Вы тут

У Нацыянальным цэнтры сучасных мастацтваў працуе выстаўка «Музыка і святло»


У пачатку верасня ў Нацыянальным цэнтры сучасных мастацтваў адбылося адкрыццё міжнароднай выстаўкі «Музыка і святло». Удзельнікамі яе сталі аўстрыйскія і беларускія мастакі, якіх аб'яднала тэма любові да музыкі.


З аўстрыйскага боку прадстаўлены работы Сільвіі Эрэнрэйх, Элы Клідорфер-Эгер, Альберта Шмідбаўэра, Вярэны Пранштэтэр. Беларускае сучаснае мастацтва прадстаўляюць Марыя Барысенка, Ганна Сілівончык, Іван Семілетаў і Сяргей Крыштаповіч.

Як музыка ўплывае на нас? Як мы яе ўспрымаем? Як праз колер перадаць мелодыю? Як узаемадзейнічаюць культуры краін з рознай гісторыяй? На гэтыя і іншыя пытанні мастакі паспрабавалі знайсці адказы. Некаторыя з работ адсылаюць гледачоў да масавай культуры. Напрыклад, арт-аб'ект Марыі Барысенкі пад назвай «Come together», з серыі «Beatles» (2011 г.), асацыюецца ні з чым іншым, як з вядомай музыкальнай групай. Ёсць і карціны з сацыяльным пасылам, напрыклад малюнак Сільвіі Эрэнрэйх «Танцоўшчыцы супраць рака» (2020 г.). Экспазіцыя ўключае ў сябе карціны, выкананыя ў стылі абстрактнага экспрэсіянізму, сімвалізму, фантастычнага рэалізму. Таксама на выстаўцы прадстаўлены катэгорыі арт-аб'екта, відэа-арту і графікі.

У тэксце, прысвечаным экспазіцыі, Алена Цагельская піша: «У гэтым годзе людзі з многіх краін сутыкнуліся з моцнымі ўзрушэннямі. Выстаўка «Музыка і святло» — гэта агульная мара аб «вылячэнні» планеты, напамін аб тым важным, што аб'ядноўвае людзей ва ўсім Сусвеце».

Хуберт Турнхофер — адзін з куратараў выстаўкі — з'яўляецца дырэктарам галерэі «Кунстраум» (уваходзіць у дзясятку лепшых у Вене). З наведвальнікамі ён падзяліўся сваімі меркаваннямі наконт здзейсненага праекта: «Пяць гадоў я працаваў выкладчыкам у Маскоўскім Інстытуце замежных моў. За гэты час мне ўдалося пазнаёміцца з мастакамі, наведаць мноства выставак і майстэрняў. Таму мой густ вельмі спецыфічны, не тыпова аўстрыйскі — я заўсёды адкрыты для новага вопыту. Шэсць гадоў таму я пазнаёміўся з Аленай Цагельскай. Яна паказала мне, што ў Беларусі вельмі шмат чаго адбываецца. Прадставіла мяне як мастака і патэнцыяльнага куратара, гатовага да супрацоўніцтва».

Калі пачалі арганізоўваць выстаўку, з'явіліся праблемы, выкліканыя каранавірусам, і «Музыку і святло» прыйшлося адкласці. Але потым усё ж вырашылі, што выстаўка адбудзецца, і Хуберт пачаў адбіраць мастакоў са сваёй краіны. «Я мяркую, што атрымалася вельмі моцная і гарманічная выстаўка, — кажа Хуберт Турнхофер. — Зараз папулярныя эксперыментальныя напрамкі: інсталяцыі, акцыянізм, хэпінінгі і іншае. Але ўсё ж на рынку больш запатрабаваны жывапіс. На выстаўцы адлюстравана гэтая тэндэнцыя — жывапіс і графіка ў нас ідуць на першым месцы. У работах беларускіх мастакоў прысутнічаюць тыя тэхнікі і напрамкі, якія вельмі шануюцца. Напрыклад, друкаваная графіка. Гэта асобны Сусвет, даволі маленькі, але ў ім існуюць неверагодныя рэчы. У адным толькі абсягу друкаванай графікі існуе сто пяцьдзясят розных тэхнік»...

Пабачыць работы беларускіх і аўстрыйскіх мастакоў можна ў Нацыянальным цэнтры сучасных мастацтваў да 1 лістапада.

Арына КАРПОВІЧ

Прэв’ю: thejizn.com

Загаловак у газеце: Якога колеру мелодыя?

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.