Вы тут

Аўтобусы, камбайны і канкурэнты TESLA


Відавочна, што адной са складаемых частак, адным з элементаў новай канцэпцыі зялёнай эканомікі, якая сёння як ніколі актыўна прапагандуецца ў Беларусі, з’яўляецца электратранспарт. У краіне над яго стварэннем ужо не першы год працуюць навукоўцы і канструктары. І пэўныя вынікі ёсць.


Так, свет сёння мяняецца куды больш імкліва, чым можна было гэта ўявіць. Рухавіком сучаснай эканомікі прыкметна становяцца навукоўцы і канструктары. Не выпадкова нядаўна азнаёміцца з дасягненнямі беларускіх навукоўцаў на Рэспубліканскі палігон для выпрабаванняў мабільных машын Аб’яднанага інстытута машынабудавання Нацыянальнай акадэміі навук прыязджаў Прэзідэнт. Зрэшты, у цэнтры яго ўвагі там былі не толькі выставачныя экспанаты. Аляксандр Лукашэнка ўвогуле адзначыў важную ролю навукоўцаў, і асабліва ў бліжэйшай пяцігодцы:

— Часы экстэнсіўнага развіцця эканомікі скончыліся. Трэба інтэнсіфікавацца. Без навукі нічога не зробім. Трэба ў наступнай пяцігодцы наймацнейшым чынам падключаць навуковую думку, нашых прасунутых, моцных, пісьменных людзей, каб, калі ўжо не ірвануць, то выстаяць у гэтай сітуацыі…

Варта нагадаць пра значнасць развіцця электратранспарту ў краіне. Акрамя таго, што з уводам БелАЭС мы атрымаем прафіцыт электраэнергіі, тут вельмі важны яшчэ і экалагічны аспект. Абяцанняў і заяў пра развіццё электратранспарту ў свой час было зроблена нямала, таму прыезд Кіраўніка дзяржавы на палігон — гэта добрая магчымасць азнаёміцца асабіста з тым, што ўжо зроблена.

— Хацелася б убачыць, наколькі вы прасунуліся і наколькі словы адпавядаюць справам, — патлумачыў сутнасць візіту Аляксандр Лукашэнка. І дадаў пра неабходнасць правесці рэвізію працы Акадэміі навук у комплексе:

— У цэлым нам трэба падвергнуць сур’ёзнай рэвізіі працу Акадэміі навук. Хоць гэта няпроста. Там сапраўды разумныя, таленавітыя людзі сабраныя. І паглядзець па асноўных напрамках, як працуе Акадэмія навук, як выкананы прынятыя намі рашэнні.

Паводле слоў старшыні Прэзідыума Нацыянальнай акадэміі навук Уладзіміра Гусакова, усе даручэнні Кіраўніка дзяржавы ў частцы развіцця электратранспарту пастаўленыя на найстражэйшы кантроль і выконваюцца без зрываў. У краіне ўдалося фактычна з нуля стварыць новую навуковую школу, напрацаваныя кампетэнцыі. Сёння група спецыялістаў і навукоўцаў, у якую ўваходзяць сорак чалавек, можа вырашаць любыя задачы ў галіне электратранспарту. У самой Акадэміі навук створаны ўчасткі зборкі кампанентаў электрамабіляў, батарэй, найноўшых узораў ліцій-іонных назапашвальнікаў. Распрацоўваюць навукоўцы і ўласныя графенавыя назапашвальнікі, а таксама гібрыдныя. Такім чынам, практычна ўся элементная база электрамабіля, за выключэннем кузава, ствараецца ўнутры краіны.

Узор перспектыўнай распрацоўкі

— Мы працуем з многімі прадпрыемствамі ў кааперацыі, падышлі да таго, што ў бліжэйшы час створым уласную эксперыментальную вытворчасць і пяройдзем да дробнасерыйнай, — дакладаў Уладзімір Гусакоў. Разам з тым, паводле яго слоў, ёсць праблемы, якія перашкаджаюць перайсці да маштабнай вытворчасці. У прыватнасці, пакуль у краіне няма прадпрыемства па выпуску цягавых акумулятарных батарэй, кузаваў.

— Гэта нармальна. Навошта нам ствараць цэлы завод або перапрафіляваць, калі мы не ведаем, у што гэта выльецца? — адрэагаваў Прэзідэнт і даручыў комплексна заняцца гэтым пытаннем. — Нам патрэбныя доследныя ўзоры, якія вы створыце. Вы павінны пакласці на стол нам будучыню. Потым мы павінны пралічыць рынкі.

Безумоўна, пры бачанні дакладнай і выверанай перспектывы беларускія прадпрыемствы зарыентуюць на вытворчасць тых айчынных кампанентаў для электратранспарту, якія ў нас пакуль не вырабляюць.

Разам з тым сёння работы па развіцці электратранспарту вядуцца па самых розных напрамках. Сярод распрацовак навукоўцаў не толькі легкавыя аўтамабілі. На пляцоўцы прадэманстравалі два ідэнтычных аўтобусы МАЗ: дызельны і электрацягавы. Па словах гендырэктара ААТ «МАЗ» Валерыя Іванковіча, электробус абыходзіцца пакуль даражэй за дызельны аналаг, аднак выхад на серыйнасць дазволіць знізіць цану:

— За кошт тэхнічных рашэнняў па каробцы перадач, па электроніцы, за кошт серыйнасці мы атрымліваем абсалютна канкурэнтную цану.

Даручэнне Прэзідэнта: да мая будучага года вырабіць дзясятак такіх аўтобусаў для Мінска і абласцей.

Сярод выставачных экспанатаў быў і доследны ўзор камбайна для залівання лёду, які працуе на электрапрывадзе. Як кажуць распрацоўшчыкі, каштуе такая машына прыкметна танней у параўнанні з імпартнымі аналагамі. Ды і лёд залівае якасна.

Яшчэ адну распрацоўку навукоўцы называюць канкурэнтам Tesla. Размова пра эксперыментальны ўзор беларускага родстэра — двухмесны электрамабіль-кабрыялет. Ён лёгкі і манеўраны, належыць да класа з палепшанымі дынамічнымі характарыстыкамі. Машына можа развіваць хуткасць да 170 км/г і праязджаць 270 кіламетраў без падзарадкі.

Прадэманстравалі на экспазіцыі і малагабарытную машыну «Мураш» для ачысткі тратуараў і ўборкі смецця. Кіраўнік дзяржавы пацікавіўся ў мэра Мінска Анатоля Сівака, ці будзе запатрабаваная такая тэхніка ў горадзе?

— Так, трэба пераходзіць на такую, — прагучаў сцвярджальны адказ.

— Давайце будзем на гэта арыентавацца, — сказаў Прэзідэнт.

Аляксандр Лукашэнка падрабязна азнаёміўся з распрацоўкамі па вырабе акумулятарных батарэй, а таксама зарадных станцый рознага прызначэння. Распавялі навукоўцы пра ўласныя распрацоўкі ў сферы ліцій-іонных і графенавых батарэй. Апошнія па эфектыўнасці пакуль саступаюць, аднак каштуюць значна танней. Зрэшты, перспектыва зраўнаваць паказчыкі эфектыўнасці цалкам рэальная. Кіраўнік дзяржавы адзначыў: калі атрымаецца — гэта будзе прарыў.

Электробус МАЗ 303Е10

Асобную ўвагу Прэзідэнт надаў доследным узорам электравеласіпедаў, электраскутараў, электрасамакатаў, цікавіўся тэхнічнымі характарыстыкамі, хуткасцю, запасам ходу. Некаторыя мадэлі даручыў дапрацаваць з пункту гледжання дызайну, па іншых мадэлях пагадзіўся на прапанову ўзяць для эксплуатацыі ды пратэставаць іх асабіста.

Дырэктар Навукова-вытворчага цэнтра шматфункцыянальных беспілотных комплексаў Нацыянальнай акадэміі навук Юрый Яцына таксама прадставіў Прэзідэнту шэраг распрацовак. Многія з іх не першы год эксплуатуюцца ў беларускім Міністэрстве па надзвычайных сітуацыях, актыўна купляюць комплексы і ў іншых краінах.

Пасля заканчэння мерапрыемства журналісты папрасілі Прэзідэнта падзяліцца ўражаннямі і ацаніць убачанае на выпрабавальным палігоне. Аляксандр Лукашэнка прапанаваў не забягаць наперад. Прайшоў толькі першы этап вырашэння пастаўленых задач. Будзе другі, вось тады, маўляў, і пагаворым. Тым не менш убачанае Кіраўніка дзяржавы ўразіла:

— Я не чакаў, што яны (навукоўцы. — Аўт.) здольныя за кароткі прамежак часу ўсё гэта стварыць. Каб ацаніць іх як след, нам трэба паглядзець, ці адпавядае гэта сусветным стандартам і якія перспектывы. Не цацку ж ствараем, а тавар, які трэба будзе рэалізоўваць на рынках і атрымліваць валюту. Але ўвогуле ўражвае — і з пункту гледжання абароны нашай краіны, і з пункту гледжання выкарыстання ў мірных мэтах.

Васіль Харытонаў

Фота БЕЛТА

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.