Вы тут

Лукашэнка разлічвае на хуткае аднаўленне эканомікі Беларусі пасля адкрыцця сусветных рынкаў


Прэзідэнт Беларусі Аляксандр Лукашэнка бачыць магчымасць хуткага аднаўлення ў нацыянальнай эканоміцы пасля падзення, выкліканага закрыццём краін і сусветных рынкаў ва ўмовах пандэміі. Пра гэта ён заявіў 25 мая на нарадзе ў Мінску па актуальных сацыяльна-эканамічных і палітычных пытаннях, перадае прэс-служба кіраўніка дзяржавы.


Кіраўнік дзяржавы адзначыў, што ў апошні час асноўная ўвага надавалася эканоміцы і лячэнню людзей у сувязі з пандэміяй. «У сувязі з той істэрыяй, якая разгарнулася ў СМІ, наклала вельмі жорсткі адбітак на людзей і праз людзей на эканоміку, кіраўнікамі дзяржаў ўсёй планеты былі прынятыя сур’ёзныя рашэнні аб закрыцці краін (чытай — закрыцці эканомікі)», — канстатаваў Аляксандр Лукашэнка.

Адпаведная абстаноўка, у тым ліку ў асноўных партнёраў Беларусі, не магла не адбіцца і на эканамічным развіцці яе самой. «Эканоміка ў нас экспартна арыентаваная. Таму адбылося пэўнае падзенне эканомікі, хоць прымальнае для нас падзенне. Цярпіма, — заявіў беларускі лідар. — Гэта сведчыць аб тым, што калі адкрыццё краін будзе больш інтэнсіўным, чым цяпер (а працэс ужо пачаўся, яго ўжо ніхто не спыніць, таму што людзі абурыліся, яны не хочуць сядзець у ізаляцыі), то мы зможам хутка аднавіць сваю эканоміку».

Больш за тое, кіраўнік дзяржавы адзначыў, што нават у цяперашняй сітуацыі многія галіны, такія як сельская гаспадарка, будаўніцтва, IT-сектар і шэраг іншых, даюць прыстойны прырост. «Пытанне будзе з прамысловасцю. Таму што не маглі купіць камплектуючыя (усё, што было, мы выдаткавалі). І, натуральна, прадаць не маглі сваю прадукцыю. Але нарыхтавана нямала гатовай прадукцыі, якая ўжо пачала распрадавацца. Гэта добры сігнал на будучыню», — лічыць кіраўнік дзяржавы.

«Таму мы не маглі забыць пра эканоміку. Але, зразумела, мы перажывалі за тое, як будуць складвацца справы з лячэннем рознага роду захворванняў, звязаных з каранавірусам», — дадаў Прэзідэнт.

«Калі, я часта кажу, гэта апошні месяц, і далей так пойдзе, то будзем лічыць, што мы справіліся з божай дапамогай з гэтым захворваннем. Пачалося гэта з Віцебска. Віцебск ужо канстатуе факт, што яны ўнізе па захворванні. Сведчаннем таму з’яўляецца, што мы бальніцы пачалі зачышчаць, вымываць — тыя, якія рыхтавалі як рэзерв для каранавіруса», — заявіў беларускі лідар.

Паводле яго слоў, аналагічная сітуацыя назіраецца і ў Мінску. «На плато ўжо знаходзімся, па заявах урачоў. Я, праўда, не так аптымістычны ў сілу сваіх забабонаў», — сказаў кіраўнік дзяржавы. Тым не менш, грунтуючыся на развіцці сітуацыі, ужо і ў Мінску плануюць у найбліжэйшы час вяртаць да звычайнай працы шэраг лячэбных устаноў, у тым ліку анкалагічнага і гінекалагічнага профілю, бальніцу хуткай меддапамогі. «У прынцыпе, мы адчуваем, што нам ужо не спатрэбяцца гэтыя бальніцы ў Мінску (пад лячэнне хворых з каранавірусам. — Заўвага.), — заявіў Прэзідэнт.

Аляксандр Лукашэнка адзначыў стабілізацыю захворвання і нават некаторае зніжэнне ў Мінскай вобласці. Нядрэнная абстаноўка і ў Магілёўскай вобласці. «Калі так, то ў нас застануцца толькі дзве вобласці — Брэсцкая і Гомельская, — якія мы павінны кантраляваць. Яны пазней за ўсіх увайшлі ў гэты працэс, і спецыялісты кажуць аб тым, што яны пазней за ўсіх і выйдуць, на тыдзень дзесьці», — сказаў кіраўнік дзяржавы.

Ён падкрэсліў, што ў штодзённым рэжыме, раніцай і ўвечары, цікавіцца адпаведнымі пытаннямі і праблемамі. «Ложкаў дастаткова. Цяжкіх менш стала. Мабыць, вірус усё ж аслабеў ужо, вірулентнасць яго ўжо не тая. Дай бог, каб не тая. Але пры гэтым мы павінны трымаць у розуме другую хвалю. Ніхто не даказаў, што яна будзе, але мы павінны да гэтага рыхтавацца. І ніхто не ведае, калі яна прыйдзе. Калі зімой і восенню, то дай бог, каб мы сур’ёзна змаглі падрыхтавацца да гэтага. А, можа быць, гэтая бяда нас міне. Тым не менш, расслабляцца нельга», — падкрэсліў беларускі лідар.

Прэзідэнт таксама на прыкладзе Мінска адзначыў добрую арганізацыю кантролю за развіццём сітуацыі ва ўмовах пандэміі. Аляксандр Лукашэнка папрасіў старшыню Савета Рэспублікі Наталлю Качанаву, якая курыруе сталіцу, распавесці аб адпаведных падыходах. «Не як лечым людзей (я гэта ведаю, а як вы арганізавалі кантроль зверху). Напэўна, будзе чаму павучыцца ў вас па Мінску. Таму што няпростая сітуацыя — два з лішнім мільёны чалавек, і няпроста было тут арганізаваць справу. Але ні ў якім разе нельга расслабляцца», — падкрэсліў кіраўнік дзяржавы.


Лукашэнка пра фэйкі ў інтэрнэце: Для іх не галоўнае гэтыя ўрачы. Галоўнае — хайпануць

«Я заўважыў, што ў так званых фэйкавых каналах, Telegram-каналах і іншых яны апошнім часам чапляюць уладу за што папала. Раздзьмуць могуць там скандал з нявыплатай ў нейкай канкрэтнай арганізацыі — урачам, настаўнікам і гэтак далей. Я ўчора Наталлю Іванаўну (старшыня Савета Рэспублікі Нацыянальнага сходу Наталля Качанава. — Заўвага.) папрасіў, каб яна абтэлефанавала ўсіх губернатараў і проста па-чалавечы папярэдзіла іх: калі ёсць нейкая праблема, яе трэба вырашыць на месцы».

Кіраўнік дзяржавы ў гэтым плане прывёў канкрэтны прыклад: «Ну што там гэтая бабруйская хуткая дапамога... Калі яны сапраўды працуюць і звязаныя з гэтымі эпідэмічнымі працэсамі, то трэба падтрымаць людзей. Гэта капейкі для краіны. Але, з іншага боку, трэба разумець, што ў роўныя ўмовы мы не можам паставіць тых, хто сёння выконвае „чыстую“ і „брудную“ працу. У адваротным выпадку мы пакрыўдзіць тых, хто сёння ходзіць у чырвоную зону і працуе з заражанымі каранавірусам».

«Таму ураўнілаўкі быць не павінна. Але грань амаль непрыкметная», — дадаў Аляксандр Лукашэнка.

Кіраўнік дзяржавы падкрэсліў, што аўтары фэйкаў зусім не турбуюцца, напрыклад, пра  урачоў, а толькі імкнуцца хайпануть. «Для іх не галоўнае гэтыя ўрачы. Галоўнае — хайпануть. Яны на гэтым хочуць злавіць нейкі хайп. Гэта не наш шлях. Але, трэба пацярпець. Мы з імі разбярэмся. Я ўчора вам казаў: прыйдзе час, мы ўсіх паставім на месца», — заявіў Прэзідэнт.

Аляксандр Лукашэнка пры гэтым адзначыў, што закрываць рот нікому нельга, і хай людзі кажуць так, як яны думаюць. «А журналіст, калі ён журналіст, нейкі блогер ці яшчэ хтосці павінны пісаць сумленна, аб’ектыўна падаваць інфармацыю, а не падымаць скандал. Калі не сумленна, калі не адпавядае рэчаіснасці, за гэта трэба адказваць. Як гэта было з расійскім Першым каналам», — акцэнтаваў увагу кіраўнік дзяржавы.

Прэзідэнт дадаў, што цяпер і ў самой Расіі на міжнародным узроўні патрабуюць, каб адно з замежных заходніх выданняў прынесла прабачэнні за фальсіфікацыі на тэму каранавіруса. «Дык а навошта ж расійскія каналы ў нас гэта рабілі?» — задаў рытарычнае пытанне Аляксандр Лукашэнка.

