Вы тут

Генадзь Салавей ушанаваў экiпажы камбайнаў, якiя намалацiлi тысячу тон збожжа новага ўраджаю


Старшыня Гомельскага аблвыканкама Генадзь Салавей ушанаваў экiпажы камбайнаў, якiя намалацiлi тысячу тон збожжа новага ўраджаю, а таксама кiроўцаў-тысячнiкаў на адвозцы збожжа. Падарункi i ганаровыя лiсты, як знак падзякi за прафесiяналiзм i вернасць абранай справе хлебароба, з рук кiраўнiка вобласцi атрымалi перадавiкi жнiва Добрушскага i Брагiнскага раёнаў.


Зараз на Гомельшчыне збожжавыя ўбраныя больш чым на 30 % плошчаў. Агульны намалот складае каля 300 тысяч тон. Пры гэтым у шасцi раёнах вобласцi 20 экiпажаў камбайнаў сталi «тысячнiкамi» i 45 кiроўцаў перавезлi па тысячы тон збожжа новага ўраджаю.

У ААТ «Калiнiнскi» — сельгаспрадпрыемстве Добрушскага раёна — сёлета разлiчваюць намалацiць каля 10 тысяч тон збожжа. Гэта на чатыры тысячы перавышае леташнюю лiчбу намалоту. Надзеi на добры ўраджай тым больш рэальныя, што i надвор'е спрыяе, i падрыхтоўчая работа да ўборачнай была праведзена вельмi значная.

У «Калiнiнскiм» ужо ўбрана амаль 60 % плошчаў, намалот — каля 6 тысяч тон. Тры экiпажы камбайнаў намалацiлi тысячу тон збожжа новага ўраджаю, i чатыры кiроўцы сталi «тысячнiкамi».

Кiраўнiк рэгiёна ўручыў перадавiкам уборачнай падарункавыя сертыфiкаты i падзячныя лiсты ад Гомельскага абласнога выканаўчага камiтэта.

— Работа ў сельскай гаспадарцы патрабуе пастаяннага напружання, вялiкай самааддачы, гаспадарчага стаўлення да зямлi i тэхнiкi. Мы дзякуем вам за прафесiяналiзм i вернасць абранай справе хлебароба, — звярнуўся да герояў жнiва Добрушскага краю Генадзь Салавей.

Старшы камбайнер-тысячнiк ААТ «Калiнiнскi» Пётр Самойленка працуе ў сельскай гаспадарцы з 1989 года.

— У гэтае жнiво ў нас ураджайнасць вышэйшая, чым была летась. У сярэднiм выходзiць 40 цэнтнераў на круг, — падзялiўся лiдар жнiва.

У Брагiнскiм раёне «тысячнiкi» — чатыры экiпажы камбайнаў i 13 кiроўцаў. Мясцовыя гаспадаркi ўвогуле сёлета спрацавалi як нiколi, а арганiзацыя ўборачных работ заслугоўвае самых высокiх ацэнак. Усе гаспадаркi Брагiншчыны перасягнулi «экватар» жнiва. Сярод лiдараў у раёне — ААТ «Чамярыскi».

Словы ўдзячнасцi прагучалi на адрас сямейнага тандэму Мiхаiла i Вiталя Салдаценкаў. На рахунку старшага камбайнера Мiхаiла Салдаценкi ўжо пяць перамог на рэспублiканскiх спаборнiцтвах па ўборцы збожжавых. Столькi ж разоў лiдарам станавiўся i кiроўца на адвозцы збожжа Рыгор Малочка.

Сярод тысячнiкаў ААТ «Чамярыскi» ёсць i жанчына — Марыя Фалей. Дырэктар сельскага дома культуры ў гэтую гарачую пару чацвёрты год працуе ў якасцi памочнiка камбайнера.

— Калi выходзiш на камбайне ў поле збiраць хлеб, разумееш, наколькi важная гэтая праца, — падзялiлася жанчына.

Пасля цырымонii ўшанавання герояў жнiва Генадзь Салавей звярнуў увагу на тое, што сёлета ў Гомельскай вобласцi ёсць усе шанцы атрымаць нядрэнны ўраджай збожжавых. Цяпер важна хутка, якасна i без страт завяршыць уборачную i распачаць наступны этап палявых работ.

— З такiмi тэмпамi, як цяпер, мы ставiм задачу ўбраць ураджай за два тыднi. Затым павiнны прыступiць да зачыну на ўраджай будучага года — падрыхтавацца да азiмай сяўбы. Мы павiнны выканаць усе тэхналагiчныя параметры, патрабаваннi. Дзяржава дае нам падтрымку, стварае ўсе ўмовы, каб паспяхова справiцца з пастаўленай задачай. I патэнцыял для гэтага ў нас ёсць, — падкрэслiвае кiраўнiк вобласцi.

Задача сёлетняй азiмай сяўбы, дадае Генадзь Салавей, — максiмальна выкарыстаць элiтнае насенне i зрабiць акцэнт на сортаабнаўленне:

— Летась мы закупiлi пэўную колькасць «элiты» — гэта дало магчымасць падняць нашы вытворчыя паказчыкi i атрымаць вышэйшыя ўраджаi. Таму акцэнт, безумоўна, будзем рабiць на сортаабнаўленнi. Такую задачу ставiм не толькi перад кожным раёнам вобласцi, але i перад кожнай гаспадаркай рэгiёна.

* * *

Дзякуй за работу!

Мiж тым у ААТ «Сцяг Радзiмы», што ў Гомельскiм раёне, з'явiлiся першыя героi жнiва-2020 — тры кiроўцы-тысячнiкi на адвозцы збожжа новага ўраджаю.

ААТ «Сцяг Радзiмы» — перадавое сельгаспрадпрыемства не толькi Гомельскага раёна, але i вобласцi. Механiзатары гаспадаркi намалацiлi ўжо амаль чатыры тысячы тон збожжа. Добраму вынiку паспрыяла i тое, што адразу тры кiроўцы перасягнулi тысячны рубеж на адвозцы збожжа ад камбайнаў.

Кiроўцы-лiдары ААТ «Сцяг Радзiмы» — Аляксандр Турчанок, Iгар Лаўрыновiч i Аляксандр Агароднiкаў. Каб ушанаваць перадавiкоў непасрэдна ў полi, да iх прыехалi першы намеснiк старшынi аблвыканкама Iгар Часнок i старшыня Гомельскага райвыканкама Алена Алексiна.

Вiншуючы першых тысячнiкаў сельгаспрадпрыемства Гомельскага раёна, Iгар Часнок адзначыў:

— Мы да вас прыехалi, каб сказаць шчыры дзякуй за работу! Гэта не паказное мерапрыемства, як, можа быць, хтосьцi думае, а данiна павагi людзям працы. У нас дзяржава для людзей, i вы самая вялiкая наша каштоўнасць, тыя самыя людзi, ад якiх шмат у чым залежыць харчовая бяспека краiны.

Наталля КАПРЫЛЕНКА

Загаловак у газеце: Свята «тысячнiкаў»

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».