Рэжым НС уведзены ў Чалябінску пасля выбуху ў паліклініцы

У Чалябінску ўведзены рэжым НС муніцыпальнага ўзроўню пасля выбуху ў паліклініцы, паведамляе ТАСС.

У кіслароднай будцы паліклінікі адбылося ўзгаранне, пасля чаго выбухнуў кіслародны балон. Пажар перакінуўся на два паверхі паліклінікі, а таксама на суседні жылы дом.

Гэтая паліклініка была перапрафіліравана пад стацыянар для хворых на каранавірус. На момант інцыдэнту там было каля 170 пацыентаў, прыкладна ў 150 з іх пацверджаны COVID-19. Усіх пацыентаў эвакуіравалі.

Паводле інфармацыі адміністрацыі Чалябінска, ахвяр і пацярпелых няма. Пры транспартоўцы ні ў аднаго пацыента не дапушчана істотнага пагаршэння стану.

Пасля інцыдэнту прынята рашэнне праверыць кіслароднае абсталяванне медустаноў Чалябінскай вобласці. У МНС мяркуюць, што прычынай узгарання маглі стаць парушэнні пры мантажы або эксплуатацыі кіслароднага абсталявання.