Вы тут

У Магілёве на дыскусійнай платформе абмеркавалі надзённыя пытанні сацыяльна-эканамічнага развіцця


Амаль дзве гадзіны спатрэбіліся кіраўнікам дыскусійных платформ, каб абагульніць усе тыя пытанні, якія былі агучаны на дыялогавых пляцоўках Магілёўскай вобласці з 13 да 23 кастрычніка. Паступіла болей чым 1100 прапаноў па аспектах арганізацыйнай рэформы і іншых актуальных праблемах развіцця краіны і рэгіёнаў.


Фота БЕЛТА.

— Магілёўская вобласць актыўна ўдзельнічала ў абмеркаваннях, — падкрэсліў старшыня Магілёўскага аблвыканкама Леанід Заяц. — Прадстаўнікі органаў дзяржаўнага кіравання і самакіравання, дэпутацкага корпуса, грамадскіх арганізацый і палітычных партый, насельніцтва рэгіёна ўносілі рознага кшталту прапановы па пенсійным заканадаўстве, развіцці прадпрыемстваў, разняволенні дзелавой ініцыятывы, падтрымцы моладзі, па некаторых змяненнях у Канстытуцыю, Закон аб мясцовым кіраванні і самакіраванні Рэспублікі Беларусь і гэтак далей. Гэта ўсе тыя жыццёвыя пытанні, якія патрабуюць неадкладнага вырашэння.

Не ўсім падабаецца мір і згода ў Беларусі, імкненне праводзіць нейтральную і незалежную дзяржаўную палітыку. Наступствы гэтага мы бачым сёння. Нам хацелі навязаць сцэнарый «каляровай» рэвалюцыі, які б затармазіў наша развіццё на шмат гадоў, але беларусы такі шлях, на шчасце, не прынялі. Разам з тым мы бачым змены ў грамадстве і жаданне грамадзян удзельнічаць у вызначэнні будучыні краіны. У гэтым і ёсць эвалюцыйны шлях развіцця. Але працэс павінен ісці цывілізавана, з улікам меркаванняў усіх сацыяльных груп, з улікам праблем, якія хвалююць.

Рэктар МДУ імя А. Куляшова Дзяніс Дук, кіраўнік платформы, дзе абмяркоўваліся пытанні канстытуцыйнага рэфармавання і партыйнага будаўніцтва, паведаміў, што калі аб'яднаць у ключавыя блокі тыя прапановы, што паступілі ад працоўных калектываў, грамадскіх арганізацый, палітычных партый, то можна выдзеліць тры асноўныя кірункі.

— Па-першае, гэта ўдасканаленне выбарчай сістэмы, пераход да змешанага тыпу, — рэзюмаваў ён. — Па-другое, мараторый на смяротнае пакаранне і ўвядзенне такога інстытута, як упаўнаважаны па правах чалавека, па-трэцяе — механізм прызначэння службовых асоб, у тым ліку судовай сістэмы. Ёсць таксама неабходнасць у рэалізацыі шэрагу іншых вельмі важных ініцыятыў. Напрыклад, па лібералізацыі заканадаўства ў плане змяншэння ролі кантралюючых органаў у бізнес-асяроддзі, рэальным сектары эканомікі, грамадскай сферы.

На дыскусійнай пляцоўцы, прысвечанай эканоміцы, з удзелам экспертаў былі разгледжаны і абмеркаваны пытанні, пачынаючы ад падрыхтоўкі кадраў для рэальнага сектара эканомікі і ўніверсітэцкай навукі і заканчваючы праблемамі ў рабоце буйных прадпрыемстваў, а таксама малога і сярэдняга бізнесу.

— Усе гэтыя кірункі патрабуюць удасканалення заканадаўства, — канстатаваў намеснік старшыні Магілёўскага аблвыканкама Руслан Страхар. — Тыя прававыя дакументы, якія датычацца тэхнічных нарматываў, у асобных выпадках запавольваюць рэалізацыю буйных і дробных інвестыцыйных праектаў. Ёсць неабходнасць удасканалення заканадаўства па падтрымцы малога і сярэдняга прадпрымальніцтва. І самае важнае — гэта разняволенне дзелавой ініцыятывы. Мы пачулі шмат канструктыўных прапаноў ад кіраўнікоў прыватных і дзяржаўных кампаній, якія нацэлены якраз на змяненне і лібералізацыю заканадаўства.

