Як камунальнiкi i жыхары рыхтуюцца да халадоў

Сумесь для пасыпання дарог Беларусi ўзiмку на 95 % складаецца з пяску, а соль выкарыстоўваюць толькi падчас галалёдзiцы. У 16 дамах людзi пагадзiлiся павысiць энергаэфектыўнасць сваiх будынкаў, дадаўшы да бюджэтных сродкаў уласныя грошы, а 100 хат памянялi пячное ацяпленне на электрычнае. Пашпарты гатоўнасцi да зiмы 1 кастрычнiка атрымалi ўсе крынiцы цеплаэнергii i спажыўцы цяпла (жыллёвы фонд) рэспублiкi. Пра гэта i iншае на прэс-канферэнцыi пра падрыхтоўку краiны да зiмы расказалi спецыялiсты.

IПУ i энергаэфектыўнасць

Падчас падрыхтоўкi да асенне-зiмовага сезона аб'екты ЖКГ кожны тыдзень кантралявалiся па 13 асноўных паказчыках i штомесяц —  па 90 iншых пазiцыях. У камунальнiкаў зроблены ўсе неабходныя запасы рэсурсаў i пясчана-саляных сумесяў. Пакуль дазваляе надвор'е, рамантуюць дахi, сценавыя стыкi (iх гатоўнасць дасягае 90 %), завяршаецца капiтальны рамонт жылля, паведамiў Андрэй РАМАШКА, начальнiк упраўлення жыллёвай гаспадаркi Мiнiстэрства ЖКГ:

—  Актыўна развiваецца кiрунак арганiзацыi разлiкаў за цяпло па iндывiдуальных прыборах улiку (IПУ). Такiх спажыўцоў яшчэ ў 2017— 2018 гг. было 90 тысяч, а летась —  ужо 120 тысяч, i ў гэтым годзе, чакаецца, iх стане яшчэ больш. Гэта тлумачыцца тым, што ў 2019-м людзям прапанавалi знiжкi за выкарыстанне iндывiдуальных прыбораў рэгулявання цеплаэнергii i разлiк па iх.

На 5 % менш на працягу трох гадоў могуць плацiць тыя, у каго прыборы ў кватэрах былi ўстаноўлены, але людзi не разлiчвалiся па iх паказчыках. I на 10 % менш плацяць уласнiкi, якiм такiя прыборы паставiлi ў рамках энергаэфектыўных мерапрыемстваў.

Жыхары 16 дамоў, якiя знаходзяцца ў Гродзенскай, Брэсцкай, Мiнскай, Магiлёўскай абласцях i ў сталiцы, пагадзiлiся павялiчыць энергаэфектыўнасць сваiх дамоў, згодна з леташнiм Указам Прэзiдэнта № 327, якi прадугледжвае сумесную аплату энергаэфектыўных мерапрыемстваў дома грамадзянамi i дзяржавай.

— Гэта жылыя дамы, капрамонт у якiх у асноўным запланаваны на 2021-ы або адбываецца сёлета. У доме ў Магiлёўскай вобласцi гэтыя мерапрыемствы ў рамках капрамонту ўжо выкананы: тут уцяплiлi фасад i дах, аднак комплекснай глыбiннай мадэрнiзацыi не было (жыхары двухпакаёвай кватэры ў iм цяпер будуць плацiць за выкананыя работы прыкладна па 10 рублёў у месяц на працягу дзесяцi гадоў), — акрэслiў Андрэй Рамашка. — Аб'ём работ па энергаэфектыўнасцi ў сваiм доме вызначаюць уласнiкi, зыходзячы з магчымай эфектыўнасцi i кошту мерапрыемстваў.

Комплексная мадэрнiзацыя дома, якая ўключае ў сябе ў тым лiку i рэканструкцыю сiстэм ацяплення, што дазваляе iндывiдуальна рэгуляваць i лiчыць цеплаэнергiю, згодна з разлiкамi праектнага iнстытута, можа ў далейшым зменшыць цеплаўжыванне будынка на 50 %. Нават уцяпленне толькi агароджваючых канструкцый ужо дае 15-20 % эканомii цеплаэнергii, нагадаў эксперт ЖКГ.

Кiламетры цепла- i водаправодаў, тоны вугалю i рэагентаў

Сталiца таксама цалкам гатовая да зiмы, запэўнiваюць спецыялiсты. Камунальныя прадпрыемствы Мiнска атрымалi 38 пашпартоў гатоўнасцi да зiмы (100 %). 627 дамоў, якiя належаць таварыствам уласнiкаў i знаходзяцца на самаабслугоўваннi, таксама «пашпартызаваны», расказаў Сяргей РУБАНАЎ, генеральны дырэктар Мiнскай гарадской жыллёвай гаспадаркi:

— У межах падрыхтоўкi да зiмы выкананы шэраг работ. Адрамантаваны дахi, стыкi сценавых панэляў, уцеплены будынкi з цэнтральнай сiстэмай ацяплення. У 529 iндывiдуальных сядзiбах, дзе праведзены газ, праверылi гэтае абсталяванне, прачысцiлi 9246 дымавых каналаў i больш як 18,5 тысячы — вентыляцыйных.

На зiму Мiнску, як плануецца, спатрэбiцца 6628 тон супрацьгалалёдных рэагентаў, з iх ужо маецца прыкладна трацiна. У запасе знаходзiцца 50 % сумесяў для апрацоўкi дарог, па меры iх расходавання запасы будуць папаўняцца.

— Для апрацоўкi дарожна-вулiчнай сеткi ў Мiнску будзе прымяняцца пясчана-саляная сумесь, якая больш чым на 95 % складаецца з пяску. Чыстую соль выкарыстоўваюць толькi падчас моцнай галалёдзiцы, каб хутка прывесцi пакрыццё дарогi ў нармальны стан, — удакладнiў Уладзiмiр ЛЕБЕДЗЬ, начальнiк упраўлення гарадской гаспадаркi i энергетыкi Мiнгарвыканкама.

Прадпрыемствам «Мiнсккамунцепласеткi» выкананы прафрамонт i выпрабаванні абсталявання на 45 кацельных i 287 цэнтральных цеплапунктах, заменены 52 кiламетры трубаправода. «Мiнскводаканал» зрабiў прафiлактычнае абслугоўванне на 3145 кiламетрах водаправода i прамыўку 708 кiламетраў сетак i вадаводаў. На кожным прадпрыемстве сфармiраваны аварыйныя брыгады, сёння гэта 245 чалавек у 93 брыгадах, удакладнiў гендырэктар. На выпадак аварыi маюцца таксама дзве модульныя кацельныя.

— Заменена i адрамантавана больш як 100 кiламетраў цепласетак. 3091 спажывец цеплаэнергii i 487 цеплакрынiц атрымалi пашпарты гатоўнасцi. Усе аб'екты сацыяльнага прызначэння, аховы здароўя, адукацыi Мiнгравыканкама, культуры, спорту i турызму таксама маюць пашпарты на асенне-зiмовы перыяд 2020—2021 гг., — расказаў Уладзiмiр Лебедзь. — Падрыхтавана 135 тон вугалю, 668 м³ дроваў, 71 тона брыкета. Складскiя запасы палiва папаўняюцца па меры рэалiзацыi.

763 адзiнкi тэхнiкi «Гаррамаўтадара» гатовыя да работы ўзiмку. Для складзiравання снегу прадугледжана дзевяць асноўных i рэзервовыя пляцоўкi (для часовага складзiравання), а таксама магутнасцi снегаплавiльнага пункта.

Мегаваты замест кубаметраў

Сталiчная вобласць назапасiла 1000 тон мазуту, каля 290 тысяч кубаметраў драўнiны, у тым лiку 60 тысяч кубаметраў палiўных шчэпак, каля 20 тысяч тон торфу. Камунальнiкамi сталiчнай вобласцi зроблены прафрамонт сiстэм ацяплення ў 6200 дамах, адрамантавана каля 22 тысяч стыкаў панэляў i каля 50 тысяч квадратных метраў даху.
У 730 дамах адрамантавана электраабсталяванне, 56 бойлераў i каля 390 балконаў, выпрабавана 2870 кiламетраў цепласетак. На балансе маюцца тры блочна-модульныя кацельныя, заменена каля 28 неэканамiчных i неэфектыўных катлоў, прывёў лiчбы гатоўнасцi да зiмы Сяргей ДУДЗIЧ, начальнiк упраўлення вытворчасцi, будаўнiцтва i развiцця жыллёва-камунальнай гаспадаркi Мiнскай вобласцi:

— Мы ўстанаўлiваем катлы, якiя працуюць на пялетах цi шчэпках замест катлоў на дровах, у асноўным на падвальных кацельных. Такiм чынам пазбаўляемся ад устаноўленых нагрузак, а абсталяванне падбiраецца пад фактычную нагрузку, каб выключыць завышаны расход палiва. Стараемся аптымiзаваць работу кацельных, устанаўлiваем аўтаматызаваную падачу палiва.

У пасёлку Лугавая Слабада (Мiнскi раён) падчас рэканструкцыi кацельнай устанавiлi кацёл на шчэпках магутнасцю 2 МВт i дадаткова ўстанавiлi два электракатлы, якiя летам забеспячваюць людзей гарачай вадой. На кацельнай у Фанiпалi працуе электракацёл магутнасцю 1 МВт, што iстотна здымае нагрузку па гарачай вадзе i летам таксама забяспечвае ёй дамы. Згодна з праграмай аб пераводзе кацельных i ўстаноўцы электракатлоў, на кацельнай у Барысаве плануецца ўстанавiць кацёл на 10 МВт у 2025 годзе.

Замянiць кубаметры дроў мегаватамi электраэнергii ў Беларусi могуць i гаспадары хат, якiя абаграваюцца печкай. Для такiх сядзiб прадугледжана магчымасць перавесцi пячное ацяпленне на электрычнае. Аднак зрабiць гэта, маючы толькi адно жаданне, пакуль немагчыма. У краiне iснуе праблема недастатковасцi магутнасцяў электрасетак.

— Ва ўсiх аблвыканкамах ёсць спiсы дамоў, якiя неабходна пераводзiць з пячнога ацяплення на электрычнае. Гэты пералiк узгоднены з Мiнiстэрствам энергетыкi, i там, дзе была магчымасць правесцi работы, дамы ўжо пераведзены на новы варыянт ацяплення. Гэта прыкладна 100 дамоў, — пракаментаваў праблему Андрэй Рамашка. — Праблема прыстасаванасцi электрасетак да забеспячэння падключанай нагрузкi сёлета разглядалася ва ўрадзе i па спiсах, якiя прадаставiлi выканкамы, прадпрыемствы Мiнэнерга будуць праводзiць работу па магчымай рэканструкцыi сетак.

Iрына СIДАРОК

Фота аўтара