Алімпійскі рух Беларусі мае не толькі цікавую сучаснасць, але і багатую гісторыю, якая прадстаўлена ў музеі алімпійскай славы. Знаходзіцца музей у штаб-кватэры Нацыянальнага алімпійскага камітэта. «Звязда» правядзе завочную экскурсію і пазнаёміць сваіх чытачоў з самымі цікавымі яго экспанатамі.
У 2020 годзе спаўняецца 40 гадоў ХХІІ летнім Алімпійскім гульням, якія прымала Масква. Тыя гульні сталі грандыёзнай спартыўнай і грамадска-палітычнай падзеяй. Таму адзін з ключавых экспанатаў музея алімпійскай славы — факел эстафеты алімпійскага агню 1980 года. Яго ў музей НАК перадаў легендарны Аляксандр Мядзведзь, які запаліў алімпійскі агонь на мінскім стадыёне «Дынама». У межах алімпіяды там праходзілі спаборніцтвы па футболе.
Першапачаткова японская кампанія, якая выйграла міжнародны тэндар на стварэнне факела, прапанавала макет у форме бамбуку. Але з'явілася мноства пытанняў наконт сувязі алімпіяды ў СССР з бамбукам. І хоць савецкія спецыялісты не валодалі адпаведнымі тэхналогіямі, арганізатары вырашылі самастойна стварыць факел. З гэтай задачай справіўся Ленінградскі машынабудаўнічы завод імя Клімава. З-за таго, што часу да пачатку спаборніцтваў заставалася мала, факел зрабілі за месяц. Стварэнню ленінградскіх спецыялістаў было накавана стаць прататыпам наступных алімпійскіх факелаў. Факел алімпіяды 1980 мае ёмістасць са звадкаваным газам, прадуманую сістэму яго змешвання з паветрам і абароны полымя ад дажджу. Патушыць факел не змог нават лівень, які ішоў у Мінску падчас урачыстай цырымоніі. Полымя патухла толькі тады, калі скончылася паліва. Побач з факелам у музеі алімпійскай славы выстаўлена лямпа, у якой алімпійскі агонь прыехаў у Мінск. Дагэтуль у беларускай сталіцы не праводзілася такіх значных спартыўных мерапрыемстваў. Таму факел той алімпіяды сёння нібы нагадвае, з чаго ўсё пачалося.
Валерыя СЦЯЦКО
Фота Ганны ЗАНКАВІЧ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
