ летась, прыходзяць, каб пацвердзіць свае намеры пажаніцца ў выбраны дзень. Усе, хто некалі забраніраваў даты, спадзяюцца, што ў іх усё атрымаецца і вяселле адбудзецца.

У фае загса збіраюцца госці. Людзей няшмат — чалавек восем. Яны чакаюць прыезду маладых. Пажылы мужчына абураецца:

— Нейкае глупства прыдумалі: маскі, пальчаткі, дэзрастворы. Ну вось навошта здаровым насіць маску? Яны нікога не заражаюць. Прыйшоў у загс, а нас тут сустракаюць у масках! Адчуванне, што зараз павязуць на «хуткай». Мне гэта не падабаецца. Колькі гэтых вірусаў ходзіць круглы год, што, цяпер заўсёды «маскіравацца»?...

— Не згодны з табой, — парыруе малады чалавек, запрошаны на вяселле. — Мне, напрыклад, вельмі прыемна, што пра нашу бяспеку паклапаціліся нават у загсе. Сюды прыходзіць шмат людзей. Супрацоўнікі маглі заразіцца каранавірусам, але яны ў масках, таму нават калі хворыя, то шанцаў нас заразіць у іх менш. Добра, што людзі прыслухоўваюцца да рэкамендацый урачоў і трымаюцца правілаў гігіены.

Хутка з'яўляюцца маладыя. Спрэчка адразу заціхае, людзі пачынаюць фатаграфавацца. Маладыя Алег і Ксенія не стрымліваюць свае шчаслівае хваляванне.

— Мы з хваляваннем чакалі гэты дзень, — расказвае жаніх. — Падалі заявы, калі яшчэ не было абвешчана пандэміі, і вырашылі ўжо не адмяняць. Вельмі перажывалі, што з-за віруса ўлады прымуць рашэнне ўвогуле адмяніць рэгістрацыю шлюбаў. З самага пачатку мы не планавалі шмат гасцей, таму і не прыйшлося скарачаць колькасць запрошаных на рэгістрацыю. Але святкаванне вяселля ў рэстаране ўсё ж адмянілі, каб не падвяргаць небяспецы нашых пажылых сваякоў. Любім іх і таму турбуемся.

Беларусы падчас пандэміі могуць зарэгістраваць свае адносіны, у адрозненне ад некаторых іншых краін. Так, напрыклад, у Расіі былі ўведзены абмежаванні на рэгістрацыю шлюбаў. Давалі дазвол толькі ў выключных выпадках, але рэгістрацыя праходзіла без запрошаных.

Наталля ТАЛІВІНСКАЯ

Загаловак у газеце: Вяселле насуперак

Выбар рэдакцыі

Грамадства

Андрэй Худык: Неабходная мабілізацыя ўсіх узроўняў улады, грамадства і бізнесу для сумесных дзеянняў па ахове прыроды

Андрэй Худык: Неабходная мабілізацыя ўсіх узроўняў улады, грамадства і бізнесу для сумесных дзеянняў па ахове прыроды

Ад таго, наколькі беражліва людзі ставяцца да прыроды, залежыць якасць іх жыцця, здароўе і нават дабрабыт. 

Грамадства

У зоне павышанай небяспекі. Як працуе выбуховатэхнічны цэнтр унутраных войскаў МУС

У зоне павышанай небяспекі. Як працуе выбуховатэхнічны цэнтр унутраных войскаў МУС

Пра асаблівасці работы мы пагутарылі з намеснікам начальніка ўстановы Максімам Кулем.

Грамадства

Стаўленне «выкарыстаў — выкiнуў» трэба мяняць на «адсарцiраваў — перапрацаваў»

Стаўленне «выкарыстаў — выкiнуў» трэба мяняць на «адсарцiраваў — перапрацаваў»

Пахаванне адходаў — самы просты i танны спосаб пазбавiцца ад iх, аднак ён шкодзiць наваколлю i здароўю чалавека.

Грамадства

Новы кантэнт для лета. Чым заняць дзяцей на 92 днi

Новы кантэнт для лета. Чым заняць дзяцей на 92 днi

У перыяд летніх канікулаў для школьнiкаў i студэнтаў падрыхтаваны розныя цiкавыя мерапрыемствы, у тым лiку шмат з iх — анлайн.