У Смалявічах урачыста адкрылі яслі-сад № 7 «Буслік»

У Смалявічах урачыста адкрылі яслі-сад № 7 «Буслік». Дашкольная ўстанова разлічана на 230 месцаў.

Для маленькіх жыхароў ужо сфарміравана 12 груп. У тым ліку дзве з іх разлічаны на дзетак ад двух да трох гадоў, чатыры групы прызначаны для выхаванцаў ад трох да чатырох гадоў, астатнія будуць наведваць дзеці ва ўзросце да шасці гадоў.

Тут створаны цудоўныя ўмовы для ўсебаковага гарманічнага развіцця выхаванцаў, як эстэтычнага, так і маральнага, і фізічнага. Да іх паслуг — музыкальная, трэнажорная, фізкультурная залы, плавальны басейн. Тут аснашчаны сучасным абсталяваннем медыцынскі блок з двума ізалятарамі, працэдурным і фізіятэрапеўтычным кабінетамі, пунктам карэкцыйнай дапамогі і сенсорны пакой. У яслях-садзе будуць адкрыты інтэрактыўны пакой і арт-студыя.

На прылеглай да будынка тэрыторыі абсталяваны пляцоўкі, дзе малыя ў гульнявой форме будуць засвойваць правілы дарожнага руху. На ўваходах у памяшканне ўстаноўлены дамафоны, а ў харчавальным блоку і холах — сістэма відэаназірання. Так што бацькі могуць быць спакойныя за бяспеку сваіх дзяцей.

Адметнасцю дашкольнай установы, якая знаходзіцца непадалёк ад індустрыяльнага парка «Вялікі камень», стане Цэнтр беларуска-кітайскай культуры, дзе ў дзяцей будуць фарміраваць інтарэс да гісторыі, культуры, традыцый Кітая і Беларусі.

Таццяна ЛАЗОЎСКАЯ