Міхаіл Яфрэмаў: Я не разумею, як далей жыць

Расійскі акцёр Міхаіл Яфрэмаў запісаў відэазварот праз 4 дні пасля смяротнага ДТЗ на Садовым кальцы ў Маскве, паведамляе Meduza.

Акцёр папрасіў прабачэння ў сям'і Сяргея Захарава, кур'ера інтэрнэт-крамы «Деликатеска», які загінуў у аварыі, і паабяцаў дапамагчы «ўсімі сродкамі, калі прымуць». Міхаіл Яфрэмаў адзначыў, што гэта спроба «не адкупіцца, а загладзіць», і назваў недаравальным тое, што сеў п'яным за руль. Таксама артыст паабяцаў не «адмазвацца» з дапамогай знаёмых.

Аднак, як паведаміў rbc.ru адвакат сям'і загінулага Аляксандр Дабравінскі, сям'я адмовілася прымаць грашовую дапамогу ад артыста. «Сям'я, вядома, чула прабачэнні спадара Яфрэмава і лічыць іх запозненымі. Прадстаўнікі сям'і маюць намер ісці да канца, дамагаючыся справядлівага рашэння суда. Такім чынам, прабачэнні дэ-факта не прынятыя».