Вы тут

Усе 1300 шматдзетных гродзенскiх сем'яў, якiя стаяць у чарзе, сёлета будуць забяспечаны жыллём


Большасць шматдзетных сем'яў гродзенцаў атрымлiваюць жыллё ў новых шматпавярхоўках

У Гродне актыўна забудоўваюць новыя мiкрараёны. Значная частка кватэр адводзiцца менавiта шматдзетным сем'ям. Алена i Антон Дзмiтрыевы нядаўна атрымалi новае жыллё ў адным з такiх дамоў па вулiцы Асфальтнай, што ў мiкрараёне Грандзiчы-2.


З iнтэрната — у новую кватэру

Паўночны мiкрараён Грандзiчы — перспектыўная забудова. Гэта адзiн з самых значных будаўнiчых праектаў, дзе шматпавярхоўкi растуць як грыбы. Дабрацца ў новы раён нескладана — сюды ходзiць гарадскi транспарт. Грандзiчы-2 выглядаюць добраўпарадкавана — i дарожная, i дваровая iнфраструктура радуе вока сваiм сучасным выглядам. Таксама адметная рыса новага мiкрараёна — гаражы для ровараў, якiя, дарэчы, не пустуюць.

Вось у такiм утульным дворыку па вулiцы Асфальтнай мы i сустрэлiся з Аленай Дзмiтрыевай. Яе сям'я нядаўна пераехала ў новы дом з iнтэрната. Для жанчыны вельмi важна, што дворык свабодны ад аўтатранспарту, а яго тэрыторыя — сапраўдны варкаўт для дзяцей з мноствам аб'ектаў i нават штучным пакрыццём.

Алёна наглядае за дзвюма малымi дочкамi — Младай i Маргарытай. Старэйшы сын Мацвей застаўся дома. Пакуль дзяўчынкi гойдаюцца на арэлях, мы можам пагаварыць на самую актуальную для сям'i тэму — жыллёвую: цi сапраўды падтрымка дзяржавы ў гэтым пытаннi для шматдзетных сем'яў адчувальная? Але пра ўсё па парадку.

Як аказалася, дагэтуль Дзмiтрыевы жылi ў iнтэрнаце блочнага тыпу. Напачатку займалi адзiн пакой, а з нараджэннем другога дзiцяцi iм аддалi ўвесь блок плошчай 37 «квадратаў».

— Мы не ставiлi канкрэтных планаў па колькасцi дзяцей, — усмiхаецца Алена. — Пасля таго як нарадзiўся Мацвей, хацелi яшчэ дзiця, але доўгi час не маглi гэта ажыццявiць. Толькi праз восем гадоў нарадзiлася Маргарыта, а потым, у наступным годзе, нечакана з'явiлася Млада. Напачатку было даволi складана спраўляцца адразу з дзвюма малымi, але цяпер яны сябруюць i разам бавяць час.

Дзяўчынкi раз-пораз падбягаюць да мамы, каб нешта сказаць. Адной хочацца з'ехаць з горкi, другой — пайсцi на скаладром. Робiм паўзу, каб задаволiць жаданнi малых i суправадзiць iх па iнтарэсах. Здаецца, што цярпенне i дабрыня Алены закладзены ў ёй з дзяцiнства. Але аказалася, што гэта далёка не так.

Сама Алена не ведае, што такое расцi з матулiнай пяшчотай. Яна сiрата з самага маленства, прайшла i праз дом немаўляцi, i праз iнтэрнаты. Але i на яе лёс хапiла дабрынi. З удзячнасцю ўспамiнае, як жыла ў доме сямейнага тыпу, дзе адчула i клопат, i цяпло бацькоў-выхавацеляў. Мабыць, з таго часу i ўмацавалася гэтае жаданне — мець сваю моцную сям'ю. Для Алены яе муж — i дарадчык, i памочнiк, i надзейная апора ў жыццi. Цяпер на яго плячах — рамонт у новай кватэры.

— Мы вырашылi браць кватэру без рамонту, бо так выходзiла танней, — удакладняе Алена. — Падумалi, што пацiху самi справiмся. Асноўныя работы ўжо зрабiлi. Галоўнае, што ёсць утульная трохпакаёўка, дзе можна ўсiм размясцiцца.

Па словах жанчыны, напачатку стаялi ў чарзе на жыллё як маладая сям'я, а лiтаральна праз
год — ужо як шматдзетная. З улiкам новых мер па падтрымцы шматдзетных сем'яў Дзмiтрыевы скарысталiся правам на паскоранае атрыманне жылля, прычым з даволi значнай дзяржаўнай субсiдыяй. Такое права гарантуецца Указам № 240 Прэзiдэнта Рэспублiкi Беларусь.

Зарплата застаецца ў сям'i

Як растлумачылi ў аддзеле жыллёва-камунальнай гаспадаркi Гродзенскага гарвыканкама, субсiдыя накiроўваецца на пагашэнне працэнтнай стаўкi па крэдыце. Яго банк выдае на будаўнiцтва жылля. А субсiдыя дазваляе ў значнай меры пагасiць гэту пазыку.

Механiзм усёй працэдуры наступны. Сям'я стаiць на ўлiку на паляпшэнне жыллёвых умоў па месцы жыхарства. Потым, згодна з чаргой, уступае ў склад жыллёва-будаўнiчага спажывецкага кааператыву (ЖБСК). Адмiнiстрацыя раёна прымае рашэнне аб выдзяленнi дзяржаўнай падтрымкi ў выглядзе субсiдыi як на пагашэнне асноўнай пазыкi, так i на пагашэнне часткi працэнтаў па крэдыце. I ўжо ў адпаведнасцi з гэтым рашэннем сям'я звяртаецца ў банк i бярэ крэдыт на будаўнiцтва жылля. Шматдзетная сям'я, дзе растуць трое дзяцей, можа разлiчваць на пагашэнне асноўнай пазыкi ў памеры 95 %. А тыя, у каго дзяцей чацвёра i больш, маюць права на стапрацэнтнае пагашэнне.

Працэдура хоць i займае нейкi час, але для Алены i яе сям'i ўвесь «папяровы» перыяд завяршыўся ўдала. I з выбарам пашанцавала — пры лёсаваннi муж выцягнуў даволi зручны шосты паверх.

— Вядома, давялося сабраць мноства паперак, даведак, але лiчу, што мы атрымалi кватэру даволi хутка — у чарзе стаялi не больш за тры гады ў статусе шматдзетнай сям'i. Цяпер кожны месяц плацiм па крэдыце 80 рублёў, — расказвае Алена.

Субсiдыя на жыллё — не адзiная дзяржаўная падтрымка. Шматдзетная сям'я мае права на атрыманне мацярынскага капiталу. Па словах Алены, пакуль яны не вырашылi, як iм скарыстацца. Магчыма, таксама для вырашэння кватэрнага пытання — дзецi ж растуць. Праўда, цяпер тэрмiн выкарыстання абмежаваны 2024 годам. Але да гэтай пары, разважае жанчына, павiнны вызначыцца. Зараз галоўны клопат — гэта дзецi. Дзяржаўная субсiдыя дазволiла амаль усю зарплату пакiнуць у сям'i. А гэта значыць — ёсць магчымасць патрацiць грошы на дзяцей, зрабiць iх жыллё больш камфортным.

«Адзiн з бацькоў павiнен працаваць»

Шматдзетныя сем'i ў Гродне атрымлiваюць новыя кватэры менавiта ў мiкрараёне Грандзiчы. Плануецца, што сёлета будуць забяспечаны жыллём усе 1300 шматдзетных гродзенскiх сем'яў, якiя стаяць у чарзе. У далейшым мяркуецца скарацiць тэрмiн чакання жылля да аднаго года.

Пра дзейснасць такiх планаў добра ведае старшыня ЖБСК Наталля Сасiм. Яна кiруе двумя дамамi, якiя цяпер узводзяцца ў асноўным для шматдзетных сем'яў. Умовы, па яе словах, даволi спрыяльныя для навасёлаў — 873 рублi за квадратны метр. Шматдзетным сем'ям гэты кошт пагашае дзяржава праз субсiдыi.

