Вы тут

Інфекцыяніст: Большасць дзяцей — бессімптомныя носьбіты


Колькасць выяўленых выпадкаў заражэння каранавірусам у свеце ў мінулую нядзелю перавысіла 35 мільёнаў. Пры гэтым амаль 1 мільён 35 тысяч чалавек на планеце загінула, паправілася больш за 24 мільёны 362 тысячы. Больш за ўсё выпадкаў заражэння зафіксавана ў ЗША (больш за 7,4 мільёна), далей ідуць Індыя (больш за 6,5 мільёна) і Бразілія (больш за 4,9 мільёна). Некаторыя краіны вяртаюцца да ўзмацнення каранцінных мерапрыемстваў. У Беларусі ў апошнія тыдні таксама расце колькасць новых выпадкаў. Цяпер у суткі іх рэгіструецца больш за 400. Усяго ў нашай краіне зарэгістравана больш за 80,6 тысячы выпадкаў COVІD-19, больш за 75,3 тысячы чалавек паправіліся. З пачаткам навучальнага года ў школах здараюцца сітуацыі, калі на самаізаляцыю адпраўляюцца цэлыя класы. Наколькі небяспечны каранавірус для дзяцей, які парадак выяўлення інфекцыі і як разлічваецца тэрмін самаізаляцыі, «Звяздзе» расказала ўрач-інфекцыяніст 3-й дзіцячай клінічнай паліклінікі Мінска Юлія Мілько.


— Цяпер назіраецца павелічэнне захваральнасці на COVІD-19. Чым можна растлумачыць павелічэнне колькасці хворых?

— Пасля летніх канікул у школы і дзіцячыя садкі вярнуліся дзеці, скончылася адпускная кампанія,  многія дарослыя выйшлі на работу. Акрамя таго, людзі стаміліся ад самаізаляцыі, перасталі насіць маскі, прызвычаіліся да небяспекі інфекцыі.

— Ці мянялася тактыка работы з інфіцыраванымі? Кантакты першага ўзроўню па-ранейшаму выяўляюць і накіроўваюць на самаізаляцыю?

— Тактыка не мянялася, мы працягваем працаваць згодна з 690-м загадам Міністэрства аховы здароўя. Калі камусьці выстаўляецца дыягназ COVІD-19, даныя паступаюць у санітарную службу. З хворым звязваецца ўрач-эпідэміёлаг, які ў выніку апытання складае кола кантактаў. Гэтыя людзі мусяць быць абследаваны і накіраваны на самаізаляцыю. Звесткі пра іх паступаюць у медустановы, дзе яны абслугоўваюцца. Такім чынам, паліклініка атрымлівае інфармацыю ад санітарнай службы з данымі пра асобу і датай кантакту. Выязджае кантактная група і абследуе гэтага чалавека.

І тут варыянты далейшых дзеянняў розняцца ў залежнасці ад таго, на які дзень ад кантакту з інфіцыраваным абследаваны пацыент. Калі мазок узяты на 1—10 дзень, і ён адмоўны, то паўторнае абследаванне адбываецца на 13 дзень экспрэс-тэстам. Пры гэтым пацыент знаходзіцца дома 14 дзён ад дня кантакту. Калі ж  другі мазок станоўчы, то самаізаляцыя падаўжаецца да 21 дня з моманту кантакту. Паўторны мазок робіцца толькі калі першы быў узяты да 10-га дня кантакту. Калі ж мазок узяты з 10 да 14 дня, то ён робіцца толькі аднойчы. Калі ён аказваецца станоўчым, самаізаляцыя падаўжаецца да 21 дня з моманту кантакту.

Часта сярод бацькоў узнікае неразуменне, што тэрмін самаізаляцыі адлічваецца менавіта ад даты кантакту з хворым. Калі, скажам, у настаўніцы апошні ўрок быў 10-га, але мазок яна здала 7-га, і ён аказаўся станоўчы, то 14-дзённы адлік вядзецца з сёмага, а не з 10-га. Дату кантакту нам дае эпідэміёлаг, і мы арыентуемся менавіта на яе. Урачы ў паліклініцы наўмысна нікому не могуць зменшыць тэрмін самаізаляцыі.

— Колькі цяпер у паліклініцы працуе выязных брыгад?

— Па-рознаму. Летам, напрыклад, была ўсяго адна. Цяпер працуе ад дзвюх да чатырох брыгад. Калі ў школе на самаізаляцыі цэлы клас, то кантактных брыгад паліклініка вымушана фарміраваць больш. Калі гэта толькі сямейныя ачагі, іх менш. Пару тыдняў таму ў нас было 460—480 кантактаў, з іх у дзень трэба было наведаць 240. На гэтым тыдні невялікае зацішша, усяго каля 150—170 кантактных дзяцей.

— Як захворванне пераносяць дзеці? Ці здараюцца ў іх пнеўманіі?

— Дзеці ў адрозненне ад дарослых пераносяць нашмат лягчэй. Мы назіраем шмат бессімптомных формаў: мазок станоўчы, але ніякіх праяў інфекцыі няма. Калі ж з'яўляюцца клінічныя праявы, то нячаста справа можа даходзіць да бранхіту ці трахеабранхіту. Або некалькі дзён трымаецца тэмпература, пры гэтым можа быць дастаткова высокай — да 39, і больш ніякіх сімптомаў. А найчасцей усё ж бывае невысокая тэмпература, каля 37,2, боль у горле, можа быць кашаль, гэта сімптомы ВРІ. Пнеўманіі вельмі рэдкія, за ўвесь сезон з сакавіка ў дзяцей на тэрыторыі абслугоўвання нашай паліклінікі было ўсяго дзве «ковідныя» пнеўманіі.

— Калі ў класе выяўляецца захварэлы, што з астатнімі дзецьмі?

— Увесь клас адпраўляецца на самаізаляцыю. Спісы ў санітарную службу падае школа, адпаведна пасля яны паступаюць у паліклініку, і мы выязджаем па ўсіх адрасах.

— Дзе, як правіла, заражаюцца дзеці?

— Ёсць і сямейныя ачагі, ёсць і школьныя, заразіцца можна паўсюль. Але большая частка дзяцей з'яўляецца бессімптомнымі носьбітамі, таму яны самі ўяўляюць небяспеку для дарослых, найперш для людзей старэйшага пакалення.

— Ці могуць дзеці здаць тэст на платнай аснове?

— Магчымасць тэста метадам ПЦР на платнай аснове з'явілася нядаўна. Але трэба маніторыць, якія ўстановы яго цяпер выконваюць, іх пералік мяняецца. Да таго ж дзяржаўныя ўстановы ПЦР-мазок на платнай аснове робяць толькі для выезду за мяжу, і толькі пры наяўнасці білета. Ёсць такая магчымасць і ў некаторых прыватных медцэнтрах. Экспрэс-тэсты платна можна зрабіць на базе дарослых бальніц і паліклінік.

— Як дзейнічаць, калі ў дзіцяці з'явілася тэмпература, недамаганне?

— Максімальна ізаляваць яго дома, каб заразіць як мага меней навакольных. Звяртацца ў паліклініку, там дадуць усе інструкцыі. Або запросяць у паліклініку (у нас арганізавана размежаванне патокаў: асобны ўваход для неадкладнай дапамогі пры сімптомах ВРІ і тэмпературы), або вас наведае ўрач.

Алена КРАВЕЦ

Прэв’ю: bykhov.by

Выбар рэдакцыі

Грамадства

Што мяняецца з 1 снежня

Што мяняецца з 1 снежня

Вырасце памер пенсiй: па ўзросце, за выслугу гадоў, па iнвалiднасцi, з прычыны страты кармiцеля. 

Грамадства

​Што павiнны зрабiць на прадпрыемствах, каб папярэдзiць распаўсюджванне COVID-19

​Што павiнны зрабiць на прадпрыемствах, каб папярэдзiць распаўсюджванне COVID-19

Мiнiстэрства аховы здароўя распрацавала рэкамендацыi па прафiлактыцы каранавiруснай iнфекцыi ў арганiзацыях.

Грамадства

Бонусы для альтруiстаў могуць быць прадугледжаны законам аб валанцёрскай дзейнасцi

Бонусы для альтруiстаў могуць быць прадугледжаны законам аб валанцёрскай дзейнасцi

Пра гэтыя i iншыя прапановы ў законапраект аб валанцёрскай дзейнасцi разважалi эксперты падчас круглага стала.

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава.