Вы тут

ФК «БАТЭ» перамог у фінале Кубка Беларусі па футболе


Футбольны клуб «БАТЭ» з Барысава ў чацвёрты раз у гісторыі выйграў Кубак Беларусі па футболе. У фінальным матчы барысаўчане аказаліся мацнейшымі за брэсцкае «Дынама» — 1:0. 90 хвілін для гола камандам не хапіла, таму быў прызначаны дадатковы час. Пад самую-самую заслону гульні, калі і футбалісты, і трэнеры, і балельшчыкі ўжо рыхтаваліся да серыі пенальці, грандыёзная мітусня ў штрафной пляцоўцы брастаўчан прывяла да гола Захара Волкава.


Думаецца, што ў нейкі іншы час вяртанне фіналу Кубка ў сталіцу, на галоўны цалкам мадэрнізаваны стадыён краіны, стала бы маштабным футбольным святам. Сем гадоў запар вырашальная гульня здзяйсняла турнэ па гарадах Беларусі: ад Жодзіна да Брэста, ад Гродна да Барысава. Усюды быў ажыятаж, антураж, жарсць і бескампрамісная барацьба на полі. На жаль, сёлетні фінал скепсціла злашчасная эпідэмія.

Па-першае, у продаж паступіла ўсяго чвэрць месцаў на стадыёне, амаль усе яны былі рэалізаваны. У ідэале гэтая мера павінна была паспрыяць захаванню бяспечнай дыстанцыі паміж людзьмі. Па-другое, амаль ад самага пачатку сезона шматлікія фан-суполкі, у тым ліку гуляючых каманд, прыпынілі наведванне стадыёнаў. Не, без актыўнай падтрымкі каманды сёння не засталіся: пакрычаць было каму. Але гэта дзве вялікія розніцы — матч з фанатамі і без іх. Па-трэцяе, усё з той жа прычыны зон актыўнасці для балельшчыкаў, кафэ практычна не было. Затое на ўваходзе мерылі тэмпературу цела і кожнаму на рукі лілі антысептык.

Не хочацца нават уяўляць, на колькі больш гледачоў сабрала б гульня, калі б не гэты абрыдлы каранавірус. Нягледзячы на мінімальную колькасць галоў і нулі на табло па заканчэнні асноўнага часу матча, сумна не было. Каманды не адседжваліся каля сваёй брамы, спрабавалі нагнятаць і пагражаць. На працягу ўсёй гульні барысаўчане ўсё ж былі на крок бліжэй да ўзяцця варот, чым супраціўнік. Вельмі небяспечна білі Драгун, Міліч, Скавыш, Вілюмсан. Апошні не трапіў у другім экстра-тайме у пусты вугал варот абсалютна неверагодным чынам.

Брастаўчане, у якіх пакуль не вельмі ладзяцца чэмпіянатныя справы ў гэтым сезоне, адвялі ад сваіх варот яшчэ дзясятак небяспечных атак. Забіваць самі, пэўна, маглі, але стапрацэнтныя моманты не прыгадваюцца. Толькі аднойчы пасля ўдару Савіцкага са штрафнога мяч уляцеў у перакладзіну, а мог бы быць гол-цуд у дзявятачку...

На самай апошняй хвіліне гульцы ў жоўтым зарабілі вуглавы ўдар, пасля падачы з якога ў валоданнях брамніка «Дынама» распачалася вялікая мітусня. «Бела-блакітныя» не маглі выбіць мяч куды вочы глядзяць, а барысаўчане — нанесці хоць які-небудзь удар. Вось і скакаў мяч туды-сюды, пакуль не аказаўся ў нагах Захара Волкава. Той ударыў у дотык і прывёў сваіх сукаманднікаў у стан эйфарыі.

Гэтая перамога зрабіла клуб з Барысава рэкардсменам па колькасці заваяваных Кубкаў краіны — іх у трафейным пакоі ўжо чатыры.

P.S. Сведкамі яшчэ адной радаснай падзеі гледачы сталі ў перапынку гульні. Хлопец перамог у віктарыне для балельшчыкаў, заявіў вядучаму, што прыйшоў на гульню са сваёй дзяўчынай, якая адзначае сёння дзень нараджэння, і на вачах усяго стадыёна дадаў, працягваючы ёй пярсцёнак: «Хрысціна, акрамя ўсіх падарункаў, якія я ўжо табе ўручыў, у мяне ёсць для мяне яшчэ адзін — будзь маёй жонкай». Яна адказала: «Канешне, так!»

 

Дзмітрый Суганяеў

Фота аўтара

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.