— Ёсць у нашым жыллёвым кааператыве мацi-гераiня, у якой шасцёра дзяцей. Яна жыве ў двухпакаёўцы i цяпер будуе трохпакаё-вую кватэру. Як i ва ўсiх членаў кааператыва, у яе адкрыта крэдытная лiнiя. Згодна з 240-м указам, усе работы па будаўнiцтве аплачвае дзяржава. Калi не будзе хапаць субсiдыi, жанчына зможа пагасiць частку крэдыту мацярынскiм капiталам. Так многiя робяць, i гэта значны плюс у такой сiтуацыi, — расказвае Наталля.

Сярод удзельнiкаў жыллёвага праекта — у асноўным шматдзетныя сем'i. Ёсць i мацi-адзiночкi, якiя выхоўваюць траiх дзяцей. Дзякуючы субсiдыям i мацярынскаму капiталу яны могуць дазволiць сабе аплату новай кватэры, прычым з рамонтам. Пры гэтым банку выплачваюцца невялiкiя працэнты. Паколькi чарга сярод шматдзетных таксама немалая, крэдытныя лiнii адкрыты ў пяцi банках краiны.

— Здараецца, што крэдыты немагчыма адкрыць, бо бацькi не працуюць. Яны жывуць на дзiцячую дапамогу. Але адзiн з бацькоў абавязкова павiнен працаваць, толькi тады можна разлiчваць на дапамогу дзяржавы, i гэта справядлiва, — лiчыць Наталля.

Увогуле для шматдзетных сем'яў нямала льгот. У свой час старшыня ЖБСК адчула iх на ўласнай сям'i. Гэта i летнiкi, i розныя паездкi, i наведванне культурных устаноў, паркаў. Сын ужо дарослы, закончыў ваенную акадэмiю, дзве дачкi-пагодкi — вучацца ў школе.

— Я i сама будавала кватэру як шматдзетная мацi ў 2010 годзе, — кажа суразмоўнiца. — Мы атрымалi трохпакаёўку i з'ехалi ад бацькоў. Згодна з 13-м указам, нам адкрылi iльготнае крэдытаванне, па якiм мне трэба выплацiць 25 % кошту кватэры. Цяпер я плачу ў месяц 4 рублi, а 75 % кошту пагашае дзяржава.

У другiм паўгоддзi ў Гродне пачнецца ўзвядзенне жылля ў мiкрараёне Грандзiчы-3. Для шматдзетных сем'яў прадугледжана амаль 40 чатырохпакаёвых кватэр. Усяго кватэр для гэтай катэгорыi сёлета будзе пабудавана больш за 300. Таксама шматдзетныя сем'i выкарыстоўваюць магчымасць будаваць свае дамы ў раёнах iндывiдуальнай жылой забудовы. Зямельныя ўчасткi iм выдзяляюцца ў першую чаргу.

Маргарыта УШКЕВІЧ

Фота аўтара

Загаловак у газеце: Як Млада, Маргарыта i Мацвей сталi навасёламi

Выбар рэдакцыі

Грамадства

«Лепшы цюнінг для машын — правільны пратэктар шын»

«Лепшы цюнінг для машын — правільны пратэктар шын»

Менавіта пад такім слоганам будзе праводзіцца Рэспубліканская прафілактычная акцыя, якая ініцыяваная на нашых дарогах Дзяржаўтаінспекцыяй краіны. 

Грамадства

Зімовы асартымент. Колькі каштуюць «вітаміны» на «Лебядзіным»

Зімовы асартымент. Колькі каштуюць «вітаміны» на «Лебядзіным»

З якімі прыкметамі вы звязваеце набліжэнне зімы? 

Грамадства

Якiя нашы звычкi шкодзяць здароўю i знiшчаюць iмунiтэт?

Якiя нашы звычкi шкодзяць здароўю i знiшчаюць iмунiтэт?

Мы ў жыццi шмат чаго робiм, што пагаршае наша здароўе — або адразу, або ў аддаленай перспектыве.