Вы тут

Куды трэба звяртацца, калі ў вёсцы з'явіліся праблемы з калодзежнай вадой


Пераважная большасць беларусаў мае доступ да цэнтралізаванага водазабеспячэння. Аднак толькі прадпрыемствы ЖКГ абслугоўваюць 23 811 шахтавых калодзежаў па ўсёй краіне. Мы ж даведаліся, як у гэтым кірунку ідуць справы ў Мінскай вобласці і куды трэба звяртацца, калі ў вёсцы з'явіліся праблемы з калодзежнай вадой.


Фота Анатоля Клешчука.

На Міншчыне прадпрыемствы жыллёва-камунальнай гаспадаркі абслугоўваюць 2848 шахтавых калодзежаў, 2802 з якіх знаходзяцца ў сельскіх населеных пунктах. Грамадскіх калонак, якія падключаны да цэнтральных сетак водазабеспячэння, значна болей — 5701, з якіх 3777 — у вёсках і аграгарадках. Дарэчы, у цэлым па краіне камунальнікі абслугоўваюць 35 427 водаразборных калонак.

— Усе гэтыя аб'екты прадпрыемствы абслугоўваюць за ўласныя сродкі ці за кошт сродкаў бюджэту, але ж у Мінскай вобласці ёсць калонкі і калодзежы, якія не абслугоўвае ніхто, і ў гэтым выпадку адказнасць за іх нясе ўжо сельскі выканаўчы камітэт, — адзначае начальнік аддзела водаправодна-каналізацыйнай гаспадаркі ЖКГ Мінскай вобласці Дар'я БАЖУТАВА. — Таму, калі ў жыхароў вёскі ўзнікаюць нейкія праблемы з водазабеспячэннем, трэба звяртацца да супрацоўнікаў сельвыканкама, якія паведамяць, хто абслугоўвае той ці іншы калодзеж ці калонку.

Што ж датычыцца абслугоўвання такіх аб'ектаў з боку прадпрыемстваў ЖКГ, то ў Мінскай вобласці поўны агляд робяць перад асенне-зімовым перыядам. Слесары, сантэхнікі, інжынеры і майстры выконваюць неабходныя работы — магчыма, недзе можа спатрэбіцца зварка, ачыстка ці пафарбоўка. У любым выпадку спецыялісты павінны праверыць гатоўнасць усіх аб'ектаў.

— У рамках маніторынгу раз у квартал ва ўсіх калонках і калодзежах ваду правяраюць на якасць, хтосьці з прадпрыемстваў робіць гэта самастойна ва ўласнай лабараторыі, у каго яе няма — заключае дагавор з санітарнымі службамі, — тлумачыць Дар'я Юр'еўна. — Калі ж у калодзежы вада не адпавядае якасці, напрыклад, там знайшлі вялікую колькасць нітратаў, то яго павінны закрыць і забяспечыць жыхарам падвоз чыстай пітной вады.

За ваду ў калодзежах ніхто не плаціць, з жыхарамі нават ніхто не заключае дагавор на іх абслугоўванне. Але водаразборных калонак гэта не датычыцца — з жыхарамі заключаюць дагавор, у якім прапісаны нарматыў спажывання вады (35 літраў на чалавека ў суткі. — «МС»), за які грамадзянін і плаціць. Калі ж нарматыў перавышаюць, то ўсе выдаткі, як і па абслугоўванні калодзежаў, звычайна нясуць прадпрыемствы ЖКГ.

Больш за ўсё такіх аб'ектаў прыпадае на Барысаўводаканал — прадпрыемства абслугоўвае 1754 калонкі і 541 шахтавы калодзеж. Канешне, у раёне ёсць аб'екты водазабеспячэння і каналізацыі, якія абслугоўваюць і іншыя прадпрыемствы, але гэта ніяк не датычыцца сельскіх выканаўчых камітэтаў.

Фота аўтара.

Усе калонкі і калодзежы супрацоўнікі водаканала абслугоўваюць згодна з пастановай Міністэрства ЖКГ ад 12 мая 2006 года № 22 (у рэдакцыі 8 ліпеня 2019 года № 9) «Пра парадак правядзення планава-папераджальнага рамонту на цэнтралізаваных сістэмах пітнога водазабеспячэння і водаадвядзення» і «Правіламі тэхнічнай эксплуатацыі сістэм пітнога водазабеспячэння і водаадвядзення (каналізацыі) населеных пунктаў», якія былі зацверджаны 594-й пастановай Саўміна ад 4 верасня 2019 года.

— Кожны год на прадпрыемстве мы зацвярджаем гадавыя планы на правядзенне работ на аб'ектах водазабеспячэння і водаадвядзення і план работ па санітарнай ачыстцы і дезынфекцыі шахтавых калодзежаў, — адзначае дырэктар ДП «Барысаўводаканал» Лявонцій ШАПАВАЛ. — Нарматыў на ваду з вулічнай калонкі цяпер складае 35 літраў на чалавека ў суткі, а плата за адзін кубаметр — 0,9384 рубля. Аднак у перыяд паліву агародніны (з 15 красавіка да 31 жніўня) жыхары дадаткова плацяць за паліў свайго участка.

Як адзначылі на прадпрыемстве, бягучы рамонт і ўтрыманне грамадскіх шахтавых калодзежаў уключаны ў пералік работ па добраўпарадкаванні — таму райвыканкам абавязаны кампенсаваць прадпрыемству ўсе затраты. Дарэчы, менавіта таму жыхары ніяк і не плацяць за абслугоўванне калодзежаў.

— Зараз жа мы праводзім шмат работы, каб скараціць колькасць водаразборных калонак, але толькі на тых участках водаправоднай сеткі, дзе ёсць магчымасць падключыць дамы да цэнтралізаванага водазабеспячэння, — кажа Лявонцій Міхайлавіч.

Аднак пэўныя праблемы ў абслугоўванні такіх аб'ектаў у Барысаўскім раёне ўзнікаюць і з-за таго, што яны далёка знаходзяцца адзін ад аднаго, таму не заўсёды атрымліваецца аператыўна рэагаваць на аварыйныя выпадкі. Кіраўнік прадпрыемства адзначае, што пакінуць заяўку, калі ёсць нейкі збой з водазабеспячэннем, як у горадзе, так і ў вёсцы, можна праз дыспетчарскую водаканала ці праз службу 115.

У Барысаўскім раёне ёсць населеныя пункты, дзе жалеза ў вадзе знаходзіцца больш, чым патрэбна (больш за 1 мг на адзін літр, пры нарматыве 0,3), а нітраты таксама перавышаюць адпаведны нарматыў (болей за 45 мг/л). Менавіта таму ў Барысаўскім раёне вядзецца пэўная работа ў гэтым кірунку, і да 2025 года там плануюць пабудаваць 21 станцыю абезжалезвання і 12 артэзіянскіх свідравін.

Валерыя КІСЛАЯ

Загаловак у газеце: Чыстай вады напіцца...

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.