Вы тут

​Электрамагутная будучыня. 500 МВт на біяпаліве, 750 МВт — на аднаўляльных крыніцах, стратэгія нізкавугляроднага развіцця


Наступнае пяцігоддзе праз увод у эксплуатацыю Беларускай АЭС надасць новае развіццё электратэхналогіям, якія дазволяць поўнасцю выключыць з паліўна-энергетычнага балансу краіны прыродны газ і нафтапрадукты і заменяць іх сабой. У сваю чаргу гэта прывядзе да развіцця аднаўляльных крыніц энергіі (АКЭ) і іх інтэнсіўнай інтэграцыі ў энергасістэму Беларусі. Прагназуецца таксама з'яўленне новых прарыўных тэхналогій не толькі ў паліўна-энергетычным балансе, але і ў будаўніцтве, і прамысловасці, што дазволіць максімальна адысці ад імпарту вуглевадародаў. Гэта звязана і з міжнароднымі абавязацельствамі Беларусі па змяншэнні выкідаў СО2 у атмасферу. Пра будучыню аднаўляльнай энергетыкі краіны на прэс-канферэнцыі расказалі эксперты.


Рэзервы аднаўляльных крыніц

Як вядома, Беларусь імпартуе большую частку сваіх энергарэсурсаў — да 84 % усіх вуглевадародаў паступае да нас з-за мяжы. Таму ў краіне праводзіцца палітыка энергазберажэння і ўкаранення аднаўляльных крыніц энергіі (АКЭ), нагадаў Міхаіл МАЛАШАНКА, намеснік старшыні Дзяржаўнага камітэта па стандартызацыі, дырэктар Дэпартамента па энергаэфектыўнасці.

Налета краіна плануе ўвесці ў эксплуатацыю не менш за 500 МВт цеплагенерыруючых магутнасцяў з выкарыстаннем біяпаліва ў сістэме ЖКГ для забеспячэння патрэб насельніцтва ў цеплаэнергіі. Біяпаліва і цяпер стварае найбольшую частку энергіі ў паліўна-энергетычным балансе. У асобных раёнах выраб цеплаэнергіі ў сістэме ЖКГ з дапамогай гэтай крыніцы дасягае 70—90 %. Аднак у энергабалансе краіны ў цэлым мясцовыя віды паліва (МВП) займаюць толькі 16,5 %. Пры гэтым мяркуецца, што да 2025-га магутнасць установак, што працуюць на АКЭ, дасягне 750 МВт.

— Магутнасць беларускай энергасістэмы складае 10 170 МВт. За восем месяцаў сёлета магутнасць установак, якія працуюць з выкарыстаннем АКЭ, за кошт уводу новых аб'ектаў павялічылася на 82,1 МВт і склала 486,7 МВт. Гэта 4,8 % ад агульнага аб'ёму вырабу энергіі (летась было 4 %), — абазначыў Сяргей ГРЭБЕНЬ, начальнік упраўлення энергаэфектыўнасці, экалогіі і навукі Міністэрства энергетыкі.

Летась у паліўна-энергетычным балансе краіны 7,1 % энергіі атрымана з аднаўляльных крыніц. У асобных краінах свету 25—30 % электраэнергіі вырабляецца з дапамогай аднаўляльных крыніц. У нас гэта лічба складае 2 % (ад АКЭ ў энергабаланс паступае 0,9 млрд кВт·г пры сумарным унутраным спажыванні на ўзроўні больш як 38,1 млрд кВт:

— У Беларусі распрацаваны план дзеянняў да 2030 года, існуе шэраг дамоўленасцяў з Міжнародным агенцтвам па аднаўляльным крыніцам энергіі (ІRENA), якое гатова аказаць тэхдапамогу і правесці работу адносна магчымасці і павелічэння выкарыстання АКЭ ў Беларусі. Сёння ўстаноўленая электрычная магутнасць мясцовых аднаўляльных крыніц у краіне каля 492 МВт. Паводле міжнародных энергетычных суполак, калі магутнасць АКЭ складае менш за 10 % ад аб'ёмаў усёй энергасістэмы, то яна не ўплывае на збалансаваную работу сістэмы ў цэлым, — расказаў Міхаіл Малашанка.

