Вы тут

Прэзідэнт: Час патрабуе надзейных людзей, упэўненых і адданых сваёй дзяржаве


Прэзідэнт назначыў новага памочніка, кіраўніка Апарату Саўміна і ўзгадніў аднаго намесніка міністра, кіраўнікоў райвыканкамаў і ВНУ


Леанід Мартынюк стаў памочнікам Прэзідэнта-інспектарам па Магілёўскай вобласці. Канстанцін Бурак назначаны кіраўніком апарату Савета міністраў, Андрэй Еўдачэнка — пастаянным прадстаўніком Беларусі ў Арганізацыі па забароне хімічнай зброі па сумяшчальніцтве, а Максім Ермаловіч — пастаянным прадстаўніком Беларусі пры Міжнароднай марской арганізацыі па сумяшчальніцтву.

Старшынямі Бярозаўскага і Ляхавіцкага райвыканкамаў адпаведна ўзгоднены Сяргей Барташ і Мікалай Мароз. Прэзідэнт даў згоду на пасаду намесніка міністра прыродных рэсурсаў і аховы навакольнага асяроддзя Аляксандру Гарошку. Таксама ўзгоднены кіраўнікі трох ВНУ. Наталля Карчэўская стане рэктарам Беларускага дзяржаўнага ўніверсітэта культуры і мастацтваў, Наталля Лапцева — рэктарам Мінскага дзяржаўнага лінгвістычнага ўніверсітэта, а Аляксандр Бахановіч узначаліць Брэсцкі дзяржаўны тэхнічны ўніверсітэт.
Андрэй Сайко з вакансіі намесніка старшыні Беларускага дзяржаўнага канцэрна па нафце і хіміі пяройдзе на пасаду генеральнага дырэктара ААТ «Нафтан».

«Мы сёння нават не разглядаем пытанне прыватызацыі нафтапераапрацоўчых заводаў» 

«Прадпрыемства вельмі складанае, мадэрнізацыя заканчваецца. Вы адказваеце за гэта і па старой сваёй рабоце, паколькі працавалі фактычна ў міністэрстве і мелі дачыненне да мадэрнізацыі гэтага прадпрыемства. А зараз, будучы генеральным дырэктарам, тым больш», — адзначыў Аляксандр Лукашэнка падчас прадстаўлення Андрэя Сайко.

Па яго меркаванні, вельмі добра, што маладыя кадры прыходзяць на вядучыя пасады і курс на амаладжэнне кіраўнічых кадраў узяты даўно.

«Камусьці вочы засланіла нейкая пялёнка, і яны гэтага не бачаць. Думаюць, што можна адразу са школы пайсці кіраваць прадпрыемствам. Ды не, трэба патаптацца добра па жыцці, як тыя, хто прысутнічае тут. Тады будзе карысць. А патаптацца па чыстых, утульных мінскіх вуліцах і думаць пра тое, што «заўтра я вазьму кіраўніцтва не толькі прадпрыемствам, але і краінай у свае рукі», —гэта па меншай меры небяспечная, памылковая думка», — дадаў ён , але сказаў, што амбіцыі — рэч нядрэнная.

Аляксандр Лукашэнка яшчэ раз нагадаў, што «Нафтан» — прадпрыемства складанае, на якое часта глядзяць карупцыянеры.

«Прадпрыемства такое, на якое часта паглядаюць карупцыянеры, рознага чыну злодзеі і тыя, хто жадае прыватызаваць прадпрыемства і пажадана за бясцэнак. Іх вакол топчацца мора. Вы павінны ведаць маю прынцыповую пазіцыю: мы сёння нават не разглядаем пытанне прыватызацыі нафтапераапрацоўчых заводаў, як бы не было зараз складана на рынку», — падкрэсліў Прэзідэнт і нагадаў, што ў крызістыя часы заўсёды былі і падзенні, і ўзлёты.

«У гэты крызісны час мы павінны шукаць шляхі, што вывядуць нас на нармальны трэнд развіцця, — канстатаваў ён і нагадаў, што да падбору людзей падыходзілі ўважліва. — Час патрабуе не толькі добрых прафесіяналаў. Сёння час патрабуе надзейных людзей, упэўненых і адданых сваёй дзяржаве, каб нас не парвалі на кавалкі і не падзялілі. Асабліва на захадзе краіны бачна: некаторым ужо не кавалак Беларусі, а ўся Беларусь патрэбна, — адзначыў Аляксандр Лукашэнка. — А мы навошта, дзе мы тады будзем? Гэта асаблівасць — мы ніколі не думалі, што нам, гаспадарнікам, прыйдзецца несці на сабе залішнюю ідэалагічную нагрузку. Аказалася, так, трэба ідэалогіяй займацца, трэба працаваць з людзьмі, трэба ім паказваць, што адбываецца, — канстатаваў кіраўнік краіны. Ён дадаў, што асабліва гэта тэма актуальная для Мінска:

«Жыццё ў сталіцы і ў глыбінцы адрозніваецца: у рэгіёнах людзі працуюць, вырабляюць хлеб. А хтосьці, хай іх меншасць, не разумее, што такое дзяржава і як мы рашуча будзем падтрымліваць гэту дзяржаву», — дадаў Прэзідэнт. Таксама ён расказаў, што ўчора назіраў за ўдзелам вайскоўцаў у мітынгу на Плошчы Незалежнасці:

«Але ж не мы звалі вайскоўцаў на Плошчу Незалежнасці. Яны сваіх пазвалі — афганцаў, Саюз афіцэраў, калег з Камітэту дзяржбяспекі, МУС. Людзі прыйшлі са сваімі перакананнямі, пад дзяржаўнай сімволікай, прыйшлі, паднялі гэтыя сцягі, выказалі сваё меркаванне. Яны ворагі, яны чужыя — вось іх (пратэстоўцаў – «Зв.») пазіцыя».

Таксама Прэзідэнт выказаўся наконт несанкцыянаваных акцый у Мінску:

«Мы змянілі тактыку. Правільна сказаў кіраўнік упраўлення па барацьбе з аргзлачынствам: мы ў спакойным рэжыме знойдзем кожнага. Сучасныя сродкі дазваляюць гэта рабіць, што мы і робім. І кожны адкажа за свае дзеянні. Я тут не пагражаю, мы ў гэтым напрамку працуем, і гэта дае пэўны эфект», — заявіў Аляксандр Лукашэнка.

Ён заўважыў, што людзі сталі больш відушчымі і ўбачылі «хто ірвецца да ўлады, хто можа прыйсці да ўлады і што будзе з краінай»:

«Кажуць мінчане ў сродках масавай інфармацыі: не заснуць па вечарах, па начах, апасаюцца дзяцей вывесці на вуліцу і гэтак далей. Людзі ўбачылі, што могуць страціць і параўналі спакойны Мінск і Мінск, які віруе, хай толькі і па нядзелях», — выказаўся Прэзідэнт.

«Сказана, што краіну не аддамо — значыць не аддамо. І вырашаць будзе ў Беларусі, пакуль я Прэзідэнт, беларускі народ. Толькі людзі будуць вырашаць. Не Прэзідэнт у адзіночку, ні кіраўнік Адміністрацыі, вышэйшыя службовыя асобы, ні дэпутаты не будуць вырашаць у адзіночку, а прынясуць народу і скажуць — вырашыце дзесяць, дваццаць, трыццаць пытанняў. Як народ вырашыць, так і будзе», — заклікаў Аляксандр Лукашэнка. 

«Не трэба сумнявацца, што ўлады нешта «змудраць з Канстытуцыяй і зробяць новую праз падман». Калі народ захоча нешта іншае, чым той курс, па якім ішлі, — хай паспрабуюць. Бо глыбінная прычына ў чым (як нам украінцы, расіяне падказваюць): у Беларусі народ не напужаны. Гэта цытата: яны не жылі ў горшых умовах», — сказаў Аляксандр Лукашэнка

«Ёсць нямала студэнтаў, якія заблыталіся, выскачылі. Ёсць тыя, у каго мазгі на месца ўжо не паставіш»

Прэзідэнт у размове з рэктарамі назваў «не нашай палітыкай» рабіць выгляд, што ва ўніверсітэтах нічога не адбываецца. Па яго словах, ён ведае ўсе праблемы, але катастрофы там няма.

«Студэнты заўсёды былі людзьмі бурнымі і бурлівымі. І мне часта кажуць: «Што вы трываеце з гэтым студэнтамі? Ды павыганяць іх, і іншае». Але тут і асабістае. Я ўспамінаю сябе, калі быў студэнтам. Ведаеце, дэкану гістарычнага факультэта заўсёды было са мной непроста. Але я ніколі не ваяваў супраць улады, — падкрэсліў Прэзідэнт. — З дэканам я заўсёды ваяваў за сумленнасць». 

Ён нагадаў, што заступаўся за пакрыўджаных студэнтаў і быў камсамольскім актывістам, таму актыўная дзейнасць і добрая вучоба яго ратавала ў спрэчках.

Прэзідэнт адзначыў, што рэктарам прыйдзецца наводзіць парадак у іх ўніверсітэтах, таму калі яму прапанавалі на дзве пасады жанчын, сумняваўся, а потым вырашыў: «Жанчыны хутчэй з беспарадкамі разбяруцца, чым мужыкі. Вы ведаеце, што я «жаночы» Прэзідэнт. Мяне заўсёды жанчыны падтрымлівалі».

Аляксандр Лукашэнка заявіў, што гатовы па закліку прыехаць у любую вну і разам з рэктарам размаўляць са студэнтамі.

Ён звярнуўся праз рэктараў і да студэнтаў. «Тут не пытанне, што мы змагаемся з іншадумствам. Розныя павінны быць погляды, — сказаў Прэзідэнт. — Мы не супраць гэтага змагаемся, змагаемся супраць парушэння закона. Яны парушаюць закон. Нікога не ўгаворвайце. Прыйшлі, патлумачылі — такі парадак. Хочаце вучыцца — вучыцеся. Не
хочаце, сыходзьце».

Прэзідэнт адзначыў, што час няпросты і на Ўсебеларускім сходзе ён раскажа дэталі таго, што адбываецца і мае адбыцца.

«Трэба гэты час перажыць. Горш будзе, калі мы перажывем, як перажыла Украіна, а яшчэ жахлівей, як Карабах», — рэзюмаваў Аляксандр Лукашэнка.

«Ёсць нямала студэнтаў, якія заблыталіся, выскачылі. Ёсць тыя, у каго мазгі на месца ўжо не паставіш. Але іх адзінкі. За імі цягнуцца і іншыя: «Вось гэта ж не нязручна. Ён выйшаў, супраць улады выступіў, я за ім». Я гэта ўсё ў душы разумею, і супакойваў і сілавікоў, і чыноўнікаў — трэба вытрываць. Зразумеюць людзі» дадаў Аляксандр Лукашэнка.

Каментарый у тэму:

Леанід Мартынюк, памочнік Прэзідэнта-інспектар па Магілёўскай вобласці: «Задачы, якія патаўленыя і будуць выконвацца не толькі мною, але і ўсёй камандай Адміністрацыі Прэзідэнта, — гэта падтрыманне і паскарэнне развіцця ўсяго сельскагаспадарчага і вытворчага комплексу. Магілёўская вобласць з’яўляецца ўнікальнай з боку сімбіёзу вёскі і прамысловасці. На сённяшні дзень мэты — загрузка ўсіх вытворчых магутнасцей і павелічэнне вытворчасці ў выніку, каб павялічваліся заробкі і паляпшаўся дабрабыт людзей».

Андрэй Сайко, генеральны дырэктар ААТ «Нафтан», расказаў, што будаўніча-мантажныя работы па мадэрнізацыі прадпрыемства будуць скончаны ў красавіку будучага года: «Я курыраваў некаторыя іншыя работы ў канцэрне. Але я ведаю пра праект, пра яго значнасць для прадпрыемства, ведаю, на якой стадыі ён знаходзіцца. Задачы, якія сёння Прэзідэнт агучыў, — гэта хутчэйшыя тэрміны завяршэння рэалізацыі будаўніцтва ўстаноўкі»

Наталля Лапцева, рэктар Мінскага дзяржаўнага лінгвістычнага ўніверсітэта: «Той факт, што студэнты Мінскага дзяржаўнага лінгвістычнага ўніверсітэта ў большай ступені сёння выказваюць актыўнасць, магчыма, звязана з тым, што студэнты вывучаюць розныя мовы, культуры, глядзяць на вопыт многіх дзяржаў. Разам з тым нам уяўляецца, што палітычная культура дапаможа, дапамагала і будзе дапамагаць прымаць заўсёды ўзважаныя рашэнні, вызначаць сваю пазіцыю, асноўваючыся на ведах гісторыі, вопыце. Развіццё палітычнай культуры стане адной з ключавых задач».

Будзе дапоўнена

Марыя ДАДАЛКА

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.