Сімвалічны малюнак вышынёй на ўсе тры школьныя паверхі з'явіўся тут зусім нядаўна. Дзяўчынка з заплечнікам шпарка бяжыць па лясной сцяжынцы ўверх — насустрач высачэзным гарам, якія ўзвышаюцца на гарызонце. А знізу подпіс «Скары сваю вяршыню». Якая вяршыня можа быць у вучня? Ну, канешне, выдатная вучоба!
Тэму для мурала выдумляць доўга не прыйшлося. Экалогія! Асіповіцкая школа № 3 актыўна займаецца праектнай дзейнасцю ў гэтым кірунку і рэгулярна атрымлівае міжнародныя гранты. Апошні адукацыйны праект, у якім яна задзейнічана, — «Зялёныя школы». На базе ўстановы сёння працуе клуб экалагічнага маніторынгу Магілёўскай вобласці, які аб'ядноўвае ўсіх ахвотных зрабіць наша асяроддзе чысцейшым, — грамадзян, прадпрыемствы, арганізацыі вобласці. На рахунку вучняў — 30 прэзідэнцкіх прэмій за перамогі на рэспубліканскім узроўні па хіміі і біялогіі.
Аформіць школу ў духе сучаснага арт-мастацтва вырашылі пасля таго, як наведалі нацыянальны адукацыйна-аздараўленчы дзіцячы цэнтр «Зубраня». І вучні, і настаўнікі прыйшлі ў захапленне ад убачаных там малюнкаў на фасадах. Высветлілася, што іх аўтары — студэнты БНТУ.
— Калі мы пра гэта даведаліся, адразу ж звярнуліся да кіраўніцтва ўніверсітэта з просьбай зрабіць і нам такую прыгажосць, — кажа настаўніца хіміі вышэйшай кваліфікацыйнай катэгорыі Святлана Зайцава. — Мы ж пастаянныя ўдзельнікі іх конкурсу «Тэхнаінтэлект». Нас выслухалі і пайшлі насустрач. Прыехалі дзяўчаты з архітэктурнага факультэта і на працягу тыдня размалёўвалі тарэц школы. Мы ж, у сваю чаргу, забяспечылі іх усім неабходным матэрыялам.
Эскіз малюнка распрацавала студэнтка трэцяга курса Марыя Анкудовіч, а ўвасобіць яго ў жыццё ёй дапамаглі аднакурсніцы Валерыя Васілевіч, Дар'я Карэцкая, Валерыя Папова і Ганна Цітавец. Кіравала працэсам натхняльнік і вопытная ў такіх справах студэнтка пятага курса Ганна Зянько.
Работа была даволі складаная. Будынак трохпавярховы, і дзяўчаты карысталіся рыштаваннем, каб працаваць на вышыні. Маляваць ім прыходзілася не на суцэльнай паверхні, а проста на цаглінах, што таксама не зусім зручна. І некалькі разоў прыходзілася затрымлівацца на аб'екце нават пасля заходу сонца, каб з дапамогай праектара перанесці малюнак на сцяну. Але, як прызналіся дзяўчаты, для іх гэта работа — перш за ўсё карысны вопыт, які яны заўсёды гатовы ўдасканаліць, тым больш што адміністрацыя школы паклапацілася аб бяспецы сваіх мастачак.
— Для нас супрацоўніцтва са школай было вельмі важнай справай, — адзначыў дэкан архітэктурнага факультэта БНТУ Армен Сардараў. — Архітэктар павінен быць мабільны, выязджаць на месца, знаёміцца з людзьмі, мясцовасцю, ландшафтам. Мы ўключаем такія работы ў курсавое і пераддыпломнае праектаванне. Нашы студэнткі аднесліся да справы вельмі адказна — з'ездзілі ў Асіповічы, зрабілі эскізы з улікам пажаданняў адміністрацыі школы, усё ўзгаднілі і толькі потым пачалі працаваць. Малюнак сапраўды атрымаўся красамоўны, у ім закладзена вялікая сэнсавая нагрузка. Скарыць вяршыню не так проста. І шлях да ведаў таксама просты не бывае.
Матывам для арт-афармлення школы стала яшчэ адна важная для горада акалічнасць. Сёлета Асіповічы будуць прымаць герояў абласных «Дажынак», значыць, павінны выглядаць годна. Жыхары райцэнтра ўжо паспелі ацаніць арт-аб'ект і актыўна папулярызуюць яго ў сацсетках. Гэта значыць, што ў іх з'явілася яшчэ адна нагода для гонару за сваю малую радзіму.
Школа вельмі ўдзячная за дапамогу ў афармленні будынка адміністрацыі БНТУ. Тут спадзяюцца, што налета гэта супрацоўніцтва працягнецца, і на яшчэ адным фасадзе з'явіцца не менш сімвалічны малюнак. Педагогі перакананыя: знешняя прыгажосць выхоўвае і ўнутраную.
Нэлі ЗІГУЛЯ
Фота з архіва Асіповіцкай школы № 3
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.