Сёння ў Беларусі існуе даступная высокапрафесійная медыцына, аднак яна таксама мае патрэбу ў змяненнях.

— У краіне назіраецца высокая смяротнасць ад сардэчна-сасудзістых і анкалагічных захворванняў, таму гэтыя кірункі павінны фінансавацца ў першаю чаргу, — перакананы начальнік галоўнага ўпраўлення аховы здароўя Магілёўскага аблвыканкама Аляксандр Старавойтаў. — Захворванні павінны выяўляцца на ранніх стадыях, гэта неабходна рабіць у амбулаторных умовах, а не ва ўмовах стацыянара. Фінансаванне клініка-затратных груп, амбулаторнага звяна, развіццё высокіх тэхналогій, якія дазволяць паставіць пацыента на ногі ў мінімальныя тэрміны — гэта тыя пытанні, на якія трэба звярнуць увагу.

З'явілася вялікая патрэба ў павышэнні ролі мясцовага кіравання і самакіравання з праекцыяй на развіццё рэгіёнаў, лічаць народныя абраннікі. Яны прапануюць пашырыць паўнамоцтвы мясцовых Саветаў дэпутатаў у вырашэнні пытанняў сацыяльна-эканамічнага развіцця, жыццезабеспячэння рэгіёнаў і зямельнага карыстання. Лічаць неабходным разгледзець магчымасць рэарганізацыі сельсаветаў у сельскія адміністрацыі з выбарам кіраўніка адміністрацыі шляхам галасавання. А таксама прапануюць пашырыць паўнамоцтвы і функцыі органаў мясцовага самакіравання і ўвесці фінансаванне для вырашэння пытанняў мясцовага значэння.

— Неабходна на заканадаўчым узроўні даць адпаведныя паўнамоцтвы мясцовым органам, каб не звяртацца кожны раз па дапамогу ў вышэйстаячыя інстанцыі, — лічыць старшыня Слаўгарадскага райсавета дэпутатаў Святлана Язерская. — Значэнне органаў мясцовага самакіравання нельга пераацаніць. Менавіта яны ствараюць умовы для жыццезабеспячэння насельніцтвана адпаведнай тэрыторыі, грамадзяне пастаянна кантактуюць з імі ў паўсядзённым жыцці. Сёння адбываецца павышэнне актыўнасці і ініцыятыўнасцімясцовага насельніцтва, і мы ўсе разумеем неабходнасць больш актыўна праводзіць работу па фарміраванні ў кожнага жыхара адказнасці за развіццё тэрыторыі, усяляк стымуляваць працоўную занятасць і самазанятасць насельніцтва.

Гэтыя і іншыя прапановы па актуальных пытаннях развіцця краіны і рэгіёнаў, выпрацаваныя падчас абмеркаванняў на дыскусійных пляцоўках, увайшлі ў спіс абласной рэзалюцыі, якая зацверджана на пленарным пасяджэнні «Магілёўскі дыялог». Яна будзе перададзена для далейшага разгляду на рэспубліканскі ўзровень.

Нэлі ЗІГУЛЯ

Загаловак у газеце: Праблемы важныя і актуальныя

Выбар рэдакцыі

Грамадства

«Лепшы цюнінг для машын — правільны пратэктар шын»

«Лепшы цюнінг для машын — правільны пратэктар шын»

Менавіта пад такім слоганам будзе праводзіцца Рэспубліканская прафілактычная акцыя, якая ініцыяваная на нашых дарогах Дзяржаўтаінспекцыяй краіны. 

Грамадства

Зімовы асартымент. Колькі каштуюць «вітаміны» на «Лебядзіным»

Зімовы асартымент. Колькі каштуюць «вітаміны» на «Лебядзіным»

З якімі прыкметамі вы звязваеце набліжэнне зімы? 

Грамадства

Якiя нашы звычкi шкодзяць здароўю i знiшчаюць iмунiтэт?

Якiя нашы звычкi шкодзяць здароўю i знiшчаюць iмунiтэт?

Мы ў жыццi шмат чаго робiм, што пагаршае наша здароўе — або адразу, або ў аддаленай перспектыве.