Вы тут

Свята, якое застаецца ў памяці


Яшчэ з дзяцінства многія з нас засвоілі, што найлепшы падарунак  — кніга, а любімае свята — дзень нараджэння. Спалучэнне гэтых двух элементаў у дзіцячай кніжцы — своеасаблівы ход. З аднаго боку, такая кніга — звышідэальны падарунак, да якога можна нават не прыкладаць віншавальную паштоўку. Да таго ж нават тыя дзеці, якiя не любяць кніг, хутчэй за ўсё любяць дні нараджэння. З  іншага боку  — як чытаць такую кнігу, калі дзень нараджэння ўжо мінуў? Увечары, пасля сыходу гасцей, — добра, а ўжо наступным вечарам — ці не стане сумна, што твой дзень зноў прыйдзе праз цэлы год?


Так ці інакш, такая кніга існуе і сапраўды можа замяніць паштоўку — на вокладцы напісана «З днём народзінаў, альбо Свята, якое ёсць у кожнага». Кніга выйшла ў выдавецтве «Мастацкая літаратура» ў 2019 годзе. Пад каляровай вокладкай сабраны дзіцячыя творы сучасных беларускіх пісьменнікаў, прысвечаныя тэме дня нараджэння. Персанажы — жывёлы, птушкі і звычайныя дзеці, такія ж, як чытачы гэтай кнігі. Яны святкуюць, дораць і атрымліваюць падарункі, загадваюць жаданні, вырашаюць праблемы і трапляюць у прыгоды, як і ў любой дзіцячай кніжцы.

Найлепшая якасць гэтага зборніка — менавіта разнастайнасць тэкстаў. Укладальніца Аксана Спрынчан сабрала пад адной вокладкай вершы і апавяданні, кароткі спрошчаны сюжэт і больш доўгі і пакручасты, знаёмыя жыццёвыя сітуацыі і чарадзейныя казкі. Дзень нараджэння — насамрэч толькі адна тэма, якая аб’ядноўвае непаўторныя творы. І даросламу цікава паназіраць за тым, як розныя пісьменнікі рэалізоўваюць гэтую тэму, а дзецям — знаходзіць у кожным тэксце нешта новае, непадобнае да таго, што было ў папярэднім. Склад аўтараў кажа сам за сябе: Васіль Зуёнак, Анатоль Зэкаў, Алесь Бадак, Мікола Маляўка, Пятро Васючэнка, Віктар Шніп, Людміла Рублеўская, Серж Мінскевіч і многія іншыя. Такая жанравая і  стылістычная разнастайнасць цалкам зразумелая. Канешне ж, многія з гэтых тэкстаў не проста забаўляюць, а нечаму вучаць і нешта тлумачаць. Але гэта адбываецца ў гульнявой форме і не пазбаўляе дзіцячыя творы цудаў.

Асаблівую ролю, як і ва ўсіх дзіцячых кнігах, адыгрывае мастацкае афармленне. У  кнізе шмат ілюстрацый, выкананых Міхаілам Дайлідавым. Яны яркія, каляровыя, часам выяўляюць нешта абстрактнае (бывае цяжкавата счытаць форму прадмета). Спачатку падаецца, што ілюстрацыі занадта хаатычныя і па колеры, і па форме і гэтым могуць ускладняць дзіцячае ўспрыманне. Але потым разумееш: ілюстрацыі, таксама як і ўсё выданне, незвычайныя ў спалучэнні. Выкананыя прафесійным мастаком, зроблены яны падобнымі да дзіцячых малюнкаў. Нават крыху нагадваюць малюнкі на асфальце каляровай крэйдай. І праз гэта адлюстроўваюць агульны настрой кнігі — настрой свята.

Насамрэч, чытаючы многія творы, адчуваеш, што дзень нараджэння — не галоўная іх тэма, а толькі нагода для аповеду. Тады, гледзячы на назву «Свята, якое ёсць у кожнага», перастаеш думаць пра тых сумных дарослых, якія не адзначаюць свой дзень нараджэння па нейкіх празаічных прычынах. І разумееш, што свята, якое ёсць у кожнага,  — гэта дзяцінства. Дзяцінства, з якога ўсё пачынаецца, якое шмат чаго вызначае ў  жыцці і якое ў любым выпадку застаецца глыбока ўнутры душы адным з найважнейшых момантаў.

Ганна ІВАНОВА

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.