Вы тут

Адпачынак з родным каларытам


У беларускай глыбінцы ёсць тысячы месцаў для адпачынку з камфортам, і гэтым летам яны асабліва запатрабаваныя


На чарговай прэс-канферэнцыі ў Мінску гаварылі пра летняе, надзённае — маю на ўвазе нераскрытыя магчымасці турпатэнцыялу краіны. У прэс-цэнтры Дома прэсы адзначалася: жыхары Беларусі апошнім часам наноў адкрываюць для сябе адпачынак на Бацькаўшчыне. Многія выбіраюць, у тым ліку і ў сілу каранавіруснай сітуацыі ў свеце, родныя, вясковыя краявіды з іх цішынёй.

Запрашае “Муховэцька кумора”

Кірыл і Ксенія з Вільнюса — нядаўнія госці аграсядзібы

Пра асаблівасці такога адпачынку ў часе прэс-канферэнцыі расказала Ала Палікарпук. Яна ўзначальвае Грамадскі савет па развіцці аграэкатурызму Кобрынскага раёна (Брэстчына) ды адначасова каардынуе дзейнасць кластара “Муховэцька кумора”. Кластар той аб’яднаў гаспадароў аграсядзіб у Кобрынскім, Жабінкаўскім, Камянецкім і Пружанскім раёнах. А найперш Ала Аляксееўна — сама гасцінная гаспадыня аграсядзібы “На Заречной улице”.

Мы патэлефанавалі ёй крыху пазней, якраз тады, калі пасля доўгага зацішша ў сувязі з пандэміяй каранавіруса ў гаспадыні з’явіліся першыя госці. Маладая сям’я з Вільнюса прыехала, каб адпачыць на зялёным беразе ракі Мухавец у хатцы, якой больш за сто гадоў. Стаіць хатка тая наводдаль ад сучаснага двухпавярховага дома, у якім звычайна жывуць і прымаюць гасцей гаспадары. Рарытэтная хатка была звычайна ў гаспадароў за музей: там сабраны посуд, адзенне й вясковая мэбля пачатку XX стагоддзя. На гэты ж раз пайшлі насустач гасцям, якія жадалі пажыць у асобным будынку. Так і сталася.

А гісторыя аграсядзібы “На Заречной улице” якраз і пачыналася з тае хаткі. Ала Аляксееўна з мужам, Сяргеем Уладзіміравічам, у 90‑я набылі яе, пачалі займацца фермерствам. Доўгі час жылі ў ёй, будавалі свой новы дом. Сёння аграсядзіба “На Заречной улице” мае пладаносны сад з альтанкамі, агарод, ягаднікі й кветнікі агульнай плошчай больш за паўтара гектара. Яе гаспадары першымі ў Кобрынскім раёне пачалі займацца аграэкатурызмам: у 2007 годзе. Ала Аляксееўна памятае, як раней на хутар наведваліся цікаўныя з навакольных вёсак, каб на свае вочы ўбачыць, што гэта за дзіва такое: аграэкатурызм. І некаторыя потым па прыкладзе Палікарпукоў разбудоўвалі ўласныя сядзібы й пачалі таксама прымаць гасцей. Сёння ўсе яны ў суполцы “Муховэцька кумора” ды разам забаўляюць вялікія групы турыстаў, што на тураўтобусах едуць знаёміцца з беларускай глыбінкай. Ала Палікарпук, як каардынатар “Муховэцькой куморы”, узгадняе з турыстамі праграму іх тура па тых аграсядзібах.

Што можа прапанаваць гасцям “Муховэцька кумора”? Экскурсіі па аграсядзібах, выступленні мясцовых фальклорных гуртоў, клубаў гістарычнай рэканструкцыі, рамесныя й кулінарныя майстар-класы, абрадавыя святы. Можна пакатацца вярхом на конях мясцовага коннага клуба, заехаць на раварах прама ў навакольныя краявіды, схадзіць у водны паход на судне-дракары па Мухаўцы… Такія праграмы й туры “Муховэцька кумора” мае намер узнавіць для тургруп у жніўні-верасні, калі, як кажуць, Бог дасць. А замежнікі яшчэ раней ацанілі ўсе даброты адпачынку ў тамтэйшых мясцінах. Да пандэміі каранавірусу тураўтобусы часта прывозілі на аграсядзібы групы замежных турыстаў. Аграсядзібу “На Заречной улице”, у прыватнасці, наведалі госці з Польшчы, ЗША, Канады, Ізраіля, Германіі, Кітая, Японіі, Аўстраліі, Азербайджана, Расіі, Літвы, Латвіі, Эстоніі, Новай Зеландыі ды іншых краін. Ала Палікарпук стараецца памятаць усіх сваіх гасцей. З асаблівай цеплынёй ды ўсмешкай згадвае бабулю Ніну з Брэста. Яна летась у жніўні сабрала на сядзібе ўсю сваю радню, каля 30 чалавек, раскіданую па свеце: яе сваякі сёння жывуць у ЗША, Германіі, Францыі, Польшчы, Расіі, Беларусі. Тры дні ехалі “На Заречную улицу” родныя бабы Ніны, каб пабачыць адзін аднаго ўпершыню. Найстарэйшай з роду споўнілася 92 гады, наймалодшай — 2 годзікі. Але Аляксееўне імпануе ўпартасць бабулі Ніны, з якой тая ажыццявіла сваю мару: паяднаць свой галінасты род і пазнаёміць яго “лісточкі” з Беларуссю. Госці змаглі атрымаць асалоду не толькі ад беларускай прыроды, але й смачна паесці. Гаспадыня “На Заречной улице” гатуе стравы народнай палескай кухні. Хто жадае па прыкладзе бабулі Ніны пабываць у яе ў гасцях (з сям’ёй!), можа пазнаёміцца і з гаспадыняй, і з яе аграсядзібай на сайце http://nzy.by. Сваё жаданне ўжо агучыла сям’я з Мінска, запланаваны й прыезд “паляка з Галандыі”, якому хочацца беларускай экзотыкі.

Санаторыі ды здраўніцы экспартуюць паслугі

Па рэчцы Мухавец на судне-дракары

Аляксандр Цай з Рэспубліканскага цэнтра па аздараўленні й санаторным курортным лячэнні насельніцтва (ён — намеснік дырэктара Цэнтра — начальнік аддзела дзяржзакупак і метадычнай работы) у часе прэс-канферэнцыі адзначаў: Беларусь мае ўсё неабходнае, каб забяспечыць паўнацэнны адпачынак, аздараўленне й санаторна-курортнае лячэнне як беларусам, так і замежнікам. Прычым апошнім часам санаторна-курортныя арганізацыі краіны ўдала канкуруюць і на ўнутраным, і на знешнім туррынках. “Гэта сучасныя шматфункцыянальныя комплексы з развітай медыцынскай базай і кваліфікаваным персаналам”, — удакладніў Аляксандр Цай. У краіне — больш за 300 санаторна-курортных і аздараўленчых арганізацый, могуць размясціць больш за 66 тысяч гасцей. Дзякуючы таму штогод аздараўляюцца ў Беларусі каля 1 мільёна 300 тысяч чалавек. Летась нават выйшлі на 1 мільён 389 тысяч. Багата было й замежнікаў: іх у беларускіх здраўніцах і санаторыях адпачыла 242 тысяч. Так што экспарт паслуг у гэтым сегменце турызму падрос у параўнанні з 2018‑м — на 11, 5 %, склаў больш за 250 мільёнаў беларускіх рублёў. У першым квартале 2020‑га таксама назіраўся рост экспарту паслуг: на 3,4 % у параўнанні з аналагічным перыядам 2019‑га. Колькасць замежнікаў, якія ўжо адпачылі ў санаторыях і здраўніцах Беларусі, — звыш 40 тысяч.

Гаспадыня Ала Палікарпук

Брэнд беларускіх санаторыяў, па словах Аляксандра Цая, — вялікая колькасць бясплатных медыцынскіх паслуг. Многія замежныя арганізацыі такога кшталту ў кошт пуцёўкі ўключаюць дзве-тры бясплатныя медпрацэдуры, а беларускія — каля 8. Да таго ж на тэрыторыях беларускіх санаторыяў прабурана каля 90 уласных свідравін з мінеральнай вадой, а ў лячэнні выкарыстоўваюцца гразі з чатырох радовішчаў. Гэта ж таксама прываблівае турыстаў з‑за мяжы. У прыватнасці, месцы ў беларускіх санаторыях і здраўніцах на жнівень і верасень актыўна браніруюць расіяне.

Ганна Лагун

Нумар у фармаце PDF

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.