У Ваўкавыскім раёне ў лесе двое грамадзян вырошчвалі каноплі

Міліцыянеры затрымалі двух мясцовых жыхароў 31-го і 32-х гадоў, якія маюць дачыненне да незаконнага абароту наркотыкаў расліннага паходжання.

Як паведамляе аддзяленне інфармацыі і грамадскіх сувязяў УУС Гродзенскага аблвыканкама, першапачаткова праваахоўнікі ўстанавілі месца, дзе раслі каноплі і вылучылі версію пра тое, што яна не з’яўляецца дзікарослай. Тры акуратныя градкі ў лесе давалі зразумець, што за імі сочаць і чакаюць ураджаю.

Падазраваных затрымалі на працы. Абодва будаўнікі, і менавіта на аб’екце, які узводзіўся, яны захоўвалі частку ўраджаю.

Усяго канфіскавана крыху больш за два грамы марыхуаны і каля чатырох кілаграмаў канопляў у сырым выглядзе. Са слоў мужчын, «траву» яны мелі намер выкарыстоўваць для асабістага спажывання. Заведзена крымінальная справа.

Сяргей РАСОЛЬКА

Прэв’ю: beasts.cc