«І я тут расіян падтрымліваю — ніхто не мае права гуляцца на гэтай тэме. Гэта жыцці людзей. Тут я побач з расіянамі, але адразу кажу: і вы сябе вядзіце адказна ў адносінах да іншых краін», — падкрэсліў беларускі лідар.

Ён яшчэ раз заклікаў у гэтай сітуацыі пацярпець, бо галоўнае — гэта выратаванне жыццяў людзей. «Мы павінны прайсці гэты шлях, як мы яго пачалі. І тады людзі разбяруцца, хто мае рацыю, а хто вінаваты. Усё ўжо ў Беларусі атрымалі прышчэпку і выпрацавалі імунітэт да гэтых нягоднікаў (аўтарам фэйкаў. — Заўвага.). Так, яны (людзі . — Заўвага.) гэта чытаюць, але правільна ацэньваюць. А тыя, хто няправільна ацэньваюць, яны і хочуць так ацэньваць няправільна. Мы іх ужо наўрад ці перавыхаваем і звернем на шлях праўды, — лічыць кіраўнік дзяржавы. — гэта пэўная частка людзей. Яны ненавідзелі і ненавідзяць Лукашэнку, лічаць, што трэба пабольш яму падкінуць праблем, каб ён спатыкнуўся і ўпаў. Гэта ж мы бачылі і бачым цяпер. Да гэтага трэба больш спакойна ставіцца і проста людзям распавядаць на фактах».

«Вы ведаеце, што з-за пэўных абставінаў і таго шляху, які мы абралі пры лекаванні, мы апынуліся адзінымі ў свеце з такім шляхам і з пэўнымі вынікамі. Што не можа ў каго-небудзь не выклікаць сумневаў і пытанняў: ну не можа быць, каб беларусы вось так вось у адзіночку змаглі прайсці гэты этап, — адзначыў Прэзідэнт. — Я не кажу, што ён скончыўся. Я наогул забабонным стаў за гэтыя месяцы. Самыя цяжкія часы за ўвесь прэзідэнцкі перыяд. Адны з цяжкіх — гэта дакладна. Віктар Шэйман (Кіраўнік справамі Прэзідэнта Беларусі. — Заўвага.) памятае яшчэ і тыя часы, калі хлеба не было і наогул карміць народ не было чым. Я часта прыводжу прыклад, што ў 1994 годзе на тры дні ў Мінску заставалася мукі, каб хлеб спячы. Гэта сапраўды былі страшныя часы. Як мы выкараскаліся... Напэўна, Гасподзь дапамог».

Аляксандр Лукашэнка падкрэсліў, што лічыць цяперашнія часы цяжкімі нават не па прычыне пандэміі і распаўсюджвання хваробы, а таму, што з усіх бакоў у гэтай сітуацыі аказваўся моцны ціск. «І гэта трэба было вытрымаць. Людзі ж розныя. Усё зразумела — у нас жорсткая ўлада, Прэзідэнт сказаў — усё зроблена, выканана. Тым не менш, мы ж (нічога. — Заўвага.) не забаранялі. Мы проста бераглі людзей, лячылі іх і гэтак далей. Таму людзі па-рознаму сябе паводзілі, але ў цэлым нядрэнна. Тым не менш, ціск быў вельмі сур’ёзным», — сказаў ён.

На нараду былі запрошаны кіраўнік Адміністрацыі Прэзідэнта Ігар Сергеенка, старшыня Савета Рэспублікі Нацыянальнага сходу Наталля Качанава, кіраўнік спраў Прэзідэнта Беларусі Віктар Шэйман і старшыня ФПБ Міхаіл Орда.

Прэв’ю: president.gov.by

Выбар рэдакцыі

Грамадства

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Адным з першых у вобласцi пачалi рэстаўрыраваць велiчны палац Сапег у Ружанах.

Грамадства

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Наша краiна займае трэцяе месца ў сваiм рэгiёне па колькасцi бескантактавых транзакцый.

Грамадства

Неспадзяваныя падарожжы. Як не згубiцца ў лесе?

Неспадзяваныя падарожжы. Як не згубiцца ў лесе?

Цёплае i вiльготнае надвор'е, якое вось ужо чацвёрты тыдзень з невялiкiмi перапынкамi пануе ў Беларусi, штурхае да таго, каб пайсцi ў лес.