Аляксандр Лукашэнка: Пасол павінен склейваць адносіны

Пра гэта заявіў Прэзідэнт Беларусі на сустрэчы з Надзвычайным і Паўнамоцным Паслом Рэспублікі Сербія Велька Кавачавічам.

«Наколькі я разумею, вы сабраліся ў Сербію?» – спытаў кіраўніка дыпламатычнай місіі Прэзідэнт Беларусі Аляксандр Лукашэнка.

«На жаль», — адказаў дыпламат.

«На вялікі жаль, — удакладніў беларускі лідар. — Але служба ёсць служба. Я гэта ўсё цудоўна разумею, але вельмі спадзяюся і проста па-сяброўску хачу Вас папрасіць, каб вы перадалі прэзідэнту Сербіі, каб наступны пасол пасля вас быў такі ж, як Вы».

Аляксандр Лукашэнка заўважыў, што ў Беларусі сярод паслоў усё больш з’яўляецца сапраўдных сяброў. Ён успомніў рашэнне пасла Славакіі ў Беларусі Ёзэфа Мігаша ўдзельнічаць у парадзе Перамогі ў Мінску сёлета.

«Гэта сапраўды годны быў учынак. Калі шчыра, мне не зусім зразумелая пазіцыя славацкага кіраўніцтва, якое асудзіла гэта. Ён вырас у сям’і патрыёта, бацька змагаўся з нацызмам, быў, наколькі я ведаю, партызанам. Ён (Ёзэф Мігаш — «Зв.») выступаў, казаў пра гэта шчыра. Ну як можна гэтаму чалавеку прад’яўляць прэтэнзіі?» — пракаментаваў сітуацыю беларускі лідар.

Караць за такое непрымальна, тым больш у Славакіі, лічыць Прэзідэнт.

«Мы ж свае людзі, як так можа быць? Мы ж ваявалі разам супраць нацызму. Мы і сёння катэгарычна супраць гэтага. Таму мы з трапятаннем падыходзім да прызначэння і вітаем прызначаных паслоў у Беларусі, і хацелі б, каб яны былі сапраўднымі сябрамі, — дадаў кіраўнік дзяржавы. — Мы разумеем, што любы пасол будзе адстойваць інтарэсы сваёй краіны. Але па-другое, пасол павінен склейваць адносіны сваёй краіны з Беларуссю, скажам, калі ты ў служыш у Беларусі».Аляксандр Лукашэнка падкрэсліў, што кіраўніцтва краіны вельмі зацікаўленае, каб з братняй Сербіяй былі добрыя адносіны і пасол адпавядаў ім.

Велька Кавачэвіч запэўніў Прэзідэнта Беларусі, што для яго «жыццёва важны гонар» быць прынятым з развітальным візітам на такім высокім узроўні.

Беларускі лідар на гэта заўважыў, што візіт развітальны для дыпламата толькі у статусе пасла. Спадар Кавачавіч падзякаваў і дадаў, што заслуга Прэзідэнта Беларусі і яго сербскіх былога і цяперашняга калег ва ўмацаванні і развіцці адносін паміж двума краінамі маюць гістарычнае значэнне.

«Мы з Прэзідэнтам, як заўсёды, казалі пра нашы двухбаковыя адносіны, пра нашы сяброўскія і братнія адносіны, — расказаў журналістам спадар Кавачавіч пасля сустрэчы з кіраўніком беларускай дзяржавы. — Прэзідэнт заўважыў, што адносіны, якія існуюць паміж Беларуссю і Сербіяй, — рэдкасць».

Па словах пасла, размова ішла і пра розныя канкрэтныя магчымасці гандлёва-эканамічнага супрацоўніцтва.

«Напрыклад, Сербія чакае на імпарт беларускіх электробусаў», — дадаў дыпламат.

Ён паўтарыў, што і для яго асабіста, і для Рэспублікі Сербія, і для яе грамадзян вялікі гонар тое, што Прэзідэнт Беларусі прыняў яго з развітальным візітам.

«Што датычыцца мяне асабіста, гэта цяжкі момант — з’язджаць з краіны, якую любіш, — прызнаўся пасол. — Беларусь — дзівосная краіна! Вы тут жывяце і для вас гэта звыкла. Але калі паглядзець свежым поглядам і з адкрытай душой на Мінск і Беларусь, то бачыш ўсю прыгажосць гэтай краіны. Разам з тым беларускія людзі — яны проста цудоўныя! Я вяртаюся ў Сербію, але Беларусь і беларускі народ ў маёй асобе заўсёды будуць мець сябра».

Даведка «Звязды»:

Сербія — адзіная краіна ў Еўропе, з якой у Беларусі дзейнічаюць двухбаковы Дагавор аб свабодным гандлі і бязвізавы рэжым. 

Летась тавараабарот склаў каля 150 мільёнаў долараў, сальда было станоўчае ў памеры каля 13 мільёнаў долараў. У першым квартале гэтага года таваразварот знізіўся на 30 працэнтаў, экспарт — удвая. У выніку склалася адмоўнае сальда.

Разам з тым, экспарт беларускіх паслуг у Сербію актыўна расце (у 12 разоў за мінулы год, і ў 11 разоў за першы квартал сёлета). Асноўная доля яго прыходзіцца на будаўніцтва часткі трубаправоду «Турэцкі паток».

У Сербіі дзейнічаюць лініі па зборцы трактараў «МТЗ» і аўтобусаў «МАЗ». Рэалізаваны праект па пастаўцы для МУС Сербіі 33 пажарных машын на базе шасі МАЗ. Вядзецца работа па арганізацыі паставак буйной партыі беларускіх аўтобусаў і тралейбусаў для Белграда.

У Мінску сербская кампанія «Дана Холдынг» будуе жылы комплекс «Маяк Мінска» побач з Нацыянальнай бібліятэкай і міжнародны фінансавы, дзелавы, забаўляльны і жылы комплекс  «Мінск-Свет» на месцы былога аэрапорту. Кошт праектаў — 800 мільёнаў долараў.

Вольга МЯДЗВЕДЗЕВА

Фота БЕЛТА