Вы тут

Фільм «Грэйхаўнд» даступны на вiдэасэрвiсе Apple TV+


Глядзiм чарговае геройства Другой сусветнай.

Том Хэнкс напiсаў сцэнарый гераiчнага фiльма i сам выканаў у iм галоўную ролю — 10 лiпеня адбыўся лiчбавы рэлiз амерыканскай карцiны «Грэйхаўнд» рэжысёра Аарона Шнайдэра пра Другую сусветную вайну, дапамогу амерыканцаў саюзнiкам i тое, наколькi важныя подзвiгi асобных людзей. Фiльм рыхтаваўся быць выпушчаным у пракат у чэрвенi гэтага года, але класiчная прэм'ера адмянiлася, як шмат што адмянiлася праз каранавiрус. Цяпер суровая, стрыманая i, дарэчы, набожная стужка даступная на вiдэасэрвiсе Apple TV+.


Гэта фiльм пра хвацкiя прыгоды эскадранага мiнаносца «Грэйхаўнд» i яго кемлiвага капiтана Эрнэста Краўзэ — персанажа якраз для сур'ёзнага i засяроджанага твару Тома Хэнкса; уласна сваёй сканцэнтраванасцю i напружанымi позiркамi ўдалечыню акцёр, што ў якасцi сцэнарыста нарэзаў для карцiны няшмат дыялогаў, тут i iграе. Гераiчны марскi паход агорнуты ў пакутлiвае змаганне за справядлiвую справу, лаканiчны набор складаных для разумення абывацеля прафесiйных рашэнняў i глыбокiя колеры наваколля.

Аўтары бяруцца за так званую бiтву за Атлантыку, у якой Германiя падчас Другой сусветнай вайны намагалася парушыць камунiкацыю саюзнiкаў па антыгiтлераўскай каалiцыi ў Атлантычным акiяне. Менавiта праз Атлантыку быў адпраўлены чарговы канвой з «Грэйхаўндам» на чале, а кiраваць мiнаносцам тым часам прызначылi Эрнэста Краўзэ — мiлага, прыстойнага i, калi гэта трэба, самаахвярнага хрысцiянiна. Складанасць заключалася ў тым, каб перасячы так званую «Чорную яму» — некалькi дзён шляху, дзе ўжо не дзейнiчае авiяцыя ВПС ЗША, затое сноўдаюць нямецкiя падлодкi.

Уявiце сабе ўдзел у ваеннай задачы, якую нельга выканаць без страт, i становiшча, калi ты мусiш iсцi наперад, нягледзячы на штосекундную нябачную пагрозу i судны, недзе побач пушчаныя на дно: для канвою — мы сочым за яго прасоўваннем цягам дзён, пераскокваючы ад эскалацыi да эскалацыi, — выкананне задачы становiцца шляхам цераз пекла.

Тым не менш удзел у вайне, загад i абавязак у «Грэйхаўндзе» iграюць як нешта абсалютнае i неаспрэчнае, тут няма матываў ваганняў, болю ад страт, жахаў Другой сусветнай, а толькi цвярозае, халоднае выкананне пастаўленай задачы, якое ў кiно заведама можна ўвасобiць з саспенсам у выглядзе шэрагу дзеянняў, ад якiх глядач не зможа адарвацца, пакуль будзе спрабаваць iх зразумець. Карацей, не — рэфлексiям, так — геройству. Калi хочацца нечага такога, сюжэты якраз лёгка адшукваюцца ў гiсторыi сярэдзiны мiнулага стагоддзя.

Фiльм паказвае бiтву за Атлантыку i барацьбу з нямецкiм бокам праз галоўнага героя, якi не спiць, не есць, сцiрае ногi да крывi, але да апошняга мужна, самааддана, без скаргаў i пытання «за што?» суправаджае свой канвой. У гэтым сэнсе назва карцiны хiтруе — «Грэйхаўнд» тут крыху не «Грэйхаўнд», а «Краўзэ», тым больш Том Хэнкс не абдзялiў персанажа, якога сыграў, вiдавочным рамантычным арэолам.

Эрнэст Краўзэ — вельмi харошы i прыемны мужчына, што хоча ажанiцца з каханай, а ў час выканання абавязку — нястомны i цвярозы баец, здольны патапiць некалькi варожых падлодак, супрацьстаяць так званай воўчай зграi i зрабiць нешта, гледзячы па авацыях у канцы, немагчымае. Ён будзе рацыянальна ацэньваць абстаноўку, аддаваць халодныя загады i на смерцi i страты рэагаваць без нюняў, але, бачна, з болем унутры.

Мы часта глядзiм на яго вачыма каманды, нам паказваюць рэакцыю на яго самаахвярнасць калег, глядач сочыць, як перакусы, што аказваюцца ў кадры, зноў застаюцца некранутымi, бо трэба некуды ляцець i гэтаму насычана шэраму змаганню няма канца. Краўзэ тым часам выглядае такiм стрымана вялiкiм чалавекам — маўляў, ой, ну што вы, — i перыядычна звяртаецца думкамi да каханай. Вось што значыць напiсаць сцэнарый i выканаць галоўную ролю адначасова.

Цягам развiцця падзей на «Грэйхаўндзе» пагрозлiва скароцiцца боезапас, прыйдзе ноч, потым другая, некалькi суднаў канвою патонуць адно за адным, а самаўпэўненыя нямецкiя ваенныя будуць перадаваць па радыёсувязi здзеклiвыя спiчы — пакуль глядач не да канца разумее, што дакладна тут адбываецца, аўтары спраўна ствараюць напружанне — тое, што трэба для прыемнага вечара.

Том Хэнкс даводзiць гэты сюжэт без хэпi-энду, але з узрушальнымi сцэнамi, да канца i iдзе малiцца, праз што ў стужку ўварочваецца хрысцiянскi налёт. Яшчэ адзiн фiльм дапоўнiць вiзуалiзацыю падзей Другой сусветнай вайны — шкада толькi, яго колеравую палiтру i марскiя планы мы глядзiм не на вялiкiм экране кiнатэатра.

Iрэна КАЦЯЛОВIЧ

Загаловак у газеце: Малiтва падчас вайны

Выбар рэдакцыі

Грамадства

Заразіцца прафесіяналізмам. Чаму трапіць на неканферэнцыю настаўнікаў EdCamp лічыцца вялікай удачай?

Заразіцца прафесіяналізмам. Чаму трапіць на неканферэнцыю настаўнікаў EdCamp лічыцца вялікай удачай?

Чацвёртая педагагічная неканферэнцыя прайшла ў мінулыя выхадныя з нязменным аншлагам і сабрала больш як тры сотні педагогаў з розных куткоў нашай краіны.

Спорт

Марына Літвінчук: Нашы дзеці будуць лепшыя, чым мы

Марына Літвінчук: Нашы дзеці будуць лепшыя, чым мы

Да старту Алімпійскіх гульняў у Токіа засталося менш за год. Увага да галоўных стартаў ужо пяцігодкі будзе каласальная.

Культура

Драматург Ксенія Шталянкова: Я думала — мяне разарве ад эмацыянальнай перанасычанасці

Драматург Ксенія Шталянкова: Я думала — мяне разарве ад эмацыянальнай перанасычанасці

П'еса, якой адкрыўся фестываль ТЭАРТ, прысвечана Мінскаму гета.

Грамадства

Час памятаць. Жыццёвы шлях Аляксандра Чарвякова — першага кіраўніка БССР

Час памятаць. Жыццёвы шлях Аляксандра Чарвякова — першага кіраўніка БССР

Сто гадоў таму ў верасні—кастрычніку 1920 года вакол беларускіх зямель разыгралася сапраўдная драма — у Рызе паміж Расіяй і Польшчай пачаліся перагаворы аб аддзяленні на карысць апошняй часткі тэрыторый Беларусі.