Вы тут

Лукашэнка: Наша краіна вымушаная надаваць пільную ўвагу забеспячэнню ўласнай ваеннай бяспекі


Аб гэтым Аляксандр Лукашэнка заявіў сёння на цырымоніі ўшанавання выпускнікоў вышэйшых ваенных навучальных устаноў і вышэйшага афіцэрскага складу.


Віншуючы афіцэраў з заканчэннем вучобы, Аляксандр Лукашэнка адзначыў, што гэта падзея па-сапраўднаму значная не толькі для іх, але і для органаў ваеннага кіравання, воінскіх частак і фарміраванняў сілавых структур, куды, па яго словах, прыйшло «новае, добра падрыхтаванае, дасведчанае афіцэрскае папаўненне».

Прэзідэнт падкрэсліў асаблівую сімвалічнасць таго, што дыпломы афіцэры атрымалі ў год святкавання вялікай гістарычнай даты — 75-годдзя Вялікай Перамогі савецкага народа.

«Але сённяшняй рэальнасцю стала пагроза разбурэння глабальнай сістэмы кантролю над узбраеннямі, у тым ліку ядзернымі, нягледзячы на тое, што 75 гадоў таму ўсе адчулі і зразумелі, што такое вайна. Сутыкненні геапалітычных інтарэсаў звышдзяржаў падаграваюць тлеючыя і спараджаюць новыя лакальныя канфлікты. Прычым няма прымальных універсальных рэцэптаў для іх вырашэння», — канстатаваў Прэзідэнт.

Кіраўнік краіны ўпэўнены, што мілітарызацыя Усходняй Еўропы і актывізацыя ваеннай дзейнасці, у тым ліку каля беларускіх межаў, ні да чаго добрага не вядзе.

«Рызыкі і выклікі ў ваеннай сферы растуць. Давер паміж краінамі падрываецца. І на гэтым фоне эканамічныя, дэмаграфічныя, а таксама экалагічныя праблемы будуць абвастрацца», — папярэдзіў лідар дзяржавы.

Па яго словах, Беларусь выступае актыўным удзельнікам працэсу ўмацавання міжнароднай бяспекі.

«Пры гэтым наша краіна вымушаная надаваць пільную ўвагу забеспячэнню ўласнай ваеннай бяспекі, і найважнейшая роля ў гэтым адводзіцца Узброеным Сілам. Мы абсталёўваем войскі новымі і мадэрнізаванымі танкамі, сродкамі сувязі і радыёэлектроннай барацьбы, радыёлакацыйнымі станцыямі, пастаянна абнаўляем парк авіяцыйнай тэхнікі», — звярнуў увагу Аляксандр Лукашэнка.

Ён запрасіў і афіцэраў Узброеных Сіл, прысутных у Палацы Незалежнасці, актыўна ўключыцца ў працу па падтрыманні пастаяннай баявой гатоўнасці злучэнняў і воінскіх часцей.

Галоўнай задачай супрацоўнікаў органаў унутраных спраў, па словах кіраўніка дзяржавы, з’яўляецца забеспячэнне грамадскага парадку ў краіне і бяспекі грамадзян, а прыярытэтамі застаюцца процідзеянне наркаманіі, карупцыі, узмацненне барацьбы з крадзяжамі і злачынствамі ў сферы высокіх тэхналогій.

Службы, падраздзяленні і органы кіравання Міністэрства па надзвычайных сітуацыях павінны яшчэ больш працаваць на папярэджанне і ліквідацыю інцыдэнтаў і аварый. Асаблівую ўвагу кіраўнік дзяржавы прапанаваў звярнуць на бяспечную эксплуатацыю атамнай станцыі.

Выпускнікам-пагранічнікам Аляксандр Лукашэнка наказаў надзейна забяспечыць ахову дзяржаўнай мяжы.

Адна з асноўных задач спецслужбаў — выяўленне і нейтралізацыя элементаў тэрарызму, экстрэмізму, нацыянальнай і рэлігійнай варожасці, прадухіленне спробаў нанясення шкоды эканоміцы. Гэта таксама падкрэсліў Прэзідэнт.

«Кожны з вас — пісьменны, усебакова падрыхтаваны афіцэр-прафесіянал, упэўнены: патрыёт, які прысвяціў сваё жыццё бескарысліваму служэнню краіне і нашаму народу. Перакананы, што вы зможаце належным чынам абараніць нашу Айчыну, грамадзян і грамадскую стабільнасць. Памятайце, што вы з’яўляецеся спадчыннікамі пераможных традыцый нашых дзядоў і прадзедаў», — звярнуўся да афіцэраў Вярхоўны галоўнакамандуючы.

Сёння традыцыйна ўручаны генеральскія пагоны. Як нагадаў Прэзідэнт, у Беларусі камандзіраў такога ўзроўню зусім няшмат, і атрыманне гэтага звання з’яўляецца публічным прызнаннем заслуг афіцэра.

Выпускнікам вышэйшых ваенных вучэбных устаноў Аляксандр Лукашэнка пажадаў таксама даслужыцца да генеральскіх пагонаў, а ўсім удзельнікам цырымоніі — моцнага здароўя, поспехаў у службе і асабістым жыцці. Прэзідэнт уручыў падзякі лепшым выпускнікам ваенных ВНУ.

Варвара МАРОЗАВА

Выбар рэдакцыі

Спорт

Замена Алімпіядзе. Беларуская лёгкаатлетычная

Замена Алімпіядзе. Беларуская лёгкаатлетычная

Беларуская федэрацыя лёгкай атлетыкі зладзіла свае гульні.

Грамадства

Без чаргі і за лічаныя хвіліны. Як здаюць экспрэс-тэст на каранавірус

Без чаргі і за лічаныя хвіліны. Як здаюць экспрэс-тэст на каранавірус

З мінулага тыдня экспрэс-тэсціраванне на COVІD-19 даступнае ў многіх паліклініках краіны, у тым ліку і ў невялікіх гарадках і пасёлках гарадскога тыпу.