Стандарты для ветраўстановак

Забруджанасць паветра і абмежаванасць паліўных выкапняў робяць ветраэнергетыку бадай што самай чыстай аднаўляльнай крыніцай энергіі. Сёння гэта адна з найбольш перспектыўных яе крыніц, якая паспяхова развіваецца і з'яўляецца важным кірункам энергазберажэння, акрэсліла Аляксандра ШАЎЦОВА-РОНІНА, начальнік аддзела тэхнічнага нарміравання і стандартызацыі ў электратэхніцы, радыёэлектроніцы і энергазберажэнні Белдзяржінстытута стандартызацыі і сертыфікацыі:

— Стварэнне ветрапаркаў у краіне — адносна новы кірунак. Для забеспячэння нарматыўнай падтрымкі нашым інстытутам распрацаваны тры міждзяржаўныя стандарты, якія вызначаюць патрабаванні да ветраэнергетычных установак.

Адзін з іх датычыцца патрабаванняў да праектавання ветраэнергетычных установак, іх канструкцый і ўсіх падсістэм. Яго мэта — абараніць устаноўку ад усялякіх уздзеянняў на працягу ўсяго часу існавання. Другі стандарт датычыцца патрабаванняў да малых ветраэнергетычных установак, іх падсістэм і механізмаў. Яшчэ адзін стандарт утрымлівае выпрабаванні на адпаведнасць і сертыфікацыю. Ён закліканы аблегчыць узаемнае прызнанне ўдзельнікамі рынку вынікаў выпрабаванняў і дакументаў аб ацэнцы адпаведнасці, якія выдадзены ў межах розных дзяржаў.

Сонца, вада і парніковыя выкіды

Беларусь — удзельніца рамачнай канвенцыі ААН аб змяненні клімату. Наша краіна ўзяла на сябе абавязацельства скараціць да 2030 года выкід парніковых газаў на 28 % у параўнанні з аб'ёмамі 1990-га, таму развіццё АКЭ ў краіне вельмі важнае. Аднак, нягледзячы на тое, што ў 2018-м працэнт скарачэння ўжо дасягнуў 33, праз высокае развіццё прамысловасці і іншых галін эканомікі краіны без дадатковых мер і мерапрыемстваў па зніжэнні выкідаў парніковых газаў, Беларусь можа не дасягнуць заяўленага скарачэння да 2030 года, падкрэсліла Наталля ГУЛЬНІЦКАЯ, начальнік упраўлення рэгулявання ўздзеянняў на атмасфернае паветра, змяненне клімату і экспертызы Міністэрства прыродных рэсурсаў і аховы навакольнага асяроддзя.

Летась выкіды ад стацыянарных крыніц склалі 426,1 тысячы тон, з іх 85 тысяч тон — ад спальвання паліва. Сёння краіна мае дастатковы патэнцыял для развіцця аднаўляльнай энергетыкі. Гадавы прыход сонечнай радыяцыі на адзінку плошчы ў нас супастаўны з такімі паказчыкамі ў Германіі ці Польшчы, дзе сонечная энергетыка развіваецца больш высокімі тэмпамі.

— У нас няма такога ветру, як у краінах з морамі і акіянамі, аднак пры існуючых тэхналогіях нашы паказчыкі па ветры дастатковыя, каб ветраэнергетыка стабільна развівалася. Патэнцыял гідраэнергетычных рэсурсаў краіны каля 250 МВт. Ён сканцэнтраваны ў Гродне, Віцебску і Магілёўскай вобласці каля рэк Нёман, Заходняя Дзвіна і Дняпро, — звярнула ўвагу Наталля Гульніцкая.

Ірына СІДАРОК

Загаловак у газеце: ​Электрамагутная будучыня

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».