Вы тут

Штотыднёвы спартыўны агляд «Звязды»


У традыцыйным штотыднёвым аглядзе «Звязды» расказваем цікавыя спартыўныя навіны.


1. Беларуская тэнісістка Арына Сабаленка — пераможніца міжнароднага жаночага турніру катэгорыі «WTA Premіer» J & T Banka Ostrava Open 2020 з прызавым фондам $528,500. Спаборніцтвы вызначыліся беларускім фіналам. У вырашальным матчы Арына Сабаленка сустрэлася з беларускай Вікторыяй Азаранкай. Матч прайшоў з поўнай перавагай Арыны Сабаленкі, якая выйграла ў двух сэтах з вынікам 6:2, 6:2. На гэта ёй спатрэбілася адна гадзіна. Вікторыя Азаранка ў канцы першага сэта адчула недамаганне і не магла працягваць барацьбу ў поўнай меры.

Для 22-гадовай Арыны Сабаленкі гэта сёмы чэмпіёнскі тытул на турнірах пад эгідай WTA. Перамога ў Остраве падняла яе на 11-е месца ў сусветным рэйтынгу. Вікторыя Азаранка таксама паднялася ў рэйтынгу і зараз займае 13-ю пазіцыю.

Пераможнымі гэтыя выхадныя сталі і для мужчынскага тэнісу. Беларус Ілья Івашка перамог на турніры серыі «Чэленджэр» у Стамбуле. У фінальным паядынку ён абыграў славацкага тэнісіста Марціна Кліжана з вынікам 6:1, 6:4. У мужчынскім сусветным рэйтынгу Ілья займае 114-е месца. Найлепшая пазіцыя сярод беларусаў у Ягора Герасімава, ён на 83-м месцы.

2. Хакейны клуб «Дынама-Мінск» пацярпеў пятае паражэнне запар у рэгулярным чэмпіянаце Кантынентальнай Хакейнай Лігі. Сумны юбілей «зубры» адзначылі ў матчы з «Северсталлю». Паядынак скончыўся з вынікам 1:2 на карысць хакеістаў з Чарапаўца. На гэтую сустрэчу ўскладалі вялікія надзеі, пасля каранціну на лёд вярнуліся легіянеры. Дагэтуль «зубры» ўступілі аднаклубнікам з Масквы з вынікам — 2:5. Перамагчы гэтага саперніка яны не могуць з кастрычніка 2017 года. Прайгралі беларусы і маскоўскаму ЦСКА з вынікам 1:5.

Цяпер «Дынама-Мінск» займае чацвёртае месца ў табліцы Заходняй канферэнцыі. Наступны матч «зубры» правядуць дома 28 кастрычніка супраць рыжскага «Дынама».

3. На «Чыжоўка-Арэне» прайшоў чэмпіянат Беларусі па фехтаванні. У турніры ўзяло ўдзел каля 250 спартсменаў з Беларусі, Расіі і ЮАР. Для беларусаў гэта першы старт пасля доўгага перапынку, звязанага з пандэміяй каранавіруса. Перамогу ў індывідуальных выступленнях на шпагах святкавалі Кірыл Касьяннік і Кацярына Поршнева. У камандным заліку найлепшымі ў фехтаванні на шпагах сталі мінчане Сяргей Ладошкін, Дзяніс Паўлоўскі, Павел Міхалькоў і Уладзіслаў Шанцаў. Сярод жанчын найлепшымі ў гэтай дысцыпліне таксама стала мінская каманда ў складзе Міхаліны Грынкевіч, Евы Панцялеевай, Настассі Пракапенкі і Ксеніі Тамашэўскай.

У асабістых спаборніцтвах на рапірах першае месяца занялі Аляксандр Шалянкоў і Варвара Шафаростава. У спаборніцтвах камандаў сярод мужчын перамога дасталася прадстаўнікам Брэста Уладзіміру Буценку, Аляксею Крэсціну, Яўгену Цыбулі і Аляксандру Шалянкову. Сярод жанчын найлепшыя — рапірысткі з Гомельскай вобласці Ганна Андрэенка, Яна Андрэенка, Аляксандра Вараб'ёва і Ганна Сцяпанава.

У спаборніцтвах на шаблях перамаглі Арцём Новікаў і Паліна Каспяровіч. У камандных спаборніцтвах на шаблях не было роўных мужчынскай камандзе Магілёўскай вобласці, якую прадстаўлялі Арцём Новікаў, Антон Давыдзенка, Павел Курыла і Данііл Лоскаўнеў. У жаночых спаборніцтвах золата заваявалі прадстаўніцы Мінскай вобласці Паліна Каспяровіч, Паліна Сідаровіч, Аліна Маргалік і Юлія Серыкава.

4. Беларуская велагоншчыца Алена Амялюсік заняла шостае месца на Туры Фландрыі-2020, адной з самых ганаровых аднадзённых гонак у шашэйным веласпорце. На гонцы спартсменка выступала за каманду Canyon-Sram Racіng. Перамогу святкавала спартсменка з Нідэрландаў Шанталь Ван Дэн Брок-Блаак, дыстанцыю ў 135,6 кіламетра яна пераадолела за 3 гадзіны 29 хвілін 57 секундаў. Серабро ў яе суайчынніцы Эмі Пітэрс, бронза — у бельгійкі Лотэ Капецкі. Алена Амялюсік прыехала да фінішу ў асноўнай групе спартсменак разам з Эмі Пітэрс і Лотэ Капецкі, паказаўшы аднолькавы з імі час.

5. Расійскі баец змешанага стылю Хабіб Нурмагамедаў захаваў чэмпіёнскі пояс UFC у лёгкай вазе. У галоўным паядынку турніру UFC 254, які адбыўся на Байцоўскім востраве ў Абу-Дабі, ураджэнец Дагестана перамог амерыканца Джасціна Гэтжы. Для 32-гадовага спартсмена гэта 29-я перамога і трэцяя абарона чэмпіёнскага тытула UFC. У змешаных адзінаборствах у яго няма ніводнага паражэння. Пасля пераможнага бою Хабіб Нурмагамедаў аб'явіў аб заканчэнні спартыўнай кар'еры.

Валерыя СЦЯЦКО

Фота з адкрытых крыніц

Выбар рэдакцыі

Грамадства

Што мяняецца з 1 снежня

Што мяняецца з 1 снежня

Вырасце памер пенсiй: па ўзросце, за выслугу гадоў, па iнвалiднасцi, з прычыны страты кармiцеля. 

Грамадства

​Што павiнны зрабiць на прадпрыемствах, каб папярэдзiць распаўсюджванне COVID-19

​Што павiнны зрабiць на прадпрыемствах, каб папярэдзiць распаўсюджванне COVID-19

Мiнiстэрства аховы здароўя распрацавала рэкамендацыi па прафiлактыцы каранавiруснай iнфекцыi ў арганiзацыях.

Грамадства

Бонусы для альтруiстаў могуць быць прадугледжаны законам аб валанцёрскай дзейнасцi

Бонусы для альтруiстаў могуць быць прадугледжаны законам аб валанцёрскай дзейнасцi

Пра гэтыя i iншыя прапановы ў законапраект аб валанцёрскай дзейнасцi разважалi эксперты падчас круглага стала.

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава.