“Маладосць”-child: ствараем “дзіцячы” нумар

“Маладосць”-child: ствараем “дзіцячы” нумар

Сябры!

Аўтары цяперашнія і будучыя!

Часопіс “Маладосць” даўно хоча стварыць “дзіцячы” нумар, у які ўвайшлі б… Не, не дзіцячыя вершыкі або “казачкі для чытання нанач” (хаця і яны таксама, чаму б і не), а ўсё тое, што закранае, уздымае, узварушвае, зрушвае, пракладае: пытанні-праблемы-задачы-шляхі, звязаныя з выхаваннем новага пакалення. З выхаваннем, у першую чаргу, эстэтычным, грамадзянскім, маральным, эмацыйным, духоўным, літаратурным.

Што патрабуецца / прымаецца на разгляд / будзе сустрэта прыхільна / з удзячнасцю прынята ў друк:

• яркія, вострыя, “паваротныя” артыкулы тых, хто ведае, што піша
• гутаркі з тымі, каму ёсць што сказаць (калі Вы такі чалавек — прапануйце сябе: пагутарым);
• аўтарытэтныя меркаванні па актуальных пытаннях, выказаныя ў форме невялікіх эсэ;
• развагі, назіранні, прапановы, парады — усё, што сапраўды мае карысць;
• мастацкія творы “на тэму”.

Хочам бачыць аўтарамі гэтага выпуска:

• настаўнікаў з вялікай літары;
• сапраўдных псіхолагаў;
• свяшчэннікаў;
• бацькоў, бабуль, дзядуль;
• дзяцей, якім ёсць што сказаць дарослым;
• празаікаў і паэтаў.

“Дзіцячы” нумар “Маладосці” запланаваны на першае паўгоддзе 2021 года. Чакаем прапаноў ад гэтага дня і да першага дня